ಇಂದು ಪಂಜಾಬ್ ಕಿಂಗ್ಸ್​-ಲಖನೌ ಸೂಪರ್​ಜೈಂಟ್ಸ್​ ಕಾದಾಟ

ಧರ್ಮಶಾಲಾ: ಪ್ಲೇಆಫ್​ ಸ್ಥಾನಕ್ಕಾಗಿ ನಿಕಟ ಪೈಪೋಟಿ ನಡೆಸುತ್ತಿರುವ ತಂಡಗಳಾದ ಪಂಜಾಬ್​ ಕಿಂಗ್ಸ್​ ಮತ್ತು ಲಖನೌ ಸೂಪರ್​ಜೈಂಟ್ಸ್​, ಐಪಿಎಲ್​ 18ನೇ ಆವೃತ್ತಿಯಲ್ಲಿ ಭಾನುವಾರ ರಾತ್ರಿ ಮುಖಾಮುಖಿ ಆಗಲಿವೆ. ಪಂಜಾಬ್​ ತಂಡದ ಎರಡನೇ ತವರು ತಾಣವಾದ ಹಿಮಾಚಲ ಪ್ರದೇಶದ ಧರ್ಮಶಾಲಾದಲ್ಲಿ ಈ ಕಾದಾಟ ನಡೆಯಲಿದ್ದು, ಗೆದ್ದ ತಂಡ ಪ್ಲೇಆಫ್​ ಅವಕಾಶ ಹೆಚ್ಚಿಸಿಕೊಳ್ಳಲಿದೆ.

ಒಂದು ತಿಂಗಳ ಹಿಂದೆ ಲಖನೌದಲ್ಲಿ ನಡೆದಿದ್ದ ಉಭಯ ತಂಡಗಳ ಮೊದಲ ಮುಖಾಮುಖಿಯಲ್ಲಿ ಪಂಜಾಬ್​ ತಂಡ 8 ವಿಕೆಟ್​ಗಳಿಂದ ಗೆದ್ದಿತ್ತು. ಇದೇ ವಿಶ್ವಾಸದಲ್ಲಿ ಶ್ರೇಯಸ್​ ಅಯ್ಯರ್​ ಪಡೆ ಈ ಸಲವೂ ಕಣಕ್ಕಿಳಿಯಲಿದ್ದರೆ, ರಿಷಭ್​ ಪಂತ್​ ಬಳಗ ಸೇಡು ತೀರಿಸಿಕೊಳ್ಳುವ ತವಕದಲ್ಲಿದೆ.

ಇದುವರೆಗೆ ಭಾರತೀಯ ಕ್ರಿಕೆಟಿಗರ ಆಟದಿಂದಲೇ ಹೆಚ್ಚಿನ ಯಶ ಕಂಡಿರುವ ಪಂಜಾಬ್​ ವಿದೇಶಿಯರಿಂದಲೂ ಉತ್ತಮ ಕೊಡುಗೆಯ ನಿರೀೆಯಲ್ಲಿತ್ತು. ಈ ನಡುವೆ ಗ್ಲೆನ್​ ಮ್ಯಾಕ್ಸ್​ವೆಲ್​ ಕೈಬೆರಳು ಮುರಿತದಿಂದಾಗಿ ಟೂರ್ನಿಯಿಂದ ಹೊರಬಿದ್ದಿದ್ದಾರೆ. ಅವರ ಗೈರಿನಲ್ಲಿ ಅಜ್ಮತ್​ಉಲ್ಲಾ ಒಮರ್ಜಾಯಿ ಅಥವಾ ಆರನ್​ ಹಾರ್ಡಿ ಹೆಚ್ಚಿನ ಅವಕಾಶ ಪಡೆಯಬಹುದು. ಅರ್ಷದೀಪ್​, ಚಾಹಲ್​, ಜಾನ್ಸೆನ್​ ಯಶಸ್ಸಿನಿಂದ ಪಂಜಾಬ್​ ಬೌಲಿಂಗ್​ ವಿಭಾಗವೂ ಹೆಚ್ಚಿನ ಬಲ ಪಡೆದುಕೊಂಡಿದೆ.

ಪಂಜಾಬ್​ಗೆ ವ್ಯತಿರಿಕ್ತವಾಗಿ ಲಖನೌ ತಂಡದ ಬ್ಯಾಟಿಂಗ್​ ವಿಭಾಗ ವಿದೇಶಿಯರನ್ನೇ ಹೆಚ್ಚು ಅವಲಂಬಿಸಿದೆ. ಪೂರನ್​ (377), ಮಿಚೆಲ್​ ಮಾರ್ಷ್​ (344), ಮಾರ್ಕ್ರಮ್​ (326) ಕ್ಲಿಕ್​ ಆದರಷ್ಟೇ ಯಶ ಕಾಣುವ ಸ್ಥಿತಿ ಲಖನೌ ತಂಡದ್ದಾಗಿದೆ. ನಾಯಕ ರಿಷಭ್​ ಪಂತ್​ ರನ್​ಬರ ತಂಡಕ್ಕೆ ದೊಡ್ಡ ಹಿನ್ನಡೆ ತಂದಿದೆ. ಬೌಲಿಂಗ್​ನಲ್ಲಿ ಭಾರತೀಯರನ್ನೇ ನಂಬಿರುವ ಲಖನೌಗೆ ಮಿಂಚಿನ ವೇಗಿ ಮಯಾಂಕ್​ ಯಾದವ್​ ಸೇರ್ಪಡೆ ಹೊಸ ಬಲ ತುಂಬಿದೆ.

ಪ್ಲೇಆಫ್​ ಲೆಕ್ಕಾಚಾರ...

ಶ್ರೇಯಸ್​ ಅಯ್ಯರ್​ ಪಡೆ ಇದುವರೆಗೆ ಆಡಿರುವ 10 ಪಂದ್ಯಗಳಲ್ಲಿ 6ರಲ್ಲಿ ಗೆದ್ದು, 3 ಸೋಲಿನೊಂದಿಗೆ 13 ಅಂಕ ಗಳಿಸಿದೆ. ಮಳೆಯಿಂದಾಗಿ ಒಂದು ಪಂದ್ಯ ರದ್ದು ಆಗಿದ್ದು ಪಂಜಾಬ್​ಗೆ ತುಸು ಹಿನ್ನಡೆ ತಂದಿದೆ. ಉಳಿದ 4ರಲ್ಲಿ 2ರಲ್ಲಿ ಗೆದ್ದರೆ 2ರಲ್ಲಿ ಗೆದ್ದರೂ ಪ್ಲೇಆಫ್​​ ಸ್ಥಾನ ಒಲಿಸಿಕೊಳ್ಳಬಹುದಾಗಿದೆ. ಮತ್ತೊಂದೆಡೆ ಲಖನೌ ತಂಡ ಆಡಿದ 10 ಪಂದ್ಯಗಳಲ್ಲಿ ತಲಾ 5 ಜಯ, 5 ಸೋಲು ಕಂಡಿದ್ದು, ಪ್ಲೇಆಫ್​​ಗೇರಲು ಉಳಿದ 4 ಪಂದ್ಯಗಳಲ್ಲಿ 3 ಗೆಲುವಿನ ಅನಿವಾರ್ಯತೆ ಎದುರಿಸುತ್ತಿದೆ.

ಧರ್ಮಶಾಲಾದಲ್ಲಿ ಮೊದಲ ಪಂದ್ಯ

ಒಟ್ಟು 12 ತಾಣಗಳ ಪೈಕಿ ಧರ್ಮಶಾಲಾ ಟೂರ್ನಿಗೆ ಕೊನೆಯದಾಗಿ ಎಂಟ್ರಿ ಕೊಡುತ್ತಿದ್ದು, ಟೂರ್ನಿಯ 54ನೇ ಪಂದ್ಯ ಇಲ್ಲಿನ ಮೊದಲ ಕಾದಾಟ ಆಗಿರಲಿದೆ. ತವರು ತಾಣ ಮುಲ್ಲನ್​ಪುರದಲ್ಲಿ ಆಡಿದ 4 ಪಂದ್ಯಗಳಲ್ಲಿ ತಲಾ 2 ಜಯ, ಸೋಲು ಕಂಡಿರುವ ಪಂಜಾಬ್​ ತಂಡ, ತನ್ನ ಕೊನೇ 3 ತವರು ಪಂದ್ಯಗಳನ್ನು ಧರ್ಮಶಾಲಾದ ಎಚ್​ಪಿಸಿಎ ಸ್ಟೇಡಿಯಂನಲ್ಲಿ ಆಡಲಿದೆ. ಲಖನೌ, ಡೆಲ್ಲಿ (ಮೇ 8), ಮುಂಬೈ (ಮೇ 11) ವಿರುದ್ಧದ ಈ 3 ಪಂದ್ಯಗಳಲ್ಲಿ ಗೆದ್ದರೆ ಪಂಜಾಬ್​, ಮೇ 16ರಂದು ಜೈಪುರದಲ್ಲಿ ನಡೆಯಲಿರುವ ತನ್ನ ಕೊನೇ ಲೀಗ್​ ಪಂದ್ಯಕ್ಕೆ ಮುನ್ನವೇ ಪ್ಲೇಆಫ್​ ಸ್ಥಾನ ಖಚಿತಪಡಿಸಿಕೊಳ್ಳಬಹುದಾಗಿದೆ.

ಮುಖಾಮುಖಿ: 5

ಪಂಜಾಬ್​: 2

ಲಖನೌ: 3

ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​.

https://www.vijayavani.net/kerala-cricket-association-bans-s-sreesanth-for-3-years-heres-the-reason