ನ್ಯೂಜಿಲೆಂಡ್ ಪ್ರವಾಸದ ಟೆಸ್ಟ್ ಸರಣಿ; ಅಗ್ರಸ್ಥಾನ ಉಳಿಸಿಕೊಂಡ ಭಾರತ

ದುಬೈ: ನ್ಯೂಜಿಲೆಂಡ್ ಪ್ರವಾಸದ ಟೆಸ್ಟ್ ಸರಣಿಯ ಎರಡೂ ಪಂದ್ಯಗಳಲ್ಲಿ ಸೋಲು ಕಂಡ ನಡುವೆಯೂ ಭಾರತ ತಂಡ ಐಸಿಸಿ ಟೆಸ್ಟ್ ರ್ಯಾಂಕಿಂಗ್​ನಲ್ಲಿ ತನ್ನ ಅಗ್ರಸ್ಥಾನವನ್ನು ಉಳಿಸಿಕೊಳ್ಳುವಲ್ಲಿ ಯಶ ಕಂಡಿದೆ. ಭಾರತ ಒಟ್ಟು 116 ಅಂಕದೊಂದಿಗೆ ಅಗ್ರಸ್ಥಾನದಲ್ಲಿದ್ದರೆ, 2ನೇ ಸ್ಥಾನದಲ್ಲಿರುವ ನ್ಯೂಜಿಲೆಂಡ್​ಗಿಂತ 6 ಅಂಕಗಳ ಮುನ್ನಡೆಯಲ್ಲಿದೆ. 108 ಅಂಕಗಳೊಂದಿಗೆ ಆಸ್ಟ್ರೇಲಿಯಾ ಮೂರನೇ ಸ್ಥಾನದಲ್ಲಿದೆ.

ಕಿವೀಸ್ ಪ್ರವಾಸದ 0-2 ಸರಣಿ ಸೋಲು ವಿಶ್ವ ಟೆಸ್ಟ್ ಚಾಂಪಿಯನ್​ಷಿಪ್​ನಲ್ಲಿ ಭಾರತ ತಂಡದ ಮೊಟ್ಟಮೊದಲ ಸರಣಿ ಸೋಲು ಎನಿಸಿದೆ. ತೀರಾ ಕೆಟ್ಟ ನಿರ್ವಹಣೆ ತೋರಿದ ನಾಯಕ ವಿರಾಟ್ ಕೊಹ್ಲಿ, ಅದರ ನಡುವೆಯೂ ನಂ.2 ಸ್ಥಾನವನ್ನು ಉಳಿಸಿಕೊಳ್ಳುವಲ್ಲಿ ಯಶ ಕಂಡಿದ್ದಾರೆ.

ಟಾಮ್ ಬ್ಲಂಡೆಲ್ ಆಡಿದ ನಾಲ್ಕು ಇನಿಂಗ್ಸ್​ಗಳಿಂದ 117 ರನ್ ಬಾರಿಸಿದ್ದು, 1 ಅರ್ಧಶತಕವೂ ಸೇರಿದೆ. ಇದರಿಂದಾಗಿ ಅವರು 27 ಸ್ಥಾನ ಏರಿಕೆ ಕಂಡು 46ನೇ ಸ್ಥಾನದಲ್ಲಿದ್ದಾರೆ. 2018ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಸರಣಿಯಲ್ಲಿ ಪದಾರ್ಪಣೆ ಮಾಡಿದ ಬಳಿಕ ಇದೇ ಮೊದಲ ಬಾರಿಗೆ ಟೀಮ್ ಇಂಡಿಯಾ ಪರವಾಗಿ ಆಡಿದ ಪೃಥ್ವಿ ಷಾ, ಕ್ರೖೆಸ್ಟ್​ಚರ್ಚ್ ಟೆಸ್ಟ್ ಪಂದ್ಯದ ಮೊದಲ ಇನಿಂಗ್ಸ್​ನಲ್ಲಿ ಆಕರ್ಷಕ 54 ರನ್ ಸಿಡಿಸಿದ್ದರು. ಇದರಿಂದ 17 ಸ್ಥಾನ ಏರಿಕೆ ಕಂಡು 76ನೇ ಸ್ಥಾನ ಸಂಪಾದಿಸಿದ್ದಾರೆ.

ಸ್ಮಿತ್ ನಂ.1 ಬ್ಯಾಟ್ಸ್​ಮನ್: ಆಸ್ಟ್ರೇಲಿಯಾದ ಸ್ಟೀವನ್ ಸ್ಮಿತ್ ಅಗ್ರಸ್ಥಾನ ಕಾಯ್ದುಕೊಂಡಿದ್ದು, ಕೊಹ್ಲಿಗಿಂತ 25 ಅಂಕಗಳ ಮುನ್ನಡೆಯಲ್ಲಿ ದ್ದಾರೆ. ಸ್ಮಿತ್​ರ ಸಹ ಆಟಗಾರ ಮಾರ್ನಸ್ ಲಬುಶೇನ್, ಒಂದು ಸ್ಥಾನ ಏರಿಕೆಯೊಂದಿಗೆ 3ನೇ ಸ್ಥಾನ ಸಂಪಾದಿಸಿದ್ದಾರೆ. ಕಿವೀಸ್​ನ ನಾಯಕ ಕೇನ್ ವಿಲಿಯಮ್ಸನ್​ರ ಸ್ಥಾನವನ್ನು ಲಬುಶೇನ್ ಅಲಂಕರಿಸಿದ್ದಾರೆ.

ಅಗ್ರ 10ರಿಂದ ಮಯಾಂಕ್ ಔಟ್

ಟೆಸ್ಟ್ ಸರಣಿಯಲ್ಲಿ ಕೇವಲ 1 ಅರ್ಧಶತಕ ಬಾರಿಸಲು ಯಶ ಕಂಡಿದ್ದ ಕರ್ನಾಟಕದ ಬ್ಯಾಟ್ಸ್​ಮನ್ ಮಯಾಂಕ್ ಅಗರ್ವಾಲ್, ಒಂದು ಸ್ಥಾನ ಕುಸಿತ ಕಂಡು 11ನೇ ಸ್ಥಾನ ಪಡೆದಿದ್ದಾರೆ. ಆ ಮೂಲಕ ಅಗ್ರ 10 ಆಟಗಾರರ ಪಟ್ಟಿಯಿಂದ ಹೊರಬಿದ್ದಿದ್ದಾರೆ. ಇಂಗ್ಲೆಂಡ್ ಆಲ್ರೌಂಡರ್ ಬೆನ್ ಸ್ಟೋಕ್ಸ್, ಮಯಾಂಕ್​ರ ಸ್ಥಾನವನ್ನು ಪಡೆದಿದ್ದಾರೆ. ಪೂಜಾರ ಏಳನೇ ಸ್ಥಾನಕ್ಕೆ ಏರಿಕೆ ಕಂಡಿದ್ದಾರೆ.

ಜಸ್​ಪ್ರೀತ್​ಬುಮ್ರಾಗೆ 7ನೇ ಸ್ಥಾನ

ಬೌಲರ್​ಗಳ ಪಟ್ಟಿಯಲ್ಲಿ ಸರಣಿಶ್ರೇಷ್ಠ ಗೌರವ ಪಡೆದ ಟಿಮ್ ಸೌಥಿ, ಎರಡು ಸ್ಥಾನಗಳ ಏರಿಕೆಯೊಂದಿಗೆ 4ನೇ ಸ್ಥಾನ ಪಡೆದಿದ್ದರೆ, ಜಸ್​ಪ್ರೀತ್ ಬುಮ್ರಾ ಹಾಗೂ ಟ್ರೆಂಟ್ ಬೌಲ್ಟ್ ತಲಾ 4 ಸ್ಥಾನಗಳ ಏರಿಕೆ ಕಾಣುವ ಮೂಲಕ ಕ್ರಮವಾಗಿ 7 ಹಾಗೂ 9ನೇ ಸ್ಥಾನ ಪಡೆದಿದ್ದಾರೆ. ಕೈಲ್ ಜೇಮಿಸನ್ 80ನೇ ಸ್ಥಾನದಿಂದ 43ನೇ ಸ್ಥಾನಕ್ಕೆ ಏರಿದ್ದಾರೆ. ಬೌಲಿಂಗ್-ಬ್ಯಾಟಿಂಗ್​ನಲ್ಲಿ ಭಾರತವನ್ನು ಕಾಡಿದ ಜೇಮಿಸನ್ ಆಲ್ರೌಂಡರ್ಸ್ ರ್ಯಾಂಕಿಂಗ್​ನಲ್ಲಿ 26 ಸ್ಥಾನ ಏರಿಕೆಯೊಂದಿಗೆ 22ನೇ ಸ್ಥಾನ ಪಡೆದಿದ್ದಾರೆ.