ಕಿರಿಯರ ವಿಶ್ವಕಪ್ ಸೆಮಿಫೈನಲ್​ಗೇರಿದ ಬಾಂಗ್ಲಾದೇಶ

ಪಾಟ್​ಚೇಫ್​ಸ್ಟ್ರೋಮ್:  ಆತಿಥೇಯ ದಕ್ಷಿಣ ಆಫ್ರಿಕಾ ತಂಡಕ್ಕೆ 104 ರನ್​ಗಳಿಂದ ಹೀನಾಯ ಸೋಲುಣಿಸುವ ಮೂಲಕ ಬಾಂಗ್ಲಾದೇಶ ತಂಡ 19 ವಯೋಮಿತಿ ಏಕದಿನ ಕ್ರಿಕೆಟ್ ವಿಶ್ವಕಪ್​ನಲ್ಲಿ 2ನೇ ಬಾರಿಗೆ ಸೆಮಿಫೈನಲ್​ಗೇರಿದೆ.

2016ರಲ್ಲಿ ತವರಿನಲ್ಲಿ ನಡೆದ ವಿಶ್ವಕಪ್​ನಲ್ಲಿ ಬಾಂಗ್ಲಾ ಮೊದಲ ಬಾರಿ ಈ ಸಾಧನೆ ಮಾಡಿತ್ತು. ಗುರುವಾರ ನಡೆದ ಕ್ವಾರ್ಟರ್​ಫೈನಲ್​ನಲ್ಲಿ ಟಾಸ್ ಸೋತು ಬ್ಯಾಟಿಂಗ್​ಗೆ ಇಳಿದ ಬಾಂಗ್ಲಾ, 5 ವಿಕೆಟ್​ಗೆ 261 ರನ್ ಪೇರಿಸಿತು.

ಪ್ರತಿಯಾಗಿ ಎಡಗೈ ಸ್ಪಿನ್ನರ್ ರಕಿಬುಲ್ ಹಸನ್ (19ಕ್ಕೆ 5) ದಾಳಿಗೆ ಕುಸಿದ ದ. ಆಫ್ರಿಕಾ, 42.3 ಓವರ್​ಗಳಲ್ಲಿ 157 ರನ್​ಗೆ ಸರ್ವಪತನ ಕಂಡು ತವರಿನಲ್ಲೇ ನಿರಾಸೆ ಅನುಭವಿಸಿತು. ಫೆಬ್ರವರಿ 6ರಂದು ಇಲ್ಲೇ ನಡೆಯಲಿರುವ ಸೆಮಿಫೈನಲ್​ನಲ್ಲಿ ಬಾಂಗ್ಲಾ, ನ್ಯೂಜಿಲೆಂಡ್ ತಂಡವನ್ನು ಎದುರಿಸಲಿದೆ.