ಬೆಂಗಳೂರು: ಕರ್ನಾಟಕದ ಯುವ ಬ್ಯಾಟರ್ ಮ್ಯಾಕ್ನೀಲ್ ನೊರೊನ್ಹಾ, ಸಿಕೆ ನಾಯ್ಡು ಟ್ರೋಫಿ 23 ವಯೋಮಿತಿಯ ದೇಶೀಯ ಕ್ರಿಕೆಟ್ ಟೂರ್ನಿಯಲ್ಲಿ ಆತಿಥೇಯ ತ್ರಿಪುರ ವಿರುದ್ಧ ಭರ್ಜರಿ ತ್ರಿಶತಕ ಸಿಡಿಸಿ ಗಮನಸೆಳೆದಿದ್ದಾರೆ. 99.14ರ ಸ್ಟ್ರೆ$ಕ್ರೇಟ್ನಲ್ಲಿ ಅವರು ಈ ಸಾಧನೆ ಮಾಡಿರುವುದು ವಿಶೇಷವಾಗಿದೆ.
ಅಗರ್ತಲದ ಪೊಲೀಸ್ ಟ್ರೇನಿಂಗ್ ಅಕಾಡೆಮಿ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದ 2ನೇ ದಿನವಾದ ಸೋಮವಾರ 23 ವರ್ಷದ ಮ್ಯಾಕ್ನೀಲ್ ನೊರೊನ್ಹಾ 348 ಎಸೆತಗಳಲ್ಲಿ 23 ಬೌಂಡರಿ ಮತ್ತು 25 ಸಿಕ್ಸರ್ಗಳ ಸಹಿತ 345 ರನ್ ಸಿಡಿಸಿದರು. ಪ್ರಖರ್ ಚತುರ್ವೇದಿ (91) ಜತೆಗೂಡಿ ಮೊದಲ ವಿಕೆಟ್ಗೆ 289 ಎಸೆತಗಳಲ್ಲಿ 195 ರನ್ ಸೇರಿಸಿದ ಮ್ಯಾಕ್ನೀಲ್, ನಂತರ 2ನೇ ವಿಕೆಟ್ಗೆ ವಿಶಾನ್ ಓನತ್ (106) ಜತೆಗೂಡಿ 262 ರನ್ ಜತೆಯಾಟವಾಡಿದರು. ಮ್ಯಾಕ್ನೀಲ್ 335 ಎಸೆತಗಳಲ್ಲೇ ತ್ರಿಶತಕ ಪೂರೈಸಿದರು.
ಈ ಮೂಲಕ ಕರ್ನಾಟಕ ತಂಡ 119.3 ಓವರ್ಗಳಲ್ಲಿ 5 ವಿಕೆಟ್ಗೆ 580 ರನ್ ಪೇರಿಸಿತು. ಪ್ರತಿಯಾಗಿ ಸ್ಪಿನ್ನರ್ ಕೆ. ಶಶಿಕುಮಾರ್ (20ಕ್ಕೆ 7) ಮಾರಕ ದಾಳಿಗೆ ಕುಸಿದ ತ್ರಿಪುರ ತಂಡ ಕೇವಲ 104 ರನ್ಗಳಿಗೆ ಆಲೌಟ್ ಆಗಿ ಫಾಲೋಆನ್ಗೆ ಸಿಲುಕಿತು. ದಿನದಂತ್ಯಕ್ಕೆ ತ್ರಿಪುರ 2ನೇ ಇನಿಂಗ್ಸ್ನಲ್ಲಿ 1 ವಿಕೆಟ್ಗೆ 40 ರನ್ ಗಳಿಸಿದ್ದು, ಇನ್ನೂ 436 ರನ್ ಹಿನ್ನಡೆಯಲ್ಲಿದೆ.
ಆಫ್ ಸ್ಪಿನ್ ಬೌಲಿಂಗ್ ಕೂಡ ಮಾಡುವ ಆಲ್ರೌಂಡರ್ ಎನಿಸಿರುವ ಮ್ಯಾಕ್ನೀಲ್ ಕಳೆದ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯಲ್ಲಿ ಮಂಗಳೂರು ಡ್ರಾಗನ್ಸ್ ಪರ ಆಡಿದ್ದರು.
