ಪ್ರೊ ಕಬಡ್ಡಿ ಲೀಗ್: ಬೆಂಗಳೂರು ಬುಲ್ಸ್​​ಗೆ ಮೊದಲ ಗೆಲುವಿನ ಸಂಭ್ರಮ

ವಿಶಾಖಪಟ್ಟಣ: ಆಲ್ರೌಂಡ್​ ನಿರ್ವಹಣೆ ತೋರಿದ ಬೆಂಗಳೂರು ಬುಲ್ಸ್​ ತಂಡ ಪ್ರೊ ಕಬಡ್ಡಿ ಲೀಗ್​ 12ನೇ ಆವೃತ್ತಿಯ ತನ್ನ 4ನೇ ಪಂದ್ಯದಲ್ಲಿ ಕೊನೆಗೂ ಗೆಲುವಿನ ಖಾತೆ ತೆರೆದಿದೆ. ಇರಾನ್​ ಆಟಗಾರ ಅಲಿರೆಜಾ ಮಿರ್ಜೈನ್​ (10) ಭರ್ಜರಿ ರೈಡಿಂಗ್​ ಬಲದಿಂದ ಬೆಂಗಳೂರು ಬುಲ್ಸ್​ ತಂಡ ಶನಿವಾರ ನಡೆದ ಕಾದಾಟದಲ್ಲಿ ಪಟನಾ ಪೈರೇಟ್ಸ್​ ಎದುರು 38-30 ಅಂಕಗಳಿಂದ ಗೆಲುವು ಸಾಧಿಸಿತು.

ವಿಶ್ವಾನಂದ್​ ಸ್ಪೋರ್ಟ್ಸ್​ ಕ್ಲಬ್​ನಲ್ಲಿ ನಡೆದ ದಿನದ ಮೊದಲ ಪಂದ್ಯದಲ್ಲಿ ಯೋಗೇಶ್​ ನಾಯಕತ್ವದಲ್ಲಿ ಕಣಕ್ಕಿಳಿದ ಬುಲ್ಸ್​, ಮೊದಲಾರ್ಧದಲ್ಲಿ 18-15ರಿಂದ ಮುನ್ನಡೆ ಸಾಧಿಸಿತು. ದ್ವಿತೀಯಾರ್ಧದಲ್ಲಿ ಪಟನಾ ಪ್ರತಿರೋಧ ತೋರಿದರೂ, ಬುಲ್ಸ್​ ಮೇಲುಗೈ ಕಾಯ್ದುಕೊಂಡಿತು.

ಆಶಿಶ್​ ಮಲಿಕ್​ (8) ಕೂಡ ರೈಡಿಂಗ್​ನಲ್ಲಿ ಮಿಂಚಿದರೆ, ಡಿಫೆಂಡಿಂಗ್​ನಲ್ಲಿ ದೀಪಕ್​ ಶಂಕರ್​ (4), ಯೋಗೇಶ್​ (3) ಗಮನಸೆಳೆದರು. ಪಟನಾ ಪರ ಅಯನ್​ (10), ಸುಧಾಕರ್​ (6) ಹೋರಾಟ ವ್ಯರ್ಥಗೊಂಡಿತು. ಬುಲ್ಸ್​ ಮೊದಲ 3 ಪಂದ್ಯಗಳಲ್ಲಿ ಸೋತಿದ್ದರೆ, ಪಟನಾಗೆ ಇದು ಹ್ಯಾಟ್ರಿಕ್​ ಸೋಲಾಗಿದೆ.

https://www.vijayavani.net/hardik-pandya-draws-attention-with-new-hairstyle-ahead-of-asia-cup