ನವದೆಹಲಿ: ಹಾಲಿ ವರ್ಷ ಏಷ್ಯನ್ ಗೇಮ್ಸ್ ಮತ್ತು ಕಾಮನ್ವೆಲ್ತ್ ಕಬಡ್ಡಿ ಚಾಂಪಿಯನ್ಷಿಪ್ನಿಂದಾಗಿ ಪ್ರೊ ಕಬಡ್ಡಿ ಲೀಗ್ ವಿಳಂಬಗೊಂಡಿದೆ ಎಂದೇ ಭಾವಿಸಲಾಗಿತ್ತು. ಆದರೆ ಇದೀಗ, ಹಾಲಿ ವರ್ಷ ಪ್ರೊ ಕಬಡ್ಡಿ ಲೀಗ್ ಟೂರ್ನಿಯೇ ನಡೆಯುವುದಿಲ್ಲ ಎಂಬ ಆಘಾತಕಾರಿ ಸುದ್ದಿ ಹೊರಬಿದ್ದಿದೆ. ಟೂರ್ನಿಯ ನೇರಪ್ರಸಾರ ಹಕ್ಕು ಸಮಸ್ಯೆಯಿಂದಾಗಿ ಹಾಲಿ ವರ್ಷದ ಟೂರ್ನಿ ಮುಂದೂಡಿಕೆಯಾಗಿದೆ ಎಂದು ವರದಿಯಾಗಿದೆ.
ಜಿಯೋಸ್ಟಾರ್ (ಹಿಂದಿನ ಸ್ಟಾರ್ ಇಂಡಿಯಾ) ಪ್ರೊ ಕಬಡ್ಡಿ ಲೀಗ್ ಟೂರ್ನಿಯ ಪ್ರಸಾರ ಹಕ್ಕು ಹೊಂದಿತ್ತು ಮತ್ತು ಕಳೆದ ವರ್ಷ ಇದರ ಅವಧಿ ಕೊನೆಗೊಂಡಿತ್ತು. 2021ರಲ್ಲಿ ಟೂರ್ನಿಯ 5 ವರ್ಷಗಳ ಪ್ರಸಾರ ಹಕ್ಕು 905 ಕೋಟಿ ರೂ.ಗಳಿಗೆ ಮಾರಾಟವಾಗಿತ್ತು. ಆದರೆ ಈ ಬಾರಿ ಪ್ರಸಾರ ಹಕ್ಕು ನವೀಕರಣಗೊಳಿಸಲು ಜಿಯೋಸ್ಟಾರ್ ಈ ಹಿಂದಿನ ಮೊತ್ತದ ಅರ್ಧದಷ್ಟನ್ನು ಮಾತ್ರ ನೀಡುವುದಾಗಿ ತಿಳಿಸಿತ್ತು. ಆದರೆ ಇದನ್ನು ಟೂರ್ನಿ ಸಂಟಿಸುವ ಮಾಷಲ್ ಸ್ಪೋರ್ಟ್ಸ್ ಸಂಸ್ಥೆ ಮತ್ತು ಎಲ್ಲ ತಂಡಗಳ ಮಾಲೀಕರು ಒಪ್ಪಿಕೊಂಡಿಲ್ಲ. ಇದರಿಂದ ಬಿಕ್ಕಟ್ಟು ಎದುರಾಗಿದ್ದು, ಇದನ್ನು ಬಗೆಹರಿಸಲು ಹೆಚ್ಚಿನ ಸಮಯ ಬೇಕಾಗಿದೆ. ಇದರಿಂದಾಗಿ ಟೂರ್ನಿಯನ್ನು 2027ರ ಜೂನ್ ತನಕ ಮುಂದೂಡಲು ನಿರ್ಧರಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಪ್ರೊ ಕಬಡ್ಡಿ ಲೀಗ್ 2014ರಲ್ಲಿ ಆರಂಭಗೊಂಡಿತ್ತು ಮತ್ತು ಇದುವರೆಗೆ 12 ಆವೃತ್ತಿಗಳು ನಡೆದಿವೆ. ಒಟ್ಟು 12 ತಂಡಗಳು ಟೂರ್ನಿಯಲ್ಲಿ ಆಡುತ್ತವೆ. ಮೊದಲ ಆವೃತ್ತಿಯಿಂದಲೂ ಸ್ಟಾರ್ ಸ್ಪೋರ್ಟ್ಸ್ ಟೂರ್ನಿಯ ಪಂದ್ಯಗಳ ನೇರಪ್ರಸಾರ ಮಾಡುತ್ತ ಬಂದಿದೆ.
