ಇಂದು ಈಡನ್​ ಗಾರ್ಡನ್ಸ್​​ನಲ್ಲಿ ಕೆಕೆಆರ್​-ಪಂಜಾಬ್ ಕಿಂಗ್ಸ್​​​ ಸೆಣಸಾಟ

ಕೋಲ್ಕತ: ಪ್ಲೇಆಫ್​ ರೇಸ್​ನಲ್ಲಿ ಉಳಿಯಲು ಗೆಲುವಿನ ಹಂಬಲದಲ್ಲಿರುವ ಹಾಲಿ ಚಾಂಪಿಯನ್​ ಕೋಲ್ಕತ ನೈಟ್​ರೈಡರ್ಸ್​ ಮತ್ತು ಗೆಲುವಿನ ಹಳಿಗೆ ಮರಳುವ ತವಕದಲ್ಲಿರುವ ಪಂಜಾಬ್​ ಕಿಂಗ್ಸ್​ ತಂಡಗಳು ಐಪಿಎಲ್​ 18ನೇ ಆವೃತ್ತಿಯಲ್ಲಿ ಶನಿವಾರ ಮುಖಾಮುಖಿ ಆಗಲಿವೆ. ಉಭಯ ತಂಡಗಳ ಮೊದಲ ಮುಖಾಮುಖಿಯಲ್ಲಿ ಪಂಜಾಬ್​ ಕಿಂಗ್ಸ್​ ತಂಡ 111 ರನ್​ಗಳನ್ನು ರಸಿಕೊಂಡು ಬೀಗಿತ್ತು. ಇದಕ್ಕೆ ತವರಿನ ಈಡನ್​ ಗಾರ್ಡನ್ಸ್​ ಸ್ಟೇಡಿಯಂನಲ್ಲಿ ಸೇಡು ತೀರಿಸಿಕೊಳ್ಳುವುದು ಕೆಕೆಆರ್​ ಗುರಿಯಾಗಿದೆ. ಶ್ರೇಯಸ್​ ಅಯ್ಯರ್​ ತನ್ನ ಮಾಜಿ ತಂಡದ ಎದುರು ಮತ್ತೊಂದು ಗೆಲುವಿನ ಹುರುಪಿನಲ್ಲಿದ್ದಾರೆ.

ಕೆಕೆಆರ್​ಗೆ ಕಳೆದ 2 ಪಂದ್ಯಗಳಲ್ಲಿ ಬ್ಯಾಟಿಂಗ್​ ವಿಭಾಗವೇ ಕೈಕೊಟ್ಟಿದೆ. ಗುಜರಾತ್​ ಎದುರು ತವರಿನಲ್ಲೇ 39 ರನ್​ಗಳಿಂದ ಸೋತಿದ್ದ ಅಜಿಂಕ್ಯ ರಹಾನೆ ಪಡೆ ಗೆಲುವಿನ ಹಳಿಗೆ ಮರಳುವ ಒತ್ತಡದಲ್ಲಿದೆ. ವೆಂಕಟೇಶ್​ ಅಯ್ಯರ್​, ರಿಂಕು ಸಿಂಗ್​, ರಮಣ್​ದೀಪ್​ ಸಿಂಗ್​, ಆಂಡ್ರೆ ರಸೆಲ್​ ವೈಲ್ಯ ಕೆಕೆಆರ್​ಗೆ ದೊಡ್ಡ ಹೊಡೆತ ನೀಡಿದೆ. ಇದರಿಂದ ಕೆರಿಬಿಯನ್​ ಆಲ್ರೌಂಡರ್​ ರೋವ್ಮನ್​ ಪೊವೆಲ್​ಗೆ ಕೆಕೆಆರ್​ ಈ ಬಾರಿ ಅವಕಾಶ ಕಲ್ಪಿಸುವ ನಿರೀಕ್ಷೆ ಇದೆ. ಅಂಗಕೃಷ್​ ರುವಂಶಿಗೆ ಕೆಕೆಆರ್​ ಬ್ಯಾಟಿಂಗ್​ ಕ್ರಮಾಂಕದಲ್ಲಿ ಬಡ್ತಿ ನೀಡಬೇಕಾದ ಅಗತ್ಯವಿದೆ. ಮುಲ್ಲನ್​ಪುರದಲ್ಲಿ ಅರ್ಷದೀಪ್​, ಯಜುವೇಂದ್ರ ಚಾಹಲ್​ ಚಾಹಲ್​ ದಾಳಿಗೆ ನಲುಗಿದ್ದ ಕೆಕೆಆರ್​ ಈಡನ್​ನಲ್ಲಿ ತಿರುಗೇಟು ನೀಡಬೇಕಾಗಿದೆ.

ಈಡನ್​ಗೆ ಶ್ರೇಯಸ್​ ರಿರ್ಟನ್​

ಕಳೆದ ವರ್ಷ ಕೆಕೆಆರ್​ ನಾಯಕರಾಗಿ ಪ್ರಶಸ್ತಿ ಗೆದ್ದುಕೊಡುವ ಮೂಲಕ ದಶಕದ ಪ್ರಶಸ್ತಿ ಬರ ನೀಗಿಸಿದ್ದ ಶ್ರೇಯಸ್​ ಅಯ್ಯರ್​, ಈ ಬಾರಿ ಈಡನ್​ ಗಾರ್ಡನ್ಸ್​ ಅಂಗಣದಲ್ಲಿ ಪ್ರವಾಸಿ ತಂಡದ ನಾಯಕರಾಗಿ ಕಣಕ್ಕಿಳಿಯಬೆಕಾಗಿದೆ. ಕೆಕೆಆರ್​ ತಂಡ ತನ್ನನ್ನು ರಿಟೇನ್​ ಮಾಡಿಕೊಳ್ಳದ ಬೇಸರದ ನಡುವೆ ಅವರೀಗ ಪಂಜಾಬ್​ ನಾಯಕರಾಗಿ ಯಶಸ್ಸಿನ ಹಾದಿಯಲ್ಲಿ ಮುಂದುವರಿದಿದ್ದಾರೆ. ಕಳೆದ ಪಂದ್ಯದಲ್ಲಿ ಆರ್​ಸಿಬಿ ಎದುರು ಬ್ಯಾಟಿಂಗ್​ ವಿಭಾಗದ ನೀರಸ ನಿರ್ವಹಣೆಯಿಂದ ಸೋತಿದ್ದ ಪಂಜಾಬ್​ ಮತ್ತೆ ಗೆಲುವಿನ ಹಳಿ ಏರುವ ಹಂಬಲದಲ್ಲಿದೆ. ಪ್ರಮುಖವಾಗಿ ವಿದೇಶಿ ಆಟಗಾರರ ನೀರಸ ನಿರ್ವಹಣೆ ಪಂಜಾಬ್​ಗೆ ಹಿನ್ನಡೆ ಎನಿಸಿದೆ.

ಪ್ಲೇಆಫ್​ ಲೆಕ್ಕಾಚಾರ...

ಕೆಕೆಆರ್​ ತಂಡ ಇದುವರೆಗೆ ಆಡಿರುವ 8 ಪಂದ್ಯಗಳಲ್ಲಿ 3ರಲ್ಲಷ್ಟೇ ಗೆದ್ದು, 5ರಲ್ಲಿ ಸೋತಿದೆ. ಇದರಿಂದ 6 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ 7ನೇ ಸ್ಥಾನದಲ್ಲಿದೆ. ಪ್ಲೇಆಫ್​ಗೇರಲು ರಹಾನೆ ಪಡೆಗೆ ಉಳಿದ 6 ಪಂದ್ಯಗಳಲ್ಲಿ ಕನಿಷ್ಠ 5 ಗೆಲುವಿನ ಅಗತ್ಯವಿದೆ. ಕೊನೇ 5 ಪಂದ್ಯಗಳಲ್ಲಿ ಡಿಸಿ, ಆರ್​ಆರ್​, ಸಿಎಸ್​ಕೆ, ಎಸ್​ಆರ್​ಎಚ್​, ಆರ್​ಸಿಬಿ ಸವಾಲು ಎದುರಾಗಲಿದೆ. ಮತ್ತೊಂದೆಡೆ ಪಂಜಾಬ್​ ಇದುವರೆಗೆ ಆಡಿರುವ 8 ಪಂದ್ಯಗಳಲ್ಲಿ 5ರಲ್ಲಿ ಗೆದ್ದು, 3 ಸೋಲಿನೊಂದಿಗೆ ಕೆಕೆಆರ್​ಗೆ ವ್ಯತಿರಿಕ್ತವಾದ ಫಲಿತಾಂಶವನ್ನು ಕಂಡಿದೆ. ಅಂಕಪಟ್ಟಿಯಲ್ಲಿ ಸದ್ಯ 5ನೇ ಸ್ಥಾನದಲ್ಲಿರುವ ಶ್ರೇಯಸ್​ ಪಡೆ ಈ ಪಂದ್ಯ ಗೆದ್ದರೆ ಅಗ್ರ 4ರೊಳಗೆ ಪ್ರವೇಶಿಸುವ ಅವಕಾಶ ಹೊಂದಿದೆ. ಪ್ಲೇಆಫ್​ಗೇರಲು ಪಂಜಾಬ್​ಗೆ ಕೊನೇ 6 ಪಂದ್ಯಗಳಲ್ಲಿ 3 ಗೆಲುವಿನ ಅಗತ್ಯವಿದೆ. ಜತೆಗೆ ರನ್​ರೇಟ್​ ಸುಧಾರಿಸಿಕೊಂಡರೆ ಉತ್ತಮ. ಕೊನೇ 5 ಪಂದ್ಯಗಳಲ್ಲಿ ಸಿಎಸ್​ಕೆ, ಎಲ್​ಎಸ್​ಜಿ, ಡಿಸಿ, ಎಂಐ ಮತ್ತು ಆರ್​ಆರ್​ ಎದುರು ಆಡಲಿದೆ.

ಮುಖಾಮುಖಿ: 34

ಕೆಕೆಆರ್​: 21

ಪಂಜಾಬ್​ 13:

ಆರಂಭ: ರಾತ್ರಿ 7.30

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​.

ಕೆಕೆಆರ್​ಗೆ ಪಿಚ್​ ಹಿನ್ನಡೆ

ಆರ್​ಸಿಬಿ ತಂಡದಂತೆ ಕೆಕೆಆರ್​ ಕೂಡ ಈ ಬಾರಿ ತವರಿನ ಪಿಚ್​ಅನ್ನೇ ಅರ್ಥಮಾಡಿಕೊಳ್ಳುವಲ್ಲಿ ಎಡವುತ್ತಿದೆ. ಈಡನ್​ ಪಿಚ್​ ಕ್ಯುರೇಟರ್​ ಸುಜನ್​ ಮುಖರ್ಜಿ ಬಳಿ ಸ್ಪಿನ್​ ಸ್ನೇಹಿ ಪಿಚ್​ಗೆ ಕೆಕೆಆರ್​ ಬೇಡಿಕೆ ಇಟ್ಟಿದ್ದರೂ, ಅದಕ್ಕೆ ಅವರು ಸೂಕ್ತವಾಗಿ ಸ್ಪಂದಿಸಿಲ್ಲ. ಹೀಗಾಗಿ ಕೆಕೆಆರ್​ ತವರಿನಲ್ಲಿ ಆಡಿದ ಮೊದಲ 4 ಪಂದ್ಯಗಳಲ್ಲಿ 1ರಲ್ಲಿ ಮಾತ್ರ ಗೆದ್ದು, 3ರಲ್ಲಿ ಸೋತಿದೆ. ಸುನೀಲ್​ ನಾರಾಯಣ್​ ಈಡನ್​ನಲ್ಲಿ ಈ ಬಾರಿ 2 ವಿಕೆಟ್​ ಮಾತ್ರ ಪಡೆದಿದ್ದರೆ, ವರುಣ್​ ಚಕ್ರವರ್ತಿ 4 ವಿಕೆಟ್​ ಗಳಿಸಿದ್ದಾರೆ. ಮೊಯಿನ್​ ಅಲಿ ಒಂದೂ ವಿಕೆಟ್​ ಪಡೆದಿಲ್ಲ.

https://www.vijayavani.net/19000-children-attend-mumbai-indians-lucknow-supergiants-ipl-match-on-sunday