ಸೆಂಟರ್ ಕೋರ್ಟ್ನಲ್ಲಿ ಭಾನುವಾರ ನಡೆದ ಪ್ರಶಸ್ತಿ ಹಣಾಹಣಿಯಲ್ಲಿ ಆರಂಭಿಕ ಹಿನ್ನಡೆ ನಡುವೆಯೂ ತಿರುಗೇಟು ನೀಡಲು ಯಶಸ್ವಿಯಾದ ಜೋಕೊವಿಕ್ 6-7, 6-4, 6-4, 6-3 ಸೆಟ್ಗಳಿಂದ ಇಟಲಿ ಮ್ಯಾಟಿಯೊ ಬೆರೆಟಿನಿ ಎದುರು 3 ಗಂಟೆ 23 ನಿಮಿಷಗಳಲ್ಲಿ ಜಯ ದಾಖಲಿಸಿದರು. 30ನೇ ಗ್ರಾಂಡ್ ಸ್ಲಾಂ ಫೈನಲ್ ಆಡಿದ ಜೋಕೋ ಪ್ರಶಸ್ತಿ ಹಾದಿಗೆ ಇಟಲಿ ಆಟಗಾರ ಕಠಿಣ ಸವಾಲು ನೀಡಿದರು. ಮುಕ್ತ ಟೆನಿಸ್ ಯುಗದಲ್ಲಿ ಎಲ್ಲ 4 ಗ್ರಾಂಡ್ ಸ್ಲಾಂಗಳಲ್ಲಿ ಕನಿಷ್ಠ ತಲಾ 2 ಬಾರಿ ಪ್ರಶಸ್ತಿ ಜಯಿಸಿದ ವಿಶ್ವದ ಮೊದಲ ಆಟಗಾರ ಎನಿಸಿರುವ ಜೋಕೊವಿಕ್, ಎಂದಿನಂತೆ ಆರಂಭಿಕ ಹಿನ್ನಡೆ ನಡುವೆಯೂ ಎದುರಾಳಿ ಆಟಗಾರನಿಗೆ ತಿರುಗೇಟು ನೀಡಿದರು.ಮತ್ತೊಂದೆಡೆ, ವಿಂಬಲ್ಡನ್ ಫೈನಲ್ ಆಡಿದ ಇಟಲಿಯ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾದ ಬೆರೆಟಿನಿ 46 ವರ್ಷಗಳ ಬಳಿಕ ಇಟಲಿಗೆ ಗ್ರಾಂಡ್ ಸ್ಲಾಂ ಗೆದ್ದುಕೊಡುವ ಅಪರೂಪದ ಅವಕಾಶ ಕಳೆದುಕೊಂಡರು.
