ಗಾಯದ ಸಮಸ್ಯೆ ನಡುವೆ ಆಗಸ್ಟ್​ 22ಕ್ಕೆ ಡೈಮಂಡ್​ ಲೀಗ್​ನಲ್ಲಿ ನೀರಜ್​ ಚೋಪ್ರಾ ಮರಳಿ ಕಣಕ್ಕೆ; ಶಸ್ತ್ರಚಿಕಿತ್ಸೆ ಮುಂದೂಡಿಕೆ...

ನವದೆಹಲಿ: ಪ್ಯಾರಿಸ್​ ಒಲಿಂಪಿಕ್ಸ್​ನಲ್ಲಿ ಚಿನ್ನದ ಪದಕ ಉಳಿಸಿಕೊಳ್ಳಲು ವಿಫಲರಾದ ಮತ್ತು ದೀರ್ಕಾಲದಿಂದ ತೊಡೆಸಂದು ಗಾಯಕ್ಕೆ ಶುಶ್ರೂಷೆ ಪಡೆಯುತ್ತಿರುವ ನಡುವೆಯೂ ನೀರಜ್​ ಚೋಪ್ರಾ, ಆಗಸ್ಟ್​ 22ರಿಂದ ನಡೆಯಲಿರುವ ಲೌಸನ್ನೆ ಡೈಮಂಡ್​ ಲೀಗ್​ನಲ್ಲಿ ಮರಳಿ ಕಣಕ್ಕಿಳಿಯಲು ನಿರ್ಧರಿಸಿದ್ದಾರೆ. ಇದೇ ವೇಳೆ, ದೀರ್ಘಕಾಲದಿಂದ ಚರ್ಚೆಯಲ್ಲಿ 90 ಮೀಟರ್​ ಎಸೆತವನ್ನು ದೇವರಿಗೆ ಬಿಟ್ಟಿದ್ದೇನೆ ಎಂದು ನೀರಜ್​ ಹೇಳಿದ್ದಾರೆ.

ಪ್ಯಾರಿಸ್​ನಲ್ಲಿ ಒಂದು ಮಾತ್ರ ಕ್ರಮಬದ್ಧ ಎಸೆತ ಎಸೆದಿದ್ದ 26 ವರ್ಷದ ನೀರಜ್​, 89.45 ಮೀ. ಎಸೆತದೊಂದಿಗೆ ರಜತ ಪದಕಕ್ಕೆ ತೃಪ್ತಿಪಟ್ಟಿದ್ದರು. ಜತೆಗೆ 90 ಮೀ. ಗಡಿ ದಾಟುವ ನಿರೀಕ್ಷೆ ಹುಸಿಯಾಗಿಸಿದ್ದರು. 92.97 ಮೀ. ಎಸೆದ ಪಾಕಿಸ್ತಾನದ ಅರ್ಷದ್​ ನದೀಂ ಚಿನ್ನದ ಪದಕ ಒಲಿಸಿಕೊಂಡಿದ್ದರು.

ಆಗಸ್ಟ್​ 8ರಂದು ಪ್ಯಾರಿಸ್​ ಒಲಿಂಪಿಕ್ಸ್​ ಫೈನಲ್​ನಲ್ಲಿ ಸ್ಪರ್ಧಿಸಿದ ಬಳಿಕ ಸ್ವಿರ್ಜಲೆಂಡ್​ಗೆ ತೆರಳಿದ್ದ ನೀರಜ್​, ಈಗಾಗಲೆ ಅಭ್ಯಾಸ ಆರಂಭಿಸಿದ್ದು, ಗಾಯದ ಸಮಸ್ಯೆಯ ನಡುವೆ ಹಾಲಿ ಋತುವಿನ ಉಳಿದ ಸ್ಪರ್ಧೆಗಳಲ್ಲಿ ಭಾಗವಹಿಸಲು ಸಿದ್ಧರಾಗಿದ್ದಾರೆ.

ಸೆಪ್ಟೆಂಬರ್​ 13&14ರಂದು ಬ್ರಸೆಲ್ಸ್​ನಲ್ಲಿ ಹಾಲಿ ಋತುವಿನ ಕೊನೆಯ ಡೈಮಂಡ್​ ಲೀಗ್​ನಲ್ಲಿ ಭಾಗವಹಿಸಿದ ಬಳಿಕ ನೀರಜ್​, ತೊಡೆಸಂದು ಗಾಯಕ್ಕೆ ವೈದ್ಯರನ್ನು ಭೇಟಿಯಾಗಲಿದ್ದು, ಶಸ್ತ್ರಚಿಕಿತ್ಸೆಗೆ ಒಳಗಾಗುವ ದಿನಾಂಕದ ಬಗ್ಗೆ ನಿರ್ಧರಿಸಲಿದ್ದಾರೆ. ಕಳೆದ ವರ್ಷದ ವಿಶ್ವ ಚಾಂಪಿಯನ್​ಷಿಪ್​ನಲ್ಲಿ ಸ್ವರ್ಣ ಪದಕ ಗೆದ್ದ ಸಮಯದಿಂದಲೂ ನೀರಜ್​, ತೊಡೆಸಂದು ಗಾಯದಿಂದ ಬಳಲುತ್ತಿದ್ದಾರೆ. ಬ್ರಸೆಲ್ಸ್​ನಲ್ಲಿ ನಡೆಯುವ ಫೈನಲ್ಸ್​ಗೆ ಅರ್ಹತೆ ಪಡೆಯಬೇಕಾದರೆ ನೀರಜ್​ ಡೈಮಂಡ್​ ಲೀಗ್​ ಚರಣಗಳ ಅಗ್ರ 6ರಲ್ಲಿ ಸ್ಥಾನ ಸಂಪಾದಿಸಬೇಕಿದೆ.

*ನನಗೀಗ ಜಾವೆಲಿನ್​ ಎಸೆತದ ಅಂತರ ವೃದ್ಧಿಸಲು ಸಾಧ್ಯವಾಗುತ್ತಿಲ್ಲ. ಅದಕ್ಕೆ ನಾನು ಗಾಯದಿಂದ ಸಂಪೂರ್ಣ ಮುಕ್ತನಾಗಿರಬೇಕಾಗುತ್ತದೆ. ಈಗ ನಾನು ಶೇ. 100 ನಿರ್ವಹಣೆ ತೋರಬೇಕು ಎಂದು ಮನಸ್ಸಿನಲ್ಲಿ ಅಂದುಕೊಂಡರೂ, ಗಾಯದಿಂದಾಗಿ ಮೈದಾನದಲ್ಲಿ ಅದು ಸಾಧ್ಯವಾಗುತ್ತಿಲ್ಲ. ನನ್ನ ದೇಹ ಮತ್ತು ಮನಸ್ಸು ಹೆಚ್ಚುವರಿ ಪ್ರಯತ್ನ ಹಾಕುವುದನ್ನು ತಡೆಯುತ್ತಿದೆ.

| ನೀರಜ್​ ಚೋಪ್ರಾ

https://www.vijayavani.net/first-win-for-mangalore-dragons-in-maharaja-trophy