ರಣಜಿಗೆ ಕರ್ನಾಟಕ ಟೀಮ್​ ರೆಡಿ; ಮತ್ತೆ ಮಯಾಂಕ್​ ಸಾರಥ್ಯ, ಕರುಣ್​ ಪುನರಾಗಮನ

ವಿಜಯವಾಣಿ ಸುದ್ದಿಜಾಲ ಬೆಂಗಳೂರು

ಹಾಲಿ ದೇಶೀಯ ಕ್ರಿಕೆಟ್​ ಋತುವಿನ ಮೊದಲ ಅಂತರ ರಾಜ್ಯ ಕ್ರಿಕೆಟ್​ ಟೂರ್ನಿಗೆ ವೇದಿಕೆ ಸಜ್ಜಾಗಿದೆ. ಅಕ್ಟೋಬರ್​ 15ರಿಂದ ನಡೆಯಲಿರುವ ಪ್ರತಿಷ್ಠಿತ ರಣಜಿ ಟ್ರೋಫಿ ಟೂರ್ನಿಗೆ ಕರ್ನಾಟಕ ತಂಡವನ್ನು ಸೋಮವಾರ ಪ್ರಕಟಿಸಲಾಗಿದೆ. ಮಯಾಂಕ್​ ಅಗರ್ವಾಲ್​ ನಾಯಕರಾಗಿ ಮುಂದುವರಿದಿದ್ದರೆ, ಅನುಭವಿ ಬ್ಯಾಟರ್​ ಕರುಣ್​ ನಾಯರ್​ ಮೂರು ವರ್ಷಗಳ ಬಳಿಕ ಕರ್ನಾಟಕ ತಂಡಕ್ಕೆ ಮರಳಿದ್ದಾರೆ. ಕರ್ನಾಟಕ ರಾಜ್ಯ ಕ್ರಿಕೆಟ್​ ಸಂಸ್ಥೆ (ಕೆಎಸ್​ಸಿಎ) ಹೆಸರಿಸಿರುವ 15 ಆಟಗಾರರ ತಂಡದಲ್ಲಿ ವಿಕೆಟ್​ ಕೀಪರ್​ ಕೃತಿಕ್​ ಕೃಷ್ಣ ಮತ್ತು ಎಡಗೈ ಸ್ಪಿನ್ನರ್​ ಶಿಖರ್​ ಶೆಟ್ಟಿ ಹೊಸಮುಖವಾಗಿದ್ದಾರೆ. ಸ್ಫೋಟಕ ಬ್ಯಾಟರ್​ ಅಭಿನವ್​ ಮನೋಹರ್​ ತಂಡದಲ್ಲಿ ಸ್ಥಾನ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

ರಾಜ್​ಕೋಟ್​ನಲ್ಲಿ ನಡೆಯಲಿರುವ ತನ್ನ ಮೊದಲ ಪಂದ್ಯದಲ್ಲಿ 8 ಬಾರಿಯ ಚಾಂಪಿಯನ್​ ಕರ್ನಾಟಕ ತಂಡ ಆತಿಥೇಯ ಸೌರಾಷ್ಟ್ರ ತಂಡವನ್ನು ಎದುರಿಸಲಿದೆ. ಎಡಗೈ ಬ್ಯಾಟರ್​ ದೇವದತ್​ ಪಡಿಕ್ಕಲ್​ ಮತ್ತು ವೇಗಿ ಪ್ರಸಿದ್ಧ ಕೃಷ್ಣ ವೆಸ್ಟ್​ ಇಂಡೀಸ್​ ವಿರುದ್ಧದ ಟೆಸ್ಟ್​ ಸರಣಿಗೆ ಭಾರತ ತಂಡದಲ್ಲಿರುವ ಕಾರಣ ಮೊದಲ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ.

ಕಳೆದ ಮೂರು ವರ್ಷ ವಿದರ್ಭ ತಂಡದ ಪರ ಆಡಿದ್ದ 33 ವರ್ಷದ ಕರುಣ್​ ನಾಯರ್​, ಕಳೆದ ವರ್ಷ 863 ರನ್​ ಸಿಡಿಸಿ ರಣಜಿ ಟ್ರೋಫಿ ಗೆಲುವಿಗೂ ನೆರವಾಗಿದ್ದರು. ಕಳೆದ ಜೂನ್​ನಲ್ಲಿ ಭಾರತ ಟೆಸ್ಟ್​ ತಂಡಕ್ಕೆ 8 ವರ್ಷಗಳ ಬಳಿಕ ಪುನರಾಗಮನ ಕಂಡ ಬೆನ್ನಲ್ಲೇ ಕರುಣ್​, ಕರ್ನಾಟಕ ತಂಡಕ್ಕೂ ಮರಳಲು ನಿರ್ಧರಿಸಿದ್ದರು.

ಶ್ರೀಜಿತ್​ ಕೆಎಲ್​ ಮೊದಲ ಆದ್ಯತೆಯ ವಿಕೆಟ್​ ಕೀಪರ್​ ಆಗಿದ್ದರೆ, ಮಂಡ್ಯದ ಕೃತಿಕ್​ ಕೃಷ್ಣ ಎರಡನೇ ವಿಕೆಟ್​ ಕೀಪರ್​ ಆಗಿ ತಂಡದಲ್ಲಿ ಸ್ಥಾನ ಪಡೆದಿದ್ದಾರೆ. ಅನುಭವಿ ಶ್ರೇಯಸ್​ ಗೋಪಾಲ್​ ಮತ್ತು ಕಳೆದ ಋತುವಿನಲ್ಲಿ ರಣಜಿಗೆ ಪದಾರ್ಪಣೆ ಮಾಡಿದ್ದ ಮೊಹ್ಸಿನ್​ ಖಾನ್​ ಜತೆಗೆ 20 ವರ್ಷದ ಎಡಗೈ ಸ್ಪಿನ್ನರ್​ ಶಿಖರ್​ ಶೆಟ್ಟಿ ತಂಡದ ಮೂರನೇ ಸ್ಪಿನ್ನರ್​ ಆಗಿದ್ದಾರೆ. ಇತ್ತೀಚೆಗೆ ಕೆ. ತಿಮ್ಮಪ್ಪಯ್ಯ ಟೂರ್ನಿಯಲ್ಲಿ 3 ಪಂದ್ಯಗಳಲ್ಲಿ 20 ವಿಕೆಟ್​ ಕಬಳಿಸಿ ಮಿಂಚಿದ ಸಾಧನೆ ಶಿಖರ್​ಗೆ ರಾಜ್ಯ ತಂಡದಲ್ಲಿ ಸ್ಥಾನ ಪಡೆಯಲು ನೆರವಾಗಿದೆ. ಮೊಹ್ಸಿನ್​ ಖಾನ್​ ಕೂಡ ಟೂರ್ನಿಯಲ್ಲಿ 3 ಪಂದ್ಯಗಳಲ್ಲಿ 15 ವಿಕೆಟ್​ ಕಬಳಿಸಿ ಗಮನಸೆಳೆದಿದ್ದರು.

ವೈಶಾಕ್​ ವಿಜಯ್​ಕುಮಾರ್​, ವಿದ್ವತ್​ ಕಾವೇರಪ್ಪ, ಅಭಿಲಾಷ್​ ಶೆಟ್ಟಿ ಮತ್ತು ವೆಂಕಟೇಶ್​ ಎಂ. ತಂಡದಲ್ಲಿರುವ ನಾಲ್ವರು ವೇಗಿಗಳಾಗಿದ್ದಾರೆ. ಬ್ಯಾಟಿಂಗ್​ ವಿಭಾಗದಲ್ಲಿ ಮಯಾಂಕ್​, ಕರುಣ್​ಗೆ ಯುವ ಬ್ಯಾಟರ್​ಗಳಾದ ಸ್ಮರಣ್​ ಆರ್​, ಅನೀಶ್​ ಕೆವಿ, ನಿಕಿನ್​ ಜೋಸ್​ ಸಾಥ್​ ನೀಡಲಿದ್ದಾರೆ.

ಕಳೆದ ಆವೃತ್ತಿಯ ರಣಜಿ ತಂಡದಲ್ಲಿದ್ದ ಹಾರ್ದಿಕ್​ ರಾಜ್​, ಯಶೋವರ್ಧನ್​ ಪರಂತಾಪ್​, ಸುಜಯ್​ ಸಾತೇರಿ ಮತ್ತು ವಿದ್ಯಾಧರ್​ ಪಾಟೀಲ್​ ಈ ಬಾರಿ ಹೊರಬಿದ್ದಿದ್ದಾರೆ. ವಿ. ಕೌಶಿಕ್​ ಗೋವಾಗೆ ವಲಸೆ ಹೋಗಿದ್ದಾರೆ.

ಕರ್ನಾಟಕ ತಂಡ: ಮಯಾಂಕ್​ ಅಗರ್ವಾಲ್​ (ನಾಯಕ), ಕರುಣ್​ ನಾಯರ್​, ಸ್ಮರಣ್​ ಆರ್​. ಶ್ರೀಜಿತ್​ ಕೆಎಲ್​ (ವಿ.ಕೀ), ಶ್ರೇಯಸ್​ ಗೋಪಾಲ್​, ವೈಶಾಕ್​ ವಿಜಯ್​ಕುಮಾರ್​, ವಿದ್ವತ್​ ಕಾವೇರಪ್ಪ, ಅಭಿಲಾಷ್​ ಶೆಟ್ಟಿ, ವೆಂಕಟೇಶ್​ ಎಂ, ನಿಕಿನ್​ ಜೋಸ್​, ಅಭಿನವ್​ ಮನೋಹರ್​, ಕೃತಿಕ್​ ಕೃಷ್ಣ (ವಿ.ಕೀ), ಅನೀಶ್​ ಕೆವಿ, ಮೊಹ್ಸಿನ್​ ಖಾನ್​, ಶಿಖರ್​ ಶೆಟ್ಟಿ. ಕೋಚ್​: ಯರೇಗೌಡ, ಬೌಲಿಂಗ್​ ಕೋಚ್​: ಮನ್ಸೂರ್​ ಅಲಿ ಖಾನ್​, ಫೀಲ್ಡಿಂಗ್​ ಕೋಚ್​: ಶಬರೀಶ್​ ಪಿ.ಮೋಹನ್​.

https://www.vijayavani.net/kyle-kumaran-and-neil-johnny-led-the-kicchas-kings-bangalore-team-to-victory