ನಡಾಲ್, ಸೆರೇನಾಗೆ ಸುಲಭ ಹಾದಿ

ಮೆಲ್ಬೋರ್ನ್: ವಿಶ್ವ ನಂ.1 ಆಟಗಾರ ಸ್ಪೇನ್​ನ ರಾಫೆಲ್ ನಡಾಲ್ ವರ್ಷದ ಮೊದಲ ಗ್ರಾಂಡ್ ಸ್ಲಾಂ ಆಸ್ಟ್ರೇಲಿಯನ್ ಓಪನ್ ಟೆನಿಸ್ ಟೂರ್ನಿಯ ಪ್ರಥಮ ಸುತ್ತಿನಲ್ಲಿ ಬೊಲಿವಿಯಾದ ಹುಗೋ ಡೆಲ್ಲಿಯನ್​ರನ್ನು ಎದುರಿಸಲಿದ್ದಾರೆ. 2009ರಲ್ಲಿ ಒಮ್ಮೆ ಮಾತ್ರವೇ ಈ ಪ್ರಶಸ್ತಿ ಗೆದ್ದಿರುವ ನಡಾಲ್, 4ನೇ ಸುತ್ತಿನಲ್ಲಿ ಆಸ್ಟ್ರೇಲಿಯಾದ ನಿಕ್ ರ್ಕಿಗಿಯೋಸ್​ರ ಕಠಿಣ ಸವಾಲನ್ನು ಎದುರಿಸಲಿದ್ದಾರೆ. ಹಾಲಿ ಚಾಂಪಿಯನ್ ನೊವಾಕ್ ಜೋಕೊವಿಕ್, ಜಾನ್ ಲೀನಾರ್ಡ್ ಸ್ಟ್ರಫ್​ರನ್ನು ಮೊದಲ ಸುತ್ತಿನಲ್ಲಿ ಎದುರಿಸುವ ಮೂಲಕ ದಾಖಲೆಯ 8ನೇ ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿಯ ಅಭಿಯಾನ ಆರಂಭಿಸಲಿದ್ದಾರೆ. 38 ವರ್ಷದ ಫೆಡರರ್, ಅಮೆರಿಕದ ಸ್ಟೀವ್ ಜಾನ್ಸನ್ ವಿರುದ್ಧ ಆಡುವ ಮೂಲಕ 7ನೇ ಪ್ರಶಸ್ತಿಯ ಅಭಿಯಾನ ಆರಂಭಿ ಸಲಿದ್ದಾರೆ. ಸೆಮಿಫೈನಲ್​ನಲ್ಲಿ ಜೋಕೋರನ್ನು ಎದುರಿಸುವ ಸವಾಲು ಇವರ ಮುಂದಿದೆ.

ಸೆರೇನಾಗೆ ಒಸಾಕ 8ರ ಘಟ್ಟದ ಎದುರಾಳಿ: ಮಾರ್ಗರೇಟ್ ಕೋರ್ಟ್​ರ 24 ಗ್ರಾಂಡ್ ಸ್ಲಾಂ ಜಯದ ದಾಖಲೆ ಸರಿಗಟ್ಟುವ ಹಂಬಲದಲ್ಲಿರುವ ಸೆರೇನಾ ವಿಲಿಯಮ್್ಸ, ಹಾಲಿ ಚಾಂಪಿಯನ್ ಜಪಾನ್​ನ ನವೋಮಿ ಒಸಾಕರನ್ನು 8ರ ಘಟ್ಟದ ಎದುರಿಸುವ ಸವಾಲು ಪಡೆದುಕೊಂಡಿದ್ದಾರೆ. ವಿಶ್ವ ನಂ.1 ಆಶ್ಲೆಗ್ ಬಾರ್ಟಿ ಮೊದಲ ಸುತ್ತಿನಲ್ಲಿ ಉಕ್ರೇನ್​ನ ಲೇಸಿಯಾ ಸುರೆಂಕೋರನ್ನು ಎದುರಿಸಲಿದ್ದಾರೆ.

ಪ್ರಧಾನ ಸುತ್ತಿನ ಸನಿಹ ಪ್ರಜ್ಞೇಶ್: ಭಾರತದ ಪ್ರಜ್ಞೇಶ್ ಗುಣೇಶ್ವರನ್ ಅರ್ಹತಾ ಸುತ್ತಿನಲ್ಲಿ 3ನೇ ಹಾಗೂ ಅಂತಿಮ ಸುತ್ತಿಗೇರಿದ್ದು, ಪ್ರಧಾನ ಸುತ್ತಿನಲ್ಲಿ ಆಡುವ ಸನಿಹ ತಲುಪಿದ್ದಾರೆ.