ಮೆಸ್ಸಿ ಕಣ್ಣೀರು: ಎರಡು ದಶಕಗಳ ಕಾಲ ಫುಟ್ಬಾಲ್ನಲ್ಲಿ ತನ್ನದೇ ಛಾಪು ಹೊಂದಿರುವ 37 ವರ್ಷದ ಮೆಸ್ಸಿ, ಕಳೆದ 3 ವರ್ಷದಲ್ಲಿ ಮೂರು ಪ್ರಮುಖ ಟ್ರೋಫಿಗಳನ್ನು ತನ್ನ ಸಾರಥ್ಯದಲ್ಲಿ ಅರ್ಜೆಂಟೀನಾಗೆ ತಂದುಕೊಟ್ಟಿದ್ದಾರೆ. ಇದರ ನಡುವೆ ಕೊಲಂಬಿಯಾ ಎದುರು ದ್ವಿತೀಯಾರ್ಧದಲ್ಲಿ ಗಾಯದ ಸಮಸ್ಯೆಯಿಂದ ಬೆಂಚ್ನಲ್ಲಿ ಕುಳಿತು ಭಾವುಕರಾಗಿ ಕಣ್ಣೀರು ಸುರಿಸಿದರು. 36ನೇ ನಿಮಿಷದಲ್ಲಿ ಬಲಗಾಲಿನ ಪಾದ ನೋವಿಗೆ ತುತ್ತಾದರೂ ತುರ್ತು ಚಿಕಿತ್ಸೆಯ ಬಳಿಕ ಆಟ ಮುಂದುವರಿಸಿದ ಮೆಸ್ಸಿ, 65ನೇ ನಿಮಿಷದಲ್ಲಿ ಬಲಗಾಲಿನ ಪಾದದ ಊತದ ತೀವ್ರ ನೋವಿನಿಂದ ಮೈದಾನದಲ್ಲಿ ಕುಸಿದು ಬಿದ್ದರು. ಟೂರ್ನಿಯ ಆರಂಭದಿಂದಲೂ ಗಾಯದ ಸಮಸ್ಯೆ ಎದುರಿಸಿದ ಮೆಸ್ಸಿ, ಲೀಗ್ ಹಂತದ ಅಂತಿಮ ಪಂದ್ಯ ತಪ್ಪಿಸಿಕೊಂಡಿದ್ದರು. ಟೂರ್ನಿಯಲ್ಲಿ ಮೆಸ್ಸಿ ಏಕೈಕ ಗೋಲು ದಾಖಲಿಸಿದರು.
