ಪ್ಯಾರಿಸ್: ಅಥ್ಲೆಟಿಕ್ಸ್ ಸ್ಪರ್ಧೆಗಳಲ್ಲಿ ಸಾಮಾನ್ಯವಾಗಿ ಓಟದ ಟ್ರ್ಯಾಕ್ಗಳು ಮಣ್ಣಿನ ಅಥವಾ ತಿಳಿ ಕಂದು ಬಣ್ಣವನ್ನು ಹೊಂದಿರುತ್ತವೆ. ಆದರೆ ಮುಂಬರುವ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಅಥ್ಲೀಟ್ಗಳು ನೇರಳೆ ಅಥವಾ ಲ್ಯಾವೆಂಡರ್ ಬಣ್ಣದ ಟ್ರ್ಯಾಕ್ನಲ್ಲಿ ಓಡಲಿದ್ದಾರೆ. ಒಲಿಂಪಿಕ್ಸ್ನಲ್ಲಿ ಅಥ್ಲೆಟಿಕ್ಸ್ ಸ್ಪರ್ಧೆಗಳು ನಡೆಯಲಿರುವ ಸ್ಟೇಡ್ ಡಿ ಫ್ರಾನ್ಸ್ ಸ್ಟೇಡಿಯಂನಲ್ಲಿ ಈಗಾಗಲೆ ನೇರಳೆ ಬಣ್ಣದ ಟ್ರ್ಯಾಕ್ಗಳನ್ನು ಅಳವಡಿಸಲಾಗಿದ್ದು, ಇದಕ್ಕಾಗಿ ಅನುಸರಿಸಲಾಗಿರುವ ಹೊಸ ಕಟ್ಟಿಂಗ್-ಎಡ್ಜ್ ತಂತ್ರಜ್ಞಾನದಿಂದಾಗಿ ಈ ಬಾರಿ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಹೆಚ್ಚಿನ ದಾಖಲೆಗಳು ನಿರ್ಮಾಣವಾಗುವ ನಿರೀಕ್ಷೆ ಹರಡಿದೆ. ಭಾರತದ ಜಾವೆಲಿನ್ ಥ್ರೋ ತಾರೆ ನೀರಜ್ ಚೋಪ್ರಾ ಅವರ ಎಸೆತದ ಶೈಲಿಗೂ ಈ ಟ್ರ್ಯಾಕ್ ನೆರವಾಗಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಒಲಿಂಪಿಕ್ಸ್ ಒಲಿಂಪಿಕ್ಸ್ ಗೇಮ್ಸ್ ಸಂಟಕರು ಈ ಬಾರಿ ಅಥ್ಲೆಟಿಕ್ಸ್ ಟ್ರ್ಯಾಕ್ಗೆ ನೇರಳೆ ಬಣ್ಣ ಆರಿಸಲು ಕಾರಣ ಸರಳವಾಗಿದೆ. ಈ ಸಲದ ಒಲಿಂಪಿಕ್ಸ್ ಗೇಮ್ಸ್ ನೀಲಿ, ಹಸಿರು ಮತ್ತು ನೇರಳ ಬಣ್ಣದ ಥೀಮ್ ಒಳಗೊಂಡಿದೆ. ಕ್ರೀಡಾಕೂಟದ ಎಲ್ಲ ತಾಣಗಳಲ್ಲಿ ಇದೇ ಬಣ್ಣಗಳು ಎದ್ದು ಕಾಣಲಿವೆ. ಇದೇ ನಿಟ್ಟಿನಲ್ಲಿ ಅಥ್ಲೆಟಿಕ್ಸ್ ಟ್ರ್ಯಾಕ್ಗೂ ದೃಶ್ಯ ಆಕರ್ಷಣೆಯ ನೇರಳ ಬಣ್ಣವನ್ನು ನೀಡಲಾಗಿದೆ.
1976ರ ಮಾಂಟ್ರಿಯಲ್ ಒಲಿಂಪಿಕ್ಸ್ನಿಂದಲೂ ಇಟಲಿ ಮೂಲದ "ಮೊಂಡೋ ಗ್ರೂಪ್', ಒಲಿಂಪಿಕ್ಸ್ನ ಅಥ್ಲೆಟಿಕ್ಸ್ ಕ್ರೀಡಾಂಗಣದ ಟ್ರ್ಯಾಕ್ಗಳಿಗೆ ತನ್ನ ಕಂಪನಿಯ ಪ್ರಿಫ್ಯಾಬ್ರಿಕೇಟೆಡ್ ರಬ್ಬರ್ಗಳನ್ನು ಪೂರೈಸುತ್ತ ಬಂದಿದೆ. ಈ ಸಲವೂ ಅದೇ ಟ್ರ್ಯಾಕ್ಗಳನ್ನು ಸಿದ್ಧಪಡಿಸಿದ್ದು, ವಿಶ್ವದ ಅಗ್ರ ಅಥ್ಲೀಟ್ಗಳ ಸಲಹೆ-ಸೂಚನೆಗಳನ್ನು ಪರಿಗಣನೆಗೆ ತೆಗೆದುಕೊಂಡು, ಅತ್ಯಂತ ವೇಗವಾಗಿ ಓಡಲು ನೆರವಾಗುವಂಥ ನೇರಳೆ ಬಣ್ಣದ ವೇಗವರ್ಧಕ ಟ್ರ್ಯಾಕ್ಗಳನ್ನು ಸಿದ್ಧಪಡಿಸಿದೆ.
ಮೊಂಡೋ ಟ್ರ್ಯಾಕ್ಗಳು ಎರಡು ಪದರಗಳನ್ನು ಒಳಗೊಂಡಿರುತ್ತವೆ. ಮೇಲ್ಮೆಯನ್ನು ವಲ್ಕನೈಸ್ ರಬ್ಬರ್ನಿಂದ ಮಾಡಲಾಗಿದ್ದು, ಉತ್ತಮ ಹಿಡಿತವನ್ನು ಒದಗಿಸುತ್ತದೆ. ಹೊರಗಿನ ಮೇಲ್ಮೆಯ ಕೆಳಗೆ ಗಾಳಿ ತುಂಬಿದ ಕುಳಿಗಳ ಪದರವು ಶಾಕ್ ಅಬ್ಸರ್ಬರ್ಗಳಾಗಿ ಕಾರ್ಯನಿರ್ವಹಿಸುತ್ತವೆ ಮತ್ತು ಸರಳವಾಗಿ ಹೇಳುವುದಾದರೆ ಸರಿಯಾದ ಬೌನ್ಸ್ ಒದಗಿಸುತ್ತದೆ. ಮೊಂಡೋ ಟ್ರ್ಯಾಕ್ಗಳು ವಿಶ್ವದ ಅತ್ಯಂತ ವೇಗದ ಟ್ರ್ಯಾಕ್ಗಳೆಂದೂ ಪರಿಗಣಿಸಲ್ಪಡುತ್ತವೆ.
ಈ ವಿನೂತನ ತಂತ್ರಜ್ಞಾನದ ಹೊಸ ಟ್ರ್ಯಾಕ್ಗಳು ಅಥ್ಲೀಟ್ಗಳಿಗೆ ಅತ್ಯಂತ ವೇಗವಾಗಿ ಓಡಲು ನೆರವಾಗುತ್ತವೆ ಎಂಬುದು ಮೊಂಡೋ ಟ್ರ್ಯಾಕ್ ಕಂಪನಿಯ ವಾದವಾಗಿದೆ. ಹೀಗಾಗಿ ಸಹಜವಾಗಿಯೇ ಈ ಬಾರಿ ಪ್ಯಾರಿಸ್ನಲ್ಲಿ ಹೆಚ್ಚಿನ ಅಥ್ಲೀಟ್ಗಳಿಂದ ಹೊಸ ದಾಖಲೆಗಳು ನಿರ್ಮಾಣವಾಗುವ ನಿರೀಕ್ಷೆ ಇಡಲಾಗಿದೆ.
