ಎರಡನೇ ಸ್ಥಾನಕ್ಕೇರಿದ ಕೊನೆರು ಹಂಪಿ

ಚೆನ್ನೈ: ಭಾರತದ ಗ್ರಾಂಡ್ ಮಾಸ್ಟರ್ ಹಾಗೂ ವಿಶ್ವ ರ‍್ಯಾಪಿಡ್ ಚೆಸ್ ಚಾಂಪಿಯನ್ ಕೊನೆರು ಹಂಪಿ ನೂತನ ಮಹಿಳೆಯರ ವಿಶ್ವ ಚೆಸ್ ರ‍್ಯಾಂಕಿಂಗ್​ನಲ್ಲಿ 2ನೇ ಸ್ಥಾನಕ್ಕೇರಿದ್ದಾರೆ.

ಹಾಲಿ ವಿಶ್ವ ಚಾಂಪಿಯನ್ ಚೀನಾದ ಜು ವೆಂಜುನ್ ಅವರನ್ನು ಹಿಮ್ಮೆಟ್ಟಿಸಿ ಹಂಪಿ ಈ ಸಾಧನೆ ಮಾಡಿದ್ದಾರೆ. ಚೀನಾದ ಯಿಫಾನ್ ಹೌ ಅಗ್ರಸ್ಥಾನದಲ್ಲಿ ಮುಂದುವರಿದಿದ್ದಾರೆ. ಹಂಪಿ ಅಂಕ ಗಳಿಕೆ 2586ಕ್ಕೇರಿದ್ದರೆ, ಯಿಫಾನ್ 2658 ಅಂಕಗಳಿಂದ ಅಗ್ರಸ್ಥಾನದಲ್ಲಿದ್ದಾರೆ. ಭಾರತದ ಮತ್ತೋರ್ವ ಗ್ರಾಂಡ್​ವಾಸ್ಟರ್ ಡಿ. ದ್ರೋಣವಲ್ಲಿ 9ನೇ ಸ್ಥಾನದಲ್ಲಿದ್ದಾರೆ.

ಮುಕ್ತ ವಿಭಾಗದ ರ‍್ಯಾಂಕಿಂಗ್​ನ ಅಗ್ರ 10ರಲ್ಲಿ ಯಾವುದೇ ಭಾರತೀಯರಿಲ್ಲ. 16ನೇ ಸ್ಥಾನದಲ್ಲಿರುವ ವಿಶ್ವನಾಥನ್ ಆನಂದ್ ಅಗ್ರ ಶ್ರೇಯಾಂಕಿತ ಭಾರತೀಯರಾಗಿದ್ದಾರೆ.