ಕಿರಿಯರ ಟಿ20 ವಿಶ್ವಕಪ್​ನಲ್ಲಿ ಭಾರತ ತಂಡಕ್ಕೆ ಕನ್ನಡತಿ ನಿಕಿ ಪ್ರಸಾದ್​ ಸಾರಥ್ಯ

ಬೆಂಗಳೂರು: ಕನ್ನಡತಿ ನಿಕಿ ಪ್ರಸಾದ್​ ಮುಂದಿನ ವರ್ಷ ಜನವರಿ 18ರಿಂದ ಫೆಬ್ರವರಿ 2ರವರೆಗೆ ಮಲೇಷ್ಯಾದ ಕೌಲಾಲಂಪುರದಲ್ಲಿ ನಡೆಯಲಿರುವ 2ನೇ ಆವೃತ್ತಿಯ 19 ವಯೋಮಿತಿ ಮಹಿಳೆಯರ ಟಿ20 ವಿಶ್ವಕಪ್​ ಟೂರ್ನಿಯಲ್ಲಿ ಭಾರತ ತಂಡವನ್ನು ಮುನ್ನಡೆಸಲಿದ್ದಾರೆ. ಇತ್ತೀಚೆಗೆ ನಡೆದ 19 ವಯೋಮಿತಿ ಏಷ್ಯಾಕಪ್​ನಲ್ಲಿ ಭಾರತ, ನಿಕಿ ಸಾರಥ್ಯದಲ್ಲೇ ಚಾಂಪಿಯನ್​ ಪಟ್ಟವೇರಿತ್ತು. ಮಿಥಿಲಾ ವಿನೋದ್​ ತಂಡದಲ್ಲಿ ಸ್ಥಾನ ಪಡೆದಿರುವ ಮತ್ತೋರ್ವ ಕನ್ನಡತಿಯಾಗಿದ್ದಾರೆ.

ಕಿರಿಯರ ಏಷ್ಯಾಕಪ್​ ಗೆದ್ದ ಬಹುತೇಕ ತಂಡವನ್ನೇ ವಿಶ್ವಕಪ್​ಗೂ ಉಳಿಸಿಕೊಳ್ಳಲಾಗಿದ್ದು, 15 ವರ್ಷದ ವೇಗಿ ನಂದನಾ ಎಸ್​. ಬದಲಿಗೆ ವೈಷ್ಣವಿ ಎಸ್​. ಸೇರ್ಪಡೆಯೊಂದೇ ಏಕೈಕ ಬದಲಾವಣೆಯಾಗಿದೆ. ಸನಿಕಾ ಚಾಲ್ಕೆ ಉಪನಾಯಕಿಯಾಗಿದ್ದು, ಜಿ. ಕಮಲಿನಿ ಮತ್ತು ಭವಿಕಾ ಅಹಿರೆ ತಂಡದಲ್ಲಿರುವ ಇಬ್ಬರು ವಿಕೆಟ್​ ಕೀಪರ್​ಗಳಾಗಿದ್ದಾರೆ.

16 ತಂಡಗಳ ಟೂರ್ನಿಯಲ್ಲಿ 4 ಗುಂಪುಗಳಿದ್ದು, ಭಾರತ ತಂಡ ಆತಿಥೇಯ ಮಲೇಷ್ಯಾ, ವೆಸ್ಟ್​ ಇಂಡೀಸ್​ ಮತ್ತು ಶ್ರೀಲಂಕಾ ಜತೆಗೆ ಎ ಗುಂಪಿನಲ್ಲಿ ಸ್ಥಾನ ಪಡೆದಿದೆ. ಚೊಚ್ಚಲ ಆವೃತ್ತಿಯ ಚಾಂಪಿಯನ್​ ಭಾರತ ಈ ಬಾರಿ ಹಾಲಿ ಚಾಂಪಿಯನ್​ ಆಗಿ ಕಣಕ್ಕಿಳಿಯಲಿದ್ದು, ಜನವರಿ 19ರಂದು ಮೊದಲ ಪಂದ್ಯದಲ್ಲಿ ವಿಂಡೀಸ್​ ವಿರುದ್ಧ ಆಡಲಿದೆ.

ಭಾರತ ತಂಡ: ನಿಕಿ ಪ್ರಸಾದ್​ (ನಾಯಕಿ), ಸನಿಕಾ ಚಾಲ್ಕೆ (ಉಪನಾಯಕಿ), ಜಿ. ತ್ರಿಷಾ, ಕಮಲಿನಿ ಜಿ, ಭವಿಕಾ ಅಹಿರೆ, ಈಶ್ವರಿ ಅವಸರೆ, ಮಿಥಿಲಾ ವಿನೋದ್​, ಜೋಶಿತಾ ವಿಜೆ, ಸೋನಮ್​ ಯಾದವ್​, ಪುರಾಣಿಕಾ ಸಿಸೋಡಿಯಾ, ಕೇಸರ್​ ಧೃತಿ, ಆಯುಷಿ ಶುಕ್ಲಾ, ಆನಂದಿತಾ ಕಿಶೋರ್​, ಎಂಡಿ ಶಬ್ನಮ್​, ವೈಷ್ಣವಿ ಎಸ್​.

ಮೀಸಲು ಆಟಗಾರ್ತಿಯರು: ನಂದನಾ ಎಸ್​, ಇರಾ ಜೆ, ಆನಂದಿ ಟಿ.

https://www.vijayavani.net/throw-a-carom-ball-to-those-expecting-off-spin-pm-modis-letter-to-ashwin-after-his-retirement