ಖೇಲ್​ರತ್ನಕ್ಕೆ ನೀರಜ್, ವಿನೇಶ್ ಹೆಸರು ಶಿಫಾರಸು

ನವದೆಹಲಿ: ಜಾವೆಲಿನ್ ಎಸೆತಗಾರ ನೀರಜ್ ಚೋಪ್ರಾ ಮತ್ತು ಕುಸ್ತಿಪಟು ವಿನೇಶ್ ಪೋಗಟ್ ಹೆಸರನ್ನು ದೇಶದ ಅತ್ಯುನ್ನತ ಕ್ರೀಡಾ ಗೌರವವಾದ ಖೇಲ್​ರತ್ನ ಪ್ರಶಸ್ತಿಗೆ ಶಿಫಾರಸು ಮಾಡಲಾಗಿದೆ. ಇದರಿಂದ ಈ ವರ್ಷ ಖೇಲ್​ರತ್ನಕ್ಕೆ ಶಿಫಾರಸುಗೊಂಡ ಕ್ರೀಡಾಪಟುಗಳ ಸಂಖ್ಯೆ 4ಕ್ಕೇರಿದೆ. ಈ ಮುನ್ನ ಶೂಟರ್ ಅಂಜುಮ್ ಮೌದ್ಗಿಲ್ ಮತ್ತು ಕ್ರಿಕೆಟರ್ ರೋಹಿತ್ ಶರ್ಮ ಹೆಸರು ಶಿಫಾರಸುಗೊಂಡಿತ್ತು.

22 ವರ್ಷದ ನೀರಜ್ ಭಾರತೀಯ ಅಥ್ಲೆಟಿಕ್ಸ್ ಒಕ್ಕೂಟದಿಂದ (ಎಎಫ್​ಐ) ಸತತ 3ನೇ ವರ್ಷ ಖೇಲ್​ರತ್ನಕ್ಕೆ ಶಿಫಾರಸುಗೊಂಡಿದ್ದಾರೆ. 2018ರಲ್ಲಿ ಅವರಿಗೆ ಅರ್ಜುನ ಪ್ರಶಸ್ತಿಯ ಸಮಾಧಾನ ದೊರೆತಿದ್ದರೆ, ಕಳೆದ ವರ್ಷ ನಿರಾಸೆ ಅನುಭವಿಸಿದ್ದರು. 2018ರ ಕಾಮನ್ವೆಲ್ತ್ ಮತ್ತು ಏಷ್ಯನ್ ಗೇಮ್ಸ್​ನಲ್ಲಿ ನೀರಜ್ ಸ್ವರ್ಣ ಜಯಿಸಿದ್ದರು. ಅವರು ಈಗಾಗಲೆ ಟೋಕಿಯೊ ಒಲಿಂಪಿಕ್ಸ್​ಗೆ ಅರ್ಹತೆ ಗಳಿಸಿದ್ದಾರೆ. ಅಥ್ಲೆಟಿಕ್ಸ್ ಕ್ಷೇತ್ರದಿಂದ ಸ್ಪಿ ್ರಟರ್ ದ್ಯುತಿ ಚಂದ್ ಈಗಾಗಲೆ ಒಡಿಶಾ ಸರ್ಕಾರದಿಂದ ಅರ್ಜುನ ಪ್ರಶಸ್ತಿಗೆ ಶಿಫಾರಸುಗೊಂಡಿದ್ದಾರೆ. ಹೀಗಾಗಿ ಎಎಫ್​ಐನಿಂದ ಯಾವುದೆ ಅಥ್ಲೀಟ್ ಹೆಸರು ಅರ್ಜುನ ಪ್ರಶಸ್ತಿಗೆ ಶಿಫಾರಸುಗೊಂಡಿಲ್ಲ.

ಇದನ್ನೂ ಓದಿ: ಈ ವರ್ಷವೇ ಐಪಿಎಲ್ ನೋಡುವ ಆಸೆಯನ್ನು ಹೆಚ್ಚಿಸಿದೆ ಅನ್‌ಲಾಕ್!

ವಿನೇಶ್ ಸತತ 2ನೇ ವರ್ಷ ರೇಸ್​ನಲ್ಲಿ: ಕಾಮನ್ವೆಲ್ತ್-ಏಷ್ಯನ್ ಗೇಮ್್ಸ ಸ್ವರ್ಣ ವಿಜೇತೆ ವಿನೇಶ್ ಪೋಗಟ್ ಹೆಸರನ್ನು ಭಾರತೀಯ ಕುಸ್ತಿ ಒಕ್ಕೂಟ (ಡಬ್ಲ್ಯುಎಫ್​ಐ) ಸೋಮವಾರ ಖೇಲ್​ರತ್ನ ಪ್ರಶಸ್ತಿಗೆ ಶಿಫಾರಸು ಮಾಡಲು ನಿರ್ಧರಿಸಿದೆ. 25 ವರ್ಷದ ವಿನೇಶ್ ಸತತ 2ನೇ ವರ್ಷ ಈ ಪ್ರಶಸ್ತಿಗೆ ಶಿಫಾರಸುಗೊಂಡಿದ್ದಾರೆ. ಕಳೆದ ವರ್ಷ ಸಹ-ಪೈಲ್ವಾನ್ ಭಜರಂಗ್ ಪೂನಿಯಾಗೆ ಖೇಲ್​ರತ್ನ ಒಲಿದ ಕಾರಣ ವಿನೇಶ್ ನಿರಾಸೆ ಅನುಭವಿಸಿದ್ದರು. ಅವರು 2016ರಲ್ಲಿ ಅರ್ಜುನ ಪ್ರಶಸ್ತಿ ಪುರಸ್ಕೃತರಾಗಿದ್ದರು. 53 ಕೆಜಿ ವಿಭಾಗದಿಂದ ವಿನೇಶ್ ಈಗಾಗಲೆ ಟೋಕಿಯೊ ಒಲಿಂಪಿಕ್ಸ್ ಅರ್ಹತೆ ಸಂಪಾದಿಸಿದ್ದಾರೆ. ಕರೊನಾ ವೈರಸ್ ಹಾವಳಿಯಿಂದಾಗಿ ಈ ಬಾರಿ ಒಂದು ತಿಂಗಳು ತಡವಾಗಿ ರಾಷ್ಟ್ರೀಯ ಕ್ರೀಡಾ ಪ್ರಶಸ್ತಿ ಪ್ರಕ್ರಿಯೆ ಆರಂಭಗೊಂಡಿದ್ದು, ಶಿಫಾರಸುಗಳನ್ನು ಸಲ್ಲಿಸಲು ಜೂನ್ 3ರವರೆಗೆ ಗಡುವು ನೀಡಲಾಗಿದೆ. -ಪಿಟಿಐ

ಅರ್ಜುನ ಕೂಡ ಬೇಕೆಂದ ಸಾಕ್ಷಿ ಮಲಿಕ್: ಈಗಾಗಲೆ ಖೇಲ್​ರತ್ನ ಪುರಸ್ಕೃತರಾಗಿದ್ದರೂ ಅರ್ಜುನ ಪ್ರಶಸ್ತಿಯನ್ನೂ ಪಡೆವ ಆಸೆಯಿಂದ ವೇಟ್​ಲಿಫ್ಟರ್ ಮೀರಾಬಾಯಿ ಚಾನು ಹೆಸರು ಶಿಫಾರಸುಗೊಂಡಿರುವ ಬೆನ್ನಲ್ಲೇ, 2016ರ ಖೇಲ್​ರತ್ನ ಪುರಸ್ಕೃತೆ ಕುಸ್ತಿಪಟು ಸಾಕ್ಷಿ ಮಲಿಕ್ ಕೂಡ ತಮ್ಮ ಹೆಸರನ್ನು ಈ ಬಾರಿ ಅರ್ಜುನ ಪ್ರಶಸ್ತಿಗೆ ಶಿಫಾರಸು ಮಾಡುವಂತೆ ಡಬ್ಲ್ಯುಎಫ್​ಐಗೆ ಮನವಿ ಸಲ್ಲಿಸಿದ್ದಾರೆ. ರಿಯೋ ಒಲಿಂಪಿಕ್ಸ್ ಕಂಚು ವಿಜೇತೆ ಸಾಕ್ಷಿ ಅವರ ಇತ್ತೀಚೆಗಿನ ನಿರ್ವಹಣೆ ಉತ್ತಮವಾಗಿಲ್ಲ. ಹೀಗಾಗಿ ಡಬ್ಲ್ಯುಎಫ್​ಐ ಈ ಬಾರಿ ಅವರ ಹೆಸರನ್ನು ಶಿಫಾರಸು ಮಾಡುವುದೇ ಎಂಬುದನ್ನು ಕಾದುನೋಡಬೇಕಾಗಿದೆ. ‘ರಿಯೋ ಒಲಿಂಪಿಕ್ಸ್ ಬಳಿಕ ಸಾಕ್ಷಿ ಯಾವುದೇ ಸಾಧನೆ ಮಾಡಿಲ್ಲ. ರಿಯೋ ಪದಕಕ್ಕಾಗಿ ಅವರು ನೇರವಾಗಿ ಖೇಲ್​ರತ್ನ ಪಡೆದಿದ್ದಾರೆ. ಆದರೆ ಈಗ ಅರ್ಜುನವನ್ನೂ ಬಯಸಿದ್ದಾರೆ’ ಎಂದು ಡಬ್ಲ್ಯುಎಫ್​ಐ ಮೂಲಗಳು ತಿಳಿಸಿವೆ. ಸಾಕ್ಷಿಗಿಂತ ಯುವ ಪೈಲ್ವಾನರಾದ ದೀಪಕ್ ಪೂನಿಯಾ ಮತ್ತು ರಾಹುಲ್ ಅವಾರೆ ಹೆಸರುಗಳು ಅರ್ಜುನಕ್ಕೆ ಶಿಫಾರಸುಗೊಳ್ಳುವ ಸಾಧ್ಯತೆ ಹೆಚ್ಚಿದೆ.