2026ರ ಕಾಮನ್ವೆಲ್ತ್​ ಗೇಮ್ಸ್​ನಿಂದ ಪ್ರಮುಖ ಕ್ರೀಡೆಗಳು ಹೊರಕ್ಕೆ; ಕಾರಣವೇನು? ಭಾರತಕ್ಕೆ ಎಷ್ಟು ನಷ್ಟ?

ಲಂಡನ್​: ಮುಂಬರುವ 2026ರ ಗ್ಲಾಸ್ಗೋ ಕಾಮನ್ವೆಲ್ತ್​ ಗೇಮ್ಸ್​ನಿಂದ ಹಾಕಿ, ಬ್ಯಾಡ್ಮಿಂಟನ್​, ಕುಸ್ತಿ, ಕ್ರಿಕೆಟ್​, ಟೇಬಲ್​ ಟೆನಿಸ್​ ಸಹಿತ ಪ್ರಮುಖ ಕ್ರೀಡೆಗಳನ್ನು ಕೈಬಿಡಲಾಗಿದ್ದು, ಕೇವಲ 10 ಕ್ರೀಡೆಗಳಲ್ಲಿ ಪದಕ ಸ್ಪರ್ಧೆಗಳು ನಡೆಯಲಿವೆ. ಇದು ಕ್ರೀಡಾಕೂಟದಲ್ಲಿ ಭಾರತದ ಪದಕ ಬೇಟೆಗೆ ಬಹುದೊಡ್ಡ ಹೊಡೆತ ನೀಡಲಿದೆ. ಈ ಬೆಳವಣಿಗೆಯ ಬಗ್ಗೆ ಭಾರತೀಯ ಕ್ರೀಡಾ ವಲಯ ಭಾರಿ ನಿರಾಸೆಯನ್ನೂ ವ್ಯಕ್ತಪಡಿಸಿವೆ.

2022ರ ರ್ಬಮಿಂಗ್​ಹ್ಯಾಂ ಗೇಮ್ಸ್​ನಲ್ಲೇ ಶೂಟಿಂಗ್​ ಸ್ಪರ್ಧೆ ಇಲ್ಲದ ಕಾರಣ ಭಾರತದ ಪದಕ ಬೇಟೆಗೆ ಹೊಡೆತ ಬಿದ್ದಿತ್ತು. ಇದೀಗ ಭಾರತ ಪ್ರಬಲವಾಗಿರುವ ಕ್ರೀಡೆಗಳೇ ಹೊರಬಿದ್ದಿರುವುದರಿಂದ 2026ರಲ್ಲಿ ಭಾರತ ಇನ್ನಷ್ಟು ಹಿನ್ನಡೆ ಅನುಭವಿಸಲಿದೆ.

2022ರಲ್ಲಿ 19 ಕ್ರೀಡೆಗಳಲ್ಲಿ ಸ್ಪರ್ಧೆ ನಡೆದಿದ್ದರೆ, ಈ ಬಾರಿ 9 ಕ್ರೀಡೆಗಳನ್ನು ಕೈಬಿಡಲಾಗಿದೆ. ಗ್ಲಾಸ್ಗೋದಲ್ಲಿ 4 ತಾಣಗಳಲ್ಲಿ ಸಂಪೂರ್ಣ ಕ್ರೀಡಾಕೂಟ ಆಯೋಜನೆಗೊಳ್ಳಲಿದೆ. ವೆಚ್ಚ ತಗ್ಗಿಸುವ ಕ್ರಮದ ಜತೆಗೆ ಬಹುಕ್ರೀಡಾ ಸ್ಪರ್ಧೆಗಳ ಕೂಟವಾಗಿ ಮುಂದುವರಿಯುವ ಉದ್ದೇಶದಿಂದ 10 ಕ್ರೀಡೆಗಳಲ್ಲಿ ಸ್ಪರ್ಧೆಗಳು ನಡೆಯಲಿವೆ ಎಂದು ಕಾಮನ್ವೆಲ್ತ್​ ಗೇಮ್ಸ್​ ಒಕ್ಕೂಟ (ಸಿಜಿಎಫ್​ ) ತಿಳಿಸಿದೆ.

2026ರ ಜುಲೈ 23ರಿಂದ ಆಗಸ್ಟ್​ 2ರವರೆಗೆ 23ನೇ ಆವೃತ್ತಿಯ ಕಾಮನ್ವೆಲ್ತ್​ ಗೇಮ್ಸ್​ ನಡೆಯಲಿದೆ. ಗ್ಲಾಸ್ಗೋ ಈ ಮುನ್ನ 2014ರ ಗೇಮ್ಸ್​ಗೂ ಆತಿಥ್ಯ ವಹಿಸಿತ್ತು. ಆಗ ನಿರ್ಮಿಸಲಾಗಿದ್ದ 4 ತಾಣಗಳಲ್ಲೇ ಈ ಸಲವೂ ಸ್ಪರ್ಧೆ ನಡೆಯಲಿವೆ. ಕ್ರೀಡಾಗ್ರಾಮಕ್ಕೆ ಬದಲಾಗಿ ಕ್ರೀಡಾಪಟುಗಳು ಮತ್ತು ಇತರ ಸಿಬ್ಬಂದಿ, ಅಧಿಕಾರಿಗಳಿಗೆ ಹೋಟೆಲ್​ನಲ್ಲಿ ವಸತಿ ವ್ಯವಸ್ಥೆ ಮಾಡಲಾಗುತ್ತದೆ ಎಂದು ಸಿಜಿಎಫ್​​ ತಿಳಿಸಿದೆ.

2014ರ ಆವೃತ್ತಿಯಲ್ಲಿ ಬ್ಯಾಡ್ಮಿಂಟನ್​ ಸ್ಪರ್ಧೆ ಆಯೋಜಿಸಿದ್ದ ಎಮಿರೇಟ್ಸ್​ ಅರೇನಾದಲ್ಲಿ ಈ ಬಾರಿ ಸೈಕ್ಲಿಂಗ್​ ಸ್ಪರ್ಧೆಗಳಷ್ಟೇ ನಡೆಯಲಿವೆ. 2026ರ ಆಗಸ್ಟ್​ 15ರಿಂದ 30ರವರೆಗೆ ಬೆಲ್ಜಿಯಂ-ನೆದರ್ಲೆಂಡ್​ನಲ್ಲಿ ಹಾಕಿ ವಿಶ್ವಕಪ್​ ನಿಗದಿಯಾಗಿದೆ. ಹೀಗಾಗಿ ಎರಡೂ ಸ್ಪರ್ಧೆಗಳ ನಡುವಿನ ಸಂರ್ಷ ತಪ್ಪಿಸುವ ಸಲುವಾಗಿಯೂ ಹಾಕಿ ಸ್ಪರ್ಧೆಯನ್ನು ಕೈಬಿಡಲಾಗಿದೆ.

6 ಕ್ರೀಡೆಗಳ ಪ್ಯಾರಾ ವಿಭಾಗದಲ್ಲೂ ಸ್ಪರ್ಧೆಗಳು ನಡೆಯಲಿರುವುದು ಭಾರತಕ್ಕೆ ಸಮಾಧಾಕರ ಅಂಶವಾಗಿದೆ. ಇತ್ತೀಚೆಗೆ ಪ್ಯಾರಿಸ್​ ಪ್ಯಾರಾಲಿಂಪಿಕ್ಸ್​ನಲ್ಲಿ ಭಾರತ 7 ಚಿನ್ನ ಸಹಿತ 29 ಪದಕ ಗೆದ್ದಿರುವುದು ಕಾಮನ್ವೆಲ್ತ್​ನಲ್ಲೂ ಉತ್ತಮ ಸಾಧನೆಯ ನಿರೀೆ ಮೂಡಿಸಿದೆ.

ಗೇಮ್ಸ್​ನಲ್ಲಿ ಉಳಿದುಕೊಂಡಿರುವ ಕ್ರೀಡೆಗಳ ಪೈಕಿ ಅಥ್ಲೆಟಿಕ್ಸ್​, ಬಾಕ್ಸಿಂಗ್​, ವೇಯ್ಟ್​ಲಿಫ್ಟಿಂಗ್​, ಜುಡೋ ಮಾತ್ರ ಭಾರತ ಪದಕ ನಿರೀೆ ಇಡಬಹುದಾದ ಪ್ರಮುಖ ಸ್ಪರ್ಧೆಗಳಾಗಿವೆ.

ಹೊರಬಿದ್ದ ಕ್ರೀಡೆಗಳು

ಹಾಕಿ, ಬ್ಯಾಡ್ಮಿಂಟನ್​, ಕುಸ್ತಿ, ಕ್ರಿಕೆಟ್​, ಟೇಬಲ್​ ಟೆನಿಸ್​, ಸ್ಕ್ವಾಷ್​, ಟ್ರಯಾಥ್ಲಾನ್​, ಬೀಚ್​ ವಾಲಿಬಾಲ್​, ರಗ್ಬಿ ಸೆವೆನ್ಸ್​ 2026ರ ಆವೃತ್ತಿಯಿಂದ ಹೊರಬಿದ್ದ ಪ್ರಮುಖ ಕ್ರೀಡೆಗಳು. ಶೂಟಿಂಗ್​ ಸ್ಪರ್ಧೆಯನ್ನು 2022ರಲ್ಲೇ ಕೈಬಿಡಲಾಗಿತ್ತು. ಆರ್ಚರಿ 2010ರಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿತ್ತು. ಬ್ಯಾಡ್ಮಿಂಟನ್​, ಟಿಟಿ, ಸ್ಕಾ$್ವಷ್​ ಕೈಬಿಡುವ ಮೂಲಕ ಎಲ್ಲ ರ್ಯಾಕೆಟ್​ ಕ್ರೀಡೆಗಳನ್ನು ಕಡೆಗಣಿಸಿದಂತಾಗಿದೆ.

10 ಕ್ರೀಡೆಗಳಲ್ಲಿ ಪದಕ ಸ್ಪರ್ಧೆ

ಅಥ್ಲೆಟಿಕ್ಸ್-ಪ್ಯಾರಾ ಅಥ್ಲೆಟಿಕ್ಸ್​, ಈಜು-ಪ್ಯಾರಾ ಈಜು, ಆರ್ಟಿಸ್ಟಿಕ್​ ಜಿಮ್ನಾಸ್ಟಿಕ್ಸ್​, ಟ್ರ್ಯಾಕ್​ ಸೈಕ್ಲಿಂಗ್​-ಪ್ಯಾರಾ ಟ್ರ್ಯಾಕ್​ ಸೈಕ್ಲಿಂಗ್​, ನೆಟ್​ಬಾಲ್​, ವೇಯ್ಟ್​ಲಿಫ್ಟಿಂಗ್-ಪ್ಯಾರಾ ಪವರ್​ಲಿಫ್ಟಿಂಗ್​, ಬಾಕ್ಸಿಂಗ್​, ಜುಡೋ, ಲಾನ್​ ಬೌಲ್ಸ್​-ಪ್ಯಾರಾ ಬೌಲ್ಸ್​, 3/3 ಬಾಸ್ಕೆಟ್​ಬಾಲ್​-3/3 ವೀಲ್​ಚೇರ್​ ಬಾಸ್ಕೆಟ್​ಬಾಲ್​ ಕ್ರೀಡೆಗಳಲ್ಲಿ ಸ್ಪರ್ಧೆಗಳು ನಡೆಯಲಿವೆ.

ವೆಚ್ಚ ತಗ್ಗಿಸುವ ಉದ್ದೇಶ

ಈ ಹಿಂದಿನ ಯೋಜನೆಯ ಪ್ರಕಾರ 2026ರ ಗೇಮ್ಸ್​ ಆಸ್ಟ್ರೆಲಿಯಾದ ವಿಕ್ಟೋರಿಯಾದಲ್ಲಿ ನಡೆಯಬೇಕಾಗಿತ್ತು. ಆದರೆ ದುಬಾರಿ ವೆಚ್ಚದ ಭೀತಿಯಿಂದ ಆಸೀಸ್​ ಕಳೆದ ವರ್ಷ ಆತಿಥ್ಯದಿಂದ ಹಿಂದೆ ಸರಿದಿತ್ತು. ನಂತರ ಬದಲಿ ಆತಿಥ್ಯಕ್ಕೆ ಯಾರೂ ಮುಂದೆ ಬಾರದಿದ್ದಾಗ, ಗ್ಲಾಸ್ಗೋದಲ್ಲಿ ಗೇಮ್ಸ್​ ನಡೆಸಲು ವಿಶೇಷ ಮನವಿ ಸಲ್ಲಿಸಲಾಗಿತ್ತು. ಇದರನ್ವಯ ಗ್ಲಾಸ್ಗೋ ಆತಿಥ್ಯ ವಹಿಸಿದರೂ, ವೆಚ್ಚ ತಗ್ಗಿಸುವ ಸಲುವಾಗಿ ಈಗಾಗಲೆ ಇರುವ ಕ್ರೀಡಾಂಗಣಗಳನ್ನು ಮಾತ್ರ ಬಳಸಿಕೊಳ್ಳಲಿದೆ. ಹೀಗಾಗಿ ಕ್ರೀಡಾಸ್ಪರ್ಧೆಗಳ ಸಂಖ್ಯೆಯನ್ನೂ ಸೀಮಿತಗೊಳಿಸಲಾಗಿದೆ.

ಭಾರತಕ್ಕೆ ಭಾರಿ ನಷ್ಟ

2026ರ ಗೇಮ್ಸ್​ನಿಂದ ಕೈಬಿಡಲ್ಪಟ್ಟಿರುವ ಹೆಚ್ಚಿನ ಕ್ರೀಡೆಗಳೆಲ್ಲ ಭಾರತದ ನೆಚ್ಚಿನ ಸ್ಪರ್ಧೆಗಳೇ ಆಗಿವೆ. ಹಾಕಿಯಲ್ಲಿ ಭಾರತ ತಂಡ ಪುರುಷರ ವಿಭಾಗದಲ್ಲಿ 3 ಬೆಳ್ಳಿ, 2 ಕಂಚು, ಮಹಿಳೆಯರಲ್ಲಿ 3 ಪದಕ ಗೆದ್ದ ಇತಿಹಾಸ ಹೊಂದಿದೆ. ಬ್ಯಾಡ್ಮಿಂಟನ್​ನಲ್ಲಿ ಭಾರತ ಇದುವರೆಗೆ 10 ಚಿನ್ನ, 8 ಬೆಳ್ಳಿ, 13 ಕಂಚಿನ ಸಹಿತ 31 ಪದಕ ಗೆದ್ದು ಪ್ರಾಬಲ್ಯ ಸಾಧಿಸಿದೆ. ಶೂಟಿಂಗ್​ನಲ್ಲಿ ಭಾರತ 63 ಸ್ವರ್ಣ, 44 ಬೆಳ್ಳಿ, 28 ಕಂಚಿನ ಸಹಿತ 135 ಪದಕ ಗೆದ್ದ ದಾಖಲೆ ಹೊಂದಿದೆ. ಕುಸ್ತಿಯಲ್ಲೂ 49 ಚಿನ್ನ, 39 ಬೆಳ್ಳಿ, 26 ಕಂಚಿನ ಸಹಿತ 114 ಪದಕ ಗೆದ್ದ ಸಾಧನೆ ಮಾಡಿದೆ. 2022ರಲ್ಲಿ ಕ್ರಿಕೆಟ್​ ಸೇರ್ಪಡೆಗೊಂಡ ಬಳಿಕ ಭಾರತ ಮಹಿಳಾ ತಂಡ ಬೆಳ್ಳಿ ಪದಕ ಗೆದ್ದುಕೊಂಡಿತ್ತು. ಟೇಬಲ್​ ಟೆನಿಸ್​ನಲ್ಲೂ 2022ರಲ್ಲಿ ಭಾರತ 4 ಚಿನ್ನ ಸಹಿತ 7 ಪದಕ ಗೆದ್ದು ಬೀಗಿತ್ತು.ಸ್ಕಾ$್ವಷ್​ನಲ್ಲೂ 2 ಪದಕ ಗೆದ್ದಿತ್ತು. 2022ರ ರ್ಬಮಿಗ್​ಹ್ಯಾಂ ಗೇಮ್ಸ್​ನಲ್ಲಿ ಭಾರತ 22 ಚಿನ್ನ, 16 ಬೆಳ್ಳಿ, 23 ಕಂಚಿನ ಸಹಿತ 61 ಪದಕ ಗೆದ್ದು ಪದಕಪಟ್ಟಿಯಲ್ಲಿ 4ನೇ ಸ್ಥಾನ ಗಳಿಸಿತ್ತು.

ಗೇಮ್ಸ್​ ಬಹಿಷ್ಕಾರಕ್ಕೆ ಕರೆ

ಕಾಮನ್ವೆಲ್ತ್​ ಗೇಮ್ಸ್​ನಿಂದ ಪ್ರಮುಖ ಕ್ರೀಡೆಗಳನ್ನು ಕೈಬಿಟ್ಟಿರುವುದು ಭಾರತೀಯ ಕ್ರೀಡಾ ಪ್ರಗತಿಗೆ ಹೊಡೆತ ನೀಡುವಂಥ ಬೆಳವಣಿಗೆಯಾಗಿದೆ. ಹೀಗಾಗಿ ಭಾರತ 2026ರ ಕಾಮನ್ವೆಲ್ತ್​ ಗೇಮ್ಸ್​ನಲ್ಲಿ ಪಾಲ್ಗೊಳ್ಳದೇ ಇರುವುದು ಉತ್ತಮ ಎಂದು ಬ್ಯಾಡ್ಮಿಂಟನ್​ ಕೋಚ್​ಗಳಾದ ಪುಲ್ಲೇಲಾ ಗೋಪಿಚಂದ್​ ಮತ್ತು ವಿಮಲ್​ ಕುಮಾರ್​ ಅಭಿಪ್ರಾಯಪಟ್ಟಿದ್ದಾರೆ. "ಕಾಮನ್ವೆಲ್ತ್​ ಗೇಮ್ಸ್​ ತನ್ನ ಚಾಮ್​ರ್ ಕಳೆದುಕೊಳ್ಳುತ್ತಿದೆ. ಇನ್ನು ಅದನ್ನು ನಡೆಸುವ ಅಗತ್ಯವಿಲ್ಲ. ಒಲಿಂಪಿಕ್ಸ್​, ಏಷ್ಯನ್​ ಗೇಮ್ಸ್​ ಅಷ್ಟೇ ಸಾಕು. ಕಾಮನ್ವೆಲ್ತ್​ ಗೇಮ್ಸ್​ ಈಗ ಅಪ್ರಸ್ತುತ. ಅದಕ್ಕಾಗಿ ಹಣ ಖರ್ಚು ಮಾಡುವ ಬದಲಾಗಿ ಭಾರತ, ತನ್ನ ಕ್ರೀಡಾ ಸೌಕರ್ಯ ಅಭಿವೃದ್ಧಿಗಾಗಿ ಆ ಹಣವನ್ನು ವ್ಯಯಿಸುವುದು ಉತ್ತಮ' ಎಂದು ಗೋಪಿಚಂದ್​ ಹೇಳಿದ್ದಾರೆ.

https://www.vijayavani.net/rahul-dravids-son-samit-is-vice-captain-for-the-karnataka-junior-team