ಹಾಕಿ ಕೂರ್ಗ್, ಬಳ್ಳಾರಿ ತಂಡಗಳ ಶುಭಾರಂಭ: ಮಿನಿ ಒಲಿಂಪಿಕ್ ಕ್ರೀಡಾಕೂಟ | ಹಾಕಿ, ಫುಟ್​ಬಾಲ್, ವಾಲಿಬಾಲ್ ಸ್ಪರ್ಧೆ ಆರಂಭ

ಬೆಂಗಳೂರು: ಹಾಕಿ ಬಳ್ಳಾರಿ ಹಾಗೂ ಹಾಕಿ ಕೂರ್ಗ್ ಬಾಲಕರ ತಂಡಗಳು ಮಿನಿ ಒಲಿಂಪಿಕ್ ಕ್ರೀಡಾಕೂಟದ ಬಾಲಕರ ವಿಭಾಗದಲ್ಲಿ ಶುಭಾರಂಭ ಕಂಡಿವೆ. ಕೆಎಂ ಕಾರ್ಯಪ್ಪ ಹಾಕಿ ಸ್ಟೇಡಿಯಂನಲ್ಲಿ ಸೋಮವಾರ ಆರಂಭಗೊಂಡ ಕ್ರೀಡಾಕೂಟದ ಮೊದಲ ದಿನದ ಹಾಕಿ ಪಂದ್ಯಗಳಲ್ಲಿ ಹಾಕಿ ಬಳ್ಳಾರಿ ತಂಡ 12-0 ಗೋಲುಗಳಿಂದ ಹಾಕಿ ಗದಗ ತಂಡವನ್ನು ಸೋಲಿಸಿತು. ವಿಜಯಿ ತಂಡದ ಪರ ಕುರಾಪತಿ ರಮೇಶ್ 5 ಗೋಲು, ಕಿರಣ್ ರೆಡ್ಡಿ 4 ಗೋಲು ಗಳಿಸಿದರೆ, ಆಕಾಶ್ ಪಿಲ್ಲಾ, ಪುನೀತ್, ಮಣಿಕಂಠ ಸ್ವಾಮಿ ತಲಾ ಒಂದು ಗೋಲುಗಳಿಸಿದರು. ದಿನದ ಮತ್ತೊಂದು ಪಂದ್ಯದಲ್ಲಿ ಹಾಕಿ ಕೂರ್ಗ್ ಬಾಲಕರ ತಂಡ 16-0 ಗೋಲುಗಳಿಂದ ಹಾಕಿ ಕಲಬುರಗಿ ತಂಡವನ್ನು ಮಣಿಸಿತು. ಕುಶಾಲ್ ಬೋಪಯ್ಯ 5 ಗೋಲು, ಧ್ರುವ ಬಿಎಸ್ 3 ಗೋಲು, ವಚನ್ ಕಾಳಪ್ಪ, ಅಖಿಲ್ ಅಯ್ಯಪ್ಪ ತಲಾ 2 ಗೋಲು ಬಾರಿಸಿದರೆ, ಅಕಾಶ್ ಬಿದ್ದಪ್ಪ ಸಿಜಿ , ಚಿನ್ನಪ್ಪ ಕೆಎಸ್, ಚೆಂಗಪ್ಪ ಬಿಕೆ, ಹರ್ಷಿತ್ ಕುಮಾರ್ ತಲಾ ಒಂದು ಗೋಲುಗಳಿಸಿದರು.

ಬೆಳಗಾವಿ ತಂಡಕ್ಕೆ ಗೆಲುವು: ಕಂಠೀರವ ಸ್ಟೇಡಿಯಂನಲ್ಲಿ ನಡೆದ ಬಾಲಕರ ವಿಭಾಗದ ಫುಟ್​ಬಾಲ್ ಪಂದ್ಯದಲ್ಲಿ ಬೆಂಗಳೂರು ತಂಡ 6-0ಯಿಂದ ಉತ್ತರ ಕನ್ನಡ ತಂಡವನ್ನು ಸೋಲಿಸಿದರೆ, ಬೆಳಗಾವಿ ತಂಡ 5-0ಯಿಂದ ಮೈಸೂರು ವಿರುದ್ಧ, ದಕ್ಷಿಣ ಕನ್ನಡ ತಂಡ 3-0 ಗೋಲುಗಳಿಂದ ರಾಯಚೂರು ಬಾಯ್್ಸ ತಂಡವನ್ನು ಸೋಲಿಸಿತು.

ಶಿವಮೊಗ್ಗ, ಹಾಸನ ತಂಡಗಳಿಗೆ ಜಯ: ಬಾಲಕರ ವಿಭಾಗದ ವಾಲಿಬಾಲ್ ಪಂದ್ಯಗಳಲ್ಲಿ ಶಿವಮೊಗ್ಗ, ಬೆಂಗಳೂರು ನಗರ, ಹಾಸನ ಹಾಗೂ ತುಮಕೂರು ತಂಡಗಳು ಶುಭಾರಂಭ ಕಂಡರೆ, ಬಾಲಕಿಯರ ವಿಭಾಗದಲ್ಲಿ ದಕ್ಷಿಣ ಕನ್ನಡ, ಬೆಂಗಳೂರು ಸಿಟಿ, ಕೊಪ್ಪಳ, ತುಮಕೂರು ತಂಡಗಳು ಮುನ್ನಡೆ ಸಾಧಿಸಿದವು. ವಿದ್ಯಾನಗರ ಕ್ರೀಡಾ ಸಂಕೀರ್ಣದಲ್ಲಿ ನಡೆದ ನೆಟ್​ಬಾಲ್ ಸ್ಪರ್ಧೆಯ ಬಾಲಕರ ವಿಭಾಗದಲ್ಲಿ ಮೈಸೂರು ಬಾಲಕರ ತಂಡ 6-1 ಅಂಕಗಳಿಂದ ತುಮಕೂರು ತಂಡವನ್ನು ಸೋಲಿಸಿದರೆ, ಚಿತ್ರದುರ್ಗ ಬಾಲಕರ ತಂಡ 13-6ರಿಂದ ಹಾಸನ ಬಾಲಕರ ತಂಡವನ್ನು ಮಣಿಸಿತು.