ರಾಜ್ಯ ಸೀನಿಯರ್​ ಈಜು: ಬಸವನಗುಡಿ ಈಜು ಕೇಂದ್ರ ಸಮಗ್ರ ಚಾಂಪಿಯನ್​

ಆತಿಥೇಯ ಬಸವನಗುಡಿ ಈಜು ಕೇಂದ್ರದ (ಬಿಎಸಿ) ತಂಡ ಕೆಎಸ್​ಎ ರಾಜ್ಯ ಸೀನಿಯರ್​ ಈಜು ಚಾಂಪಿಯನ್​ಷಿಪ್​ನಲ್ಲಿ (State Senior Swimming Championship) ಸಮಗ್ರ ಪ್ರಶಸ್ತಿ ಗೆದ್ದುಕೊಂಡಿದೆ. ಬಿಎಸಿ ತಂಡ ಒಟ್ಟು 545 ಅಂಕ ಕಲೆಹಾಕುವ ಮೂಲಕ ಈ ಸಾಧನೆ ಮಾಡಿದೆ. ಡಾಲ್ಫಿನ್​ ಅಕ್ವೆಟಿಕ್ಸ್​ ತಂಡ 285 ಅಂಕಗಳೊಂದಿಗೆ ರನ್ನರ್​ಅಪ್​ ಸ್ಥಾನ ಗಳಿಸಿತು. 3 ದಿನಗಳ ಕೂಟದಲ್ಲಿ ಒಟ್ಟು 17 ಕೂಟ ದಾಖಲೆ ನಿರ್ಮಾಣಗೊಂಡವು.

ಕೊನೇ ದಿನ 7 ದಾಖಲೆ: ಬಸವನಗುಡಿ ಈಜು ಕೇಂದ್ರದಲ್ಲಿ ಬುಧವಾರ ಮುಕ್ತಾಯಗೊಂಡ ಕೂಟದ 3ನೇ ಹಾಗೂ ಕೊನೇ ದಿನ ಮತ್ತೆ 7 ಕೂಟ ದಾಖಲೆಗಳು ರಚನೆಯಾದವು. ಬಿಎಸಿಯ ಮಣಿಕಂಠ ಎಲ್​. ಪುರುಷರ 200 ಮೀ. ಬ್ರೆಸ್ಟ್​ಸ್ಟ್ರೊಕ್​ ವಿಭಾಗದಲ್ಲಿ 2 ನಿಮಿಷ, 21.10 ಸೆಕೆಂಡ್​ಗಳಲ್ಲಿ ಈಜಿ ರಾಜ್ಯ ದಾಖಲೆಯೊಂದಿಗೆ ಚಿನ್ನ ಗೆದ್ದರು. ಬಿಎಸಿಯ ಎಸ್​. ಲಕ್ಷ್ಯ ಮಹಿಳೆಯರ 200 ಮೀ. ಬ್ರೆಸ್ಟ್​ಸ್ಟ್ರೊಕ್​ನಲ್ಲಿ 2 ನಿಮಿಷ, 40.86 ಸೆಕೆಂಡ್​ಗಳಲ್ಲಿ ಈಜಿ ದಾಖಲೆ ಸಹಿತ ಬಂಗಾರ ಜಯಿಸಿದರು.

ಡಾಲ್ಫಿನ್​ ಅಕ್ವೆಟಿಕ್ಸ್​ನ ತನಿಷಿ ಗುಪ್ತಾ ಮಹಿಳೆಯರ 50 ಮೀ. ಬಟರ್​ಫ್ಲೈ ವಿಭಾಗದಲ್ಲಿ 27.92 ಸೆಕೆಂಡ್​ಗಳಲ್ಲಿ ಈಜುವ ಮೂಲಕ ದಾಖಲೆ ಸಹಿತ ಸ್ವರ್ಣ ಒಲಿಸಿಕೊಂಡರು. ಅವರು 2023ರಲ್ಲಿ ನೀನಾ ವೆಂಕಟೇಶ್​ (28.37ಸೆ) ನಿರ್ಮಿಸಿದ್ದ ದಾಖಲೆ ಮುರಿದರು.

ಡಾಲ್ಫಿನ್​ನ ವಿದಿತ್​ ಎಸ್​. ಶಂಕರ್​ ಪುರುಷರ 50 ಮೀ. ಬ್ರೆಸ್ಟ್​ಸ್ಟ್ರೊಕ್​ ವಿಭಾಗದಲ್ಲಿ 28.58 ಸೆಕೆಂಡ್​ಗಳಲ್ಲಿ ಈಜಿ ಕೂಟ ದಾಖಲೆಯೊಂದಿಗೆ ಚಿನ್ನ ಜಯಿಸಿದರು. ಲಿಖಿತ್​ ಎಸ್​ಪಿ (28.69ಸೆ) 7 ವರ್ಷಗಳ ಹಿಂದೆ ನಿರ್ಮಿಸಿದ್ದ ದಾಖಲೆಯನ್ನು ವಿದಿತ್​ ಮುರಿದರು.

ಬಿಎಸಿಯ ದರ್ಶನ್​ ಎಸ್​. ಪುರುಷರ 200 ಮೀ. ಬಟರ್​ಫ್ಲೈ ವಿಭಾಗದಲ್ಲಿ 2 ನಿಮಿಷ, 2.57 ಸೆಕೆಂಡ್​ಗಳಲ್ಲಿ ಈಜಿ, 17 ವರ್ಷಗಳ ಹಿಂದೆ ರೆಹನ್​ ಪೂಣಚ (2ನಿ,3.21ಸೆ) ನಿರ್ಮಿಸಿದ್ದ ದಾಖಲೆ ಮುರಿಯುವ ಮೂಲಕ ಸ್ವರ್ಣ ಪದಕಕ್ಕೆ ಕೊರಳೊಡ್ಡಿದರು.

ಇನ್ನು ರಿಲೇ ಸ್ಪರ್ಧೆಯಲ್ಲಿ 2 ದಾಖಲೆ ನಿರ್ಮಾಣಗೊಂಡವು. ಮಹಿಳೆಯರ 4/200 ಮೀ. ಫ್ರೀಸ್ಟೈಲ್​​ ರಿಲೇಯಲ್ಲಿ ತಿಸ್ಯಾ, ಅದಿತಿ, ವಿದಿತಾ, ಶಿರಿನ್​ ಒಳಗೊಂಡ ಬಿಎಸಿ ತಂಡ 8 ನಿಮಿಷ, 57.08 ಸೆಕೆಂಡ್​ಗಳಲ್ಲಿ ಸ್ಪರ್ಧೆ ಮುಗಿಸಿ ದಾಖಲೆ ಸಹಿತ ಸ್ವರ್ಣ ಜಯಿಸಿತು. ಮಹಿಳೆಯರ 4/100 ಮೀ. ಮೆಡ್ಲೆ ರಿಲೇಯಲ್ಲಿ ಸುವಾನ, ಲಿನೇಷಾ, ತನಿಷಿ ಗುಪ್ತಾ, ಧಿನಿಧಿ ದೇಸಿಂಘು ಒಳಗೊಂಡ ಡಾಲ್ಫಿನ್​ ತಂಡ 4 ನಿಮಿಷ, 25.06 ಸೆಕೆಂಡ್​ಗಳಲ್ಲಿ ಈಜಿ ದಾಖಲೆ ಬರೆಯುವ ಮೂಲಕ ಚಿನ್ನ ಒಲಿಸಿಕೊಂಡಿತು.

ಬಿಎಸಿಯ ದರ್ಶನ್​ ಎಸ್​. ಮತ್ತು ಡಾಲ್ಫಿನ್​ ಅಕ್ವೆಟಿಕ್ಸ್​ನ ತನಿಷಿ ಗುಪ್ತಾ ಕ್ರಮವಾಗಿ ಪುರುಷರ ಮತ್ತು ಮಹಿಳಾ ವಿಭಾಗದಲ್ಲಿ ವೈಯಕ್ತಿಕ ಚಾಂಪಿಯನ್​ ಎನಿಸಿದರು. ದರ್ಶನ್​ ಕೂಟದಲ್ಲಿ 2 ದಾಖಲೆ ಸಹಿತ ಒಟ್ಟು 43 ಅಂಕ ಕಲೆಹಾಕಿದರೆ, ತನಿಷಿ ಗುಪ್ತಾ 3 ದಾಖಲೆಗಳ ಸಹಿತ 53 ಅಂಕ ಗಳಿಸಿ ಪ್ರಶಸ್ತಿ ಒಲಿಸಿಕೊಂಡರು.