ನವದೆಹಲಿ: ಜೀವನದಲ್ಲಿ ಕೆಲವೊಮ್ಮೆ ನಾವು ಅಂದುಕೊಂಡಂತೆ ಯಾವುದೂ ನಡೆಯುವುದಿಲ್ಲ. ಕಷ್ಟಗಳು ಎದುರಾದಾಗ ಎಲ್ಲವೂ ಮುಗಿಯಿತು ಎಂದನಿಸುತ್ತದೆ. ಆದರೆ ಕಠಿಣ ಪರಿಶ್ರಮ ಮತ್ತು ಛಲವಿದ್ದರೆ ಎಂತಹ ಕಷ್ಟವನ್ನೂ ಮೆಟ್ಟಿ ನಿಲ್ಲಬಹುದು ಎಂಬುದನ್ನು ಭಾರತದ ಹೆಮ್ಮೆಯ ಶೂಟರ್ ನೀರು ಧಾಂಡಾ (Neeru Dhanda) ನೈಜ ಉದಾಹರಣೆಯಾಗಿದ್ದಾರೆ. ಏಷ್ಯನ್ ಗೇಮ್ಸ್ ಆರಂಭವಾಗಲು ಕೇವಲ ಹತ್ತು ದಿನ ಬಾಕಿ ಇದ್ದಾಗ, ಆಸ್ಪತ್ರೆಯ ಬೆಡ್ ಮೇಲೆ ಮಲಗಿದ್ದ ಈಕೆ, ಇಂದು ದೇಶಕ್ಕೆ ಐತಿಹಾಸಿಕ ಚಿನ್ನದ ಪದಕ ತಂದುಕೊಟ್ಟಿದ್ದಾರೆ.
ಕೇವಲ ನೀರು ಕುಡಿದು ಬದುಕುಳಿದ ಧಾಂಡಾ!
ನವದೆಹಲಿಯಲ್ಲಿ ನಡೆದ ರಾಷ್ಟ್ರೀಯ ತರಬೇತಿ ಶಿಬಿರದ ಸಮಯದಲ್ಲಿ ನೀರು ಧಾಂಡಾ ಅವರಿಗೆ ತೀವ್ರ ಅನಾರೋಗ್ಯ ಉಂಟಾಯಿತು. ಸೋಂಕು ತಗುಲಿ ಅವರ ಆರೋಗ್ಯ ಸ್ಥಿತಿ ಎಷ್ಟು ಹದಗೆಟ್ಟಿತ್ತೆಂದರೆ, ಸುಮಾರು ಮೂರೂವರೆ ವಾರಗಳ ಕಾಲ ಅವರಿಗೆ ಯಾವುದೇ ತರಬೇತಿ ಪಡೆಯಲು ಸಾಧ್ಯವಾಗಲಿಲ್ಲ.
ಸತತ ಐದು ದಿನಗಳಂತೂ ಅವರು ಯಾವುದೇ ಆಹಾರವನ್ನೂ ಸೇವಿಸದೆ, ಕೇವಲ ನೀರನ್ನು ಮಾತ್ರ ಕುಡಿದು ಜೀವಂತವಿದ್ದರು. ನಂತರ, ಏಷ್ಯನ್ ಗೇಮ್ಸ್ ನಡೆಯುತ್ತಿರುವ ಜಪಾನ್ ದೇಶಕ್ಕೆ ಧಾಂಡಾ ತಲುಪುತ್ತಾರೋ ಇಲ್ಲವೋ? ಎಂಬ ಆತಂಕ ಎಲ್ಲರಲ್ಲಿ ಮೂಡಿತ್ತು. ಆದರೆ, ನೀರು ಧಾಂಡಾ ಈ ಎಲ್ಲಾ ಕಷ್ಟಗಳನ್ನು ಎದುರಿಸಿ, ಜಪಾನ್ಗೆ ತೆರಳಿ ಚಿನ್ನದ ಬೇಟೆಯಾಡಿದ್ದಾರೆ.
