ಅನೀಶ್​ ಶತಕ, ರಾಜ್ಯಕ್ಕೆ ಭಾರಿ ಮುನ್ನಡೆ: ಅನೀಶ್ವರ್​, ಮನ್ವಂತ್​​ ಅರ್ಧಶತಕ

ಗುವಾಹಟಿ: ಯುವ ಬ್ಯಾಟರ್​ ಕೆವಿ ಅನೀಶ್​ (142*ರನ್​, 248 ಎಸೆತ, 10 ಬೌಂಡರಿ, 2 ಸಿಕ್ಸರ್​) ಪ್ರಥಮ ದರ್ಜೆ ಕ್ರಿಕೆಟ್​ನಲ್ಲಿ ಸಿಡಿಸಿದ ಚೊಚ್ಚಲ ಶತಕದ ಜತೆಗೆ ಎಡಗೈ ಬ್ಯಾಟರ್​ ಅನೀಶ್ವರ್​ ಗೌತಮ್​ (83 ರನ್​, 125 ಎಸೆತ, 9 ಬೌಂಡರಿ, 3 ಸಿಕ್ಸರ್​) ಅರ್ಧಶತಕದ ನೆರವಿನಿಂದ ಕರ್ನಾಟಕ ತಂಡ ಪ್ರತಿಷ್ಠಿತ ರಣಜಿ ಟ್ರೋಫಿ ರೆಡ್​ ಬಾಲ್​ ಟೂರ್ನಿಯ ತನ್ನ 4ನೇ ಪಂದ್ಯದಲ್ಲಿ ಆತಿಥೇಯ ಅಸ್ಸಾಂ ಎದುರು ಭಾರಿ ಮುನ್ನಡೆಯೊಂದಿಗೆ ಬಿಗಿ ಹಿಡಿತ ಸಾಧಿಸಿದೆ. ಈ ಮೂಲಕ ನಾಕೌಟ್​ಗೇರುವ ಅವಕಾಶ ವೃದ್ಧಿಸಿಕೊಳ್ಳುವ ಕನಸಿಗೆ ಬಲ ಸಿಕ್ಕಿದೆ.

ರ್ಬಸಾಪುರ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಎಲೀಟ್​ ಬಿ ಗುಂಪಿನ ಪಂದ್ಯದಲ್ಲಿ ಮಂಗಳವಾರ 2 ವಿಕೆಟ್​ಗೆ 180 ರನ್​ಗಳಿಂದ ಎರಡನೇ ದಿನದಾಟ ಆರಂಭಿಸಿದ ಕರ್ನಾಟಕ ಮತ್ತೆ 316 ರನ್​ ಸೇರಿಸಿತು. ಉತ್ತಮ ಲಯದಲ್ಲಿರುವ ಕೆವಿ ಅನೀಶ್​ ಹಾಗೂ ಚಿಕ್ಕಮಗಳೂರಿನ ಅನೀಶ್ವರ್​ ಗೌತಮ್​ ಜೋಡಿ ಐದನೇ ವಿಕೆಟ್​ಗೆ 239 ಎಸೆತಗಳಲ್ಲಿ 148 ರನ್​ ಸೇರಿಸಿ ಚಹಾ ವಿರಾಮದ ನಂತರ ಬೇರ್ಪಟ್ಟಿತು. ಕರ್ನಾಟಕ ತಂಡ ದಿನದಂತ್ಯಕ್ಕೆ 117 ಓವರ್​ಗಳಲ್ಲಿ 5 ವಿಕೆಟ್​ಗೆ 496 ರನ್​ ಕಲೆಹಾಕಿದ್ದು, 361 ರನ್​ಗಳ ಬೃಹತ್​ ಮುನ್ನಡೆ ಸಾಧಿಸಿದೆ. ಶತಕವೀರ ಅನೀಶ್​ ಜತೆಗೆ ಹಿಂದಿನ ಪಂದ್ಯದ ಹೀರೋ ಮನ್ವಂತ್​ ಕುಮಾರ್​ (53* ರನ್​, 63 ಎಸೆತ, 5 ಬೌಂಡರಿ, 2 ಸಿಕ್ಸರ್​) ಮುರಿಯದ ಆರನೇ ವಿಕೆಟ್​ಗೆ 136 ಎಸೆತಗಳಲ್ಲಿ 95 ರನ್​ಗಳಿಸಿದ್ದು, ಮೂರನೇ ದಿನಕ್ಕೆ ಬ್ಯಾಟಿಂಗ್​ ಕಾಯ್ದುಕೊಂಡಿದ್ದಾರೆ.

ಬುಧವಾರ ಭೋಜನ ವಿರಾಮಕ್ಕೆ ಕರ್ನಾಟಕ ತಂಡ ಮೊದಲ ಇನಿಂಗ್ಸ್​ ಡಿಕ್ಲೇರ್​ ಮಾಡಿಕೊಳ್ಳುವುದರ ಜತೆಗೆ ಉಳಿದ ಒಂದೂವರೆ ದಿನದೊಳಗೆ ಅಸ್ಸಾಂ ತಂಡವನ್ನು ಎರಡನೇ ಇನಿಂಗ್ಸ್​ನಲ್ಲಿ ಬೇಗನೇ ಕಟ್ಟಿಹಾಕಿದರೆ, ಇನಿಂಗ್ಸ್​ ಗೆಲುವಿನೊಂದಿಗೆ ಬೋನಸ್​ ಸಹಿತ 7 ಅಂಕ ಸಂಪಾದಿಸುವ ನಿರೀೆ ಹರಡಿದೆ.

ಅಸ್ಸಾಂ: 48.1 ಓವರ್​ಗಳಲ್ಲಿ 135. ಕರ್ನಾಟಕ:117 ಓವರ್​ಗಳಲ್ಲಿ 5 ವಿಕೆಟ್​ಗೆ 496 (ಮಯಾಂಕ್​ ಅಗರ್ವಾಲ್​ 72, ಕೆವಿ ಅನೀಶ್​ 142*, ಕರುಣ್​ ನಾಯರ್​ 21, ಅನೀಶ್ವರ್​ ಗೌತಮ್​ 83, ಮನ್ವಂತ್​ ಕುಮಾರ್​ 53*, ರೋಶನ್​ 126ಕ್ಕೆ 2, ಮೋಹಿತ್​ 92ಕ್ಕೆ 1).

ಅನೀಶ್​-ಅನೀಶ್ವರ್​ ಶತಕದ ಜತೆಯಾಟ

ಬೆಳಗ್ಗೆ ವೈಯಕ್ತಿಕ 53 ರನ್​ನಿಂದ ಆಟ ಮುಂದುವರಿಸಿದ ಮಯಾಂಕ್​ ಅಗರ್ವಾಲ್​ (72) ಬೇಗನೆ ಔಟಾದರು. ಆಗ, ಅನೀಶ್​ ಜತೆಗೂಡಿದ ಅನುಭವಿ ಕರುಣ್​ ನಾಯರ್​ (21) 4ನೇ ವಿಕೆಟ್​ಗೆ 70 ಎಸೆತಗಳಲ್ಲಿ 46 ರನ್​ ಸೇರಿಸಿ ಔಟಾದರು. ನಂತರ ಅಸ್ಸಾಂ ಬೌಲರ್​ಗಳ ಎದುರು ದಿಟ್ಟ ಬ್ಯಾಟಿಂಗ್​ ನಡೆಸಿದ ಅನೀಶ್​&ಅನೀಶ್ವರ್​ ಭೋಜನ ವಿರಾಮದಿಂದ ಚಹಾ ಬ್ರೇಕ್​ವರೆಗೂ ವಿಕೆಟ್​ ಕಾಯ್ದುಕೊಂಡು ಮುನ್ನಡೆ ಹಿಗ್ಗಿಸಿದರು. ಹಿಂದಿನ ಬಾರಿ ಅರ್ಧಶತಕವನ್ನು ಶತಕವನ್ನಾಗಿ ಪರಿವರ್ತಿಸಲು ವಿಲವಾಗುತ್ತಿದ್ದ ಅನೀಶ್​ 168 ಎಸೆತಗಳಲ್ಲಿ ಮೂರಂಕಿಯ ಮೈಲಿಗಲ್ಲು ಸ್ಥಾಪಿಸಿದರು. ಇವರಿಬ್ಬರು ರಾಜ್ಯದ ಮುನ್ನಡೆಯನ್ನು 250 ಪ್ಲಸ್​ಗೆ ಏರಿಸಿದರು. ಅನೀಶ್ವರ್​ ನಿರ್ಗಮನದ ನಂತರ ಅನೀಶ್​ಗೆ ಉತ್ತಮ ಬೆಂಬಲ ನೀಡಿದ ಮನ್ವಂತ್​ ಕುಮಾರ್​ ಮೊತ್ತ ಏರಿಸಲು ನೆರವಾದರು. ಪಂದ್ಯದಲ್ಲಿ ಇದುವರೆಗೆ ಪತನಗೊಂಡಿರುವ 15 ವಿಕೆಟ್​ಗಳೂ ಸ್ಪಿನ್ನರ್​ಗಳ ಪಾಲಾಗಿದ್ದು, ಬಾಕಿ ಉಳಿದಿರುವ ಎರಡು ದಿನದಾಟದಲ್ಲೂ ಸ್ಪಿನ್ನರ್​ಗಳೇ ಪ್ರಾಬಲ್ಯ ಸಾಧಿಸುವ ನಿರೀೆ ಇದೆ.