ಗ್ರ್ಯಾಂಡ್ ಸ್ಲಾಂ ಆಸ್ಟ್ರೇಲಿಯನ್ ಓಪನ್​ಗೆ ಶರಪೋವಾಗೆ ವೈಲ್ಡ್​ಕಾರ್ಡ್

ಮೆಲ್ಬೋರ್ನ್: ಐದು ಬಾರಿಯ ಗ್ರ್ಯಾಂಡ್ ಸ್ಲಾಂ ಚಾಂಪಿಯನ್ ರಷ್ಯಾದ ಮರಿಯಾ ಶರಪೋವಾಗೆ 2020ರ ವರ್ಷದ ಮೊದಲ ಗ್ರ್ಯಾಂಡ್ ಸ್ಲಾಂ ಆಸ್ಟ್ರೇಲಿಯನ್ ಓಪನ್​ಗೆ ವೈಲ್ಡ್​ಕಾರ್ಡ್ ಪ್ರವೇಶ ನೀಡಲಾಗಿದೆ. ಉದ್ದೀಪನ ಪ್ರಕರಣದಲ್ಲಿ ನಿಷೇಧ ಶಿಕ್ಷೆಗೆ ಒಳಗಾದ ಬಳಿಕ, 2019ರ ವರ್ಷವಿಡೀ ಗಾಯದಿಂದಲೇ ಅವರು ಹಿನ್ನಡೆ ಕಂಡಿದ್ದರು.

2008ರಲ್ಲಿ ಆಸ್ಟ್ರೇಲಿಯನ್ ಓಪನ್ ಜಯಿಸಿದ್ದ 32 ವರ್ಷದ ತಾರೆ, ಪ್ರಸ್ತುತ ವಿಶ್ವ ರಾಂಕಿಂಗ್​ನಲ್ಲಿ 147ನೇ ಸ್ಥಾನದಲ್ಲಿದ್ದು, ನೇರವಾಗಿ ಅರ್ಹತೆ ಪಡೆದುಕೊಳ್ಳಲು ವಿಫಲರಾಗಿದ್ದಾರೆ. ಅದಲ್ಲದೆ, ಬ್ರಿಸ್ಬೇನ್ ಇಂಟರ್​ನ್ಯಾಷನಲ್ ಟೂರ್ನಿಯಲ್ಲೂ ಮೊದಲ ಸುತ್ತಿನಲ್ಲಿಯೇ ಸೋಲು ಕಂಡಿದ್ದರು.

ಆದರೆ, ಆಸ್ಟ್ರೇಲಿಯನ್ ಓಪನ್ ಕಣದಲ್ಲಿ ಶರಪೋವಾ ದೊಡ್ಡ ಹೆಸರಾಗಿರುವ ಕಾರಣ, ವೈಲ್ಡ್ ಕಾರ್ಡ್ ನೀಡಲಾಗಿದ್ದು, 2003 ಪದಾರ್ಪಣೆ ವರ್ಷದಿಂದ ಇಲ್ಲಿವರೆಗೆ 16 ಟೂರ್ನಿಗಳಲ್ಲಿ ಅವರು ಸ್ಪರ್ಧೆ ಮಾಡಿದಂತಾಗುತ್ತದೆ. ‘ಆಸ್ಟ್ರೇಲಿಯನ್ ಓಪನ್​ನ ಡ್ರಾದಲ್ಲಿ ಸ್ಥಾನ ಪಡೆಯುವುದು ನಿಜಕ್ಕೂ ಹೆಮ್ಮೆಯ ವಿಚಾರ. ಇಲ್ಲಿ ನಾನು ಅದ್ಭುತ ಅನುಭವಗಳನ್ನು ಪಡೆದಿದ್ದೇನೆ’ ಎಂದು ಶರಪೋವಾ ಹೇಳಿದ್ದಾರೆ.