ಬಾಕ್ಸಿಂಗ್ ಟೂರ್ನಮೆಂಟ್​ನಲ್ಲಿ ಚಿನ್ನದ ಪದಕ: ಅಮೆರಿಕದಲ್ಲಿ ಕನ್ನಡಿಗ ಬೆಂಕಿ ಬಸಣ್ಣ ಪುತ್ರನ ಗಮನಾರ್ಹ ಸಾಧನೆ

ಕ್ಯಾಲಿಫೋರ್ನಿಯಾ: ಅವನೀಶ್ ಬೆಂಕಿಯವರು ಇದೇ ಏಪ್ರಿಲ್ 13 ರಿಂದ 15 ರವರೆಗೆ ಶಾರ್ಲೆಟ್, ನಾರ್ತ್ ಕ್ಯಾರೋಲಿನಾದಲ್ಲಿ ನಡೆದ "ನ್ಯಾಷನಲ್ ಕಾಲೇಜಿಯೇಟ್ ಬಾಕ್ಸಿಂಗ್" ಟೂರ್ನಮೆಂಟಿನಲ್ಲಿ ಚಿನ್ನದ ಪದಕವನ್ನು ಗೆದ್ದಿದ್ದಾರೆ.

ಫೈನಲ್​ ಪಂದ್ಯದಲ್ಲಿ ಕ್ಯಾಲಿಫೋರ್ನಿಯಾ ರಾಜ್ಯದ ಸಂತಾಕ್ಲಾರದ ಬಾಕ್ಸಿಂಗ್ ಚಾಂಪಿಯನ್​ ಇತನ್ ಚುಂಗ್ ಅವರನ್ನು ಸೋಲಿಸಿ, ವಿಜಯೋತ್ಸವ ಆಚರಿಸಿದರು.

ಕರ್ನಾಟಕ ಮೂಲದ ಅಪ್ಪಟ ಕನ್ನಡಿಗ ಬೆಂಕಿ ಬಸಣ್ಣನವರ ಹೆಮ್ಮೆಯ ಮಗ 19 ವರ್ಷದ ಅವನೀಶ್ ಬೆಂಕಿ, ವಿಶ್ವವಿಖ್ಯಾತ ಪ್ರತಿಷ್ಠಿತ ಯುನೈಟೆಡ್ ಸ್ಟೇಟ್ಸ್ ಮಿಲ್ಟ್ರಿ ಅಕಾಡೆಮಿ, ವೆಸ್ಟ್ ಪಾಯಿಂಟ್​​ನಲ್ಲಿ ವಿದ್ಯಾಭಾಸ ಮಾಡುತ್ತಿದ್ದಾರೆ. ಅವನೀಶ್ ತನ್ನ ಕಾಲೇಜು ಜೀವನದ ಮೊದಲ ವರ್ಷವೇ ತನ್ನ ತೂಕದ ಕೆಟಗರಿಯಲ್ಲಿ ನ್ಯಾಷನಲ್ ಕಾಲೇಜಿಯಟ್ ಬಾಕ್ಸಿಂಗ್ ಚಾಂಪಿಯನ್​ಶಿಪ್​ನಲ್ಲಿ ಚಿನ್ನದ ಪದಕ ಗಳಿಸಿರುವುದು ತುಂಬಾ ಹೆಮ್ಮೆಯ ವಿಷಯವಾಗಿದೆ.

ಈ ಹಿಂದೆ 2013ರಲ್ಲಿ ಕೇವಲ 9 ವರ್ಷದವನಿದ್ದಾಗ ಬ್ಲಾಕ್ ಬೆಲ್ಟ್ ಪಡೆದಿದ್ದ ಅವನೀಶ್​ ಬೆಂಕಿ, ಫ್ಲೋರಿಡಾ ರಾಜ್ಯದ ಪೋರ್ಟ್ ಲಾಡರ್ಡೇಲ್​ನಲ್ಲಿ ನಡೆದ ನ್ಯಾಷನಲ್ ಲೆವೆಲ್ ತೈ ಕ್ವಾನ್ ಡೊ ಸ್ಪರ್ಧೆಯಲ್ಲಿ ಚಿನ್ನದ ಪದಕ ಪಡೆದಿದ್ದರು. ಹಾಗೆಯೇ ಟೆನ್ನಿಸ್​ನಲ್ಲಿ ಸಹಿತ ಒಳ್ಳೆಯ ಆಟಗಾರನಾಗಿರುವ ಅವನೀಶ್, ನ್ಯೂಯಾರ್ಕ್ ಟೆನಿಸ್ ಪಂದ್ಯಾವಳಿಯಲ್ಲಿ ತನ್ನ ನಿಸ್ಕಯುನಾ ಹೈಸ್ಕೂಲ್ ಅನ್ನು ಪ್ರತಿನಿಧಿಸಿದ್ದಾರೆ.