ಐಸಿಸಿ ಟೆಸ್ಟ್​ ರ‍್ಯಾಂಕಿಂಗ್​ನಲ್ಲಿ ವಿಶೇಷ ದಾಖಲೆ ಬರೆದ ಜಸ್​ಪ್ರೀತ್​ ಬುಮ್ರಾ, ಯಶಸ್ವಿ ಜೈಸ್ವಾಲ್​!

ಬೆಂಗಳೂರು: ಪರ್ತ್​ ಟೆಸ್ಟ್​ನಲ್ಲಿ ಆತಿಥೇಯ ಆಸ್ಟ್ರೆಲಿಯಾವನ್ನು ಕಂಗೆಡಿಸಿ ಭಾರತಕ್ಕೆ ಅಮೋಘ ಗೆಲುವು ತಂದುಕೊಡುವ ಮೂಲಕ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದ ವೇಗಿ ಜಸ್​ಪ್ರೀತ್​ ಬುಮ್ರಾ ಮತ್ತೊಂದು ಸಾಧನೆ ದಾಖಲಿಸಿದ್ದಾರೆ. ಐಸಿಸಿ ಟೆಸ್ಟ್​ ಬೌಲಿಂಗ್​ ರ‍್ಯಾಂಕಿಂಗ್‌ನಲ್ಲಿ ಬುಮ್ರಾ 883 ಅಂಕಗಳೊಂದಿಗೆ ಅಗ್ರಸ್ಥಾನಕ್ಕೆ ಮರಳಿದ್ದಾರೆ. ಈ ಮೂಲಕ ರ‍್ಯಾಂಕಿಂಗ್‌ ಇತಿಹಾಸದಲ್ಲಿ ಗರಿಷ್ಠ ಅಂಕ ಕಲೆಹಾಕಿದ ಭಾರತೀಯ ವೇಗಿ ಎನಿಸಿದ್ದಾರೆ.

ಪರ್ತ್​ ಟೆಸ್ಟ್​ನಲ್ಲಿ ಬುಮ್ರಾ ಹಂಗಾಮಿ ನಾಯಕತ್ವದ ಜತೆಗೆ 72 ರನ್​ಗಳಿಗೆ 8 ವಿಕೆಟ್​ ಕಬಳಿಸಿ ಮಿಂಚಿದ್ದರು. ಮೊದಲ ಇನಿಂಗ್ಸ್​ನಲ್ಲಿ ಅವರು 30 ರನ್​ಗಳಿಗೆ 5 ವಿಕೆಟ್​ ಉರುಳಿಸಿ ಆಸ್ಟ್ರೆಲಿಯಾವನ್ನು 104 ರನ್​ಗಳಿಗೆ ನಿಯಂತ್ರಿಸಿದ್ದರು. ಈ ಮೂಲಕ ಅವರು ದ. ಆಫ್ರಿಕಾದ ಕಗಿಸೊ ರಬಾಡ ಮತ್ತು ಆಸ್ಟ್ರೆಲಿಯಾದ ಜೋಶ್​ ಹ್ಯಾಸಲ್​ವುಡ್​ರನ್ನು ಹಿಂದಿಕ್ಕಿ, ಕಳೆದ ಅಕ್ಟೋಬರ್​ ನಂತರ ಮತ್ತೆ ಅಗ್ರಸ್ಥಾನಕ್ಕೇರಿದ್ದಾರೆ. ಇದಕ್ಕೆ ಮುನ್ನ ಹಾಲಿ ವರ್ಷ ಇಂಗ್ಲೆಂಡ್​ ವಿರುದ್ಧದ ತವರಿನ ಸರಣಿಯ ವೇಳೆ ಅವರು ಮೊದಲ ಬಾರಿ ಅಗ್ರಸ್ಥಾನ ಅಲಂಕರಿಸಿದ್ದರು.

ಪರ್ತ್​ನಲ್ಲಿ 5 ವಿಕೆಟ್​ ಗಳಿಸಿದ ಮೊಹಮದ್​ ಸಿರಾಜ್​ 3 ಸ್ಥಾನ ಬಡ್ತಿಯೊಂದಿಗೆ 25ನೇ ಸ್ಥಾನಕ್ಕೇರಿದ್ದಾರೆ. ಪರ್ತ್​ ಟೆಸ್ಟ್​ ಆಡದಿದ್ದರೂ, ಆರ್​. ಅಶ್ವಿನ್​ 1 ಸ್ಥಾನ ಬಡ್ತಿಯೊಂದಿಗೆ 4ನೇ ಸ್ಥಾನಕ್ಕೇರಿದ್ದಾರೆ. ಆಸೀಸ್​ ನಾಯಕ ಪ್ಯಾಟ್​ ಕಮ್ಮಿನ್ಸ್​ 4ರಿಂದ 6ನೇ ಸ್ಥಾನಕ್ಕೆ ಕುಸಿದಿರುವುದು ಇದಕ್ಕೆ ಕಾರಣವಾಗಿದೆ. ರವೀಂದ್ರ ಜಡೇಜಾ 7ನೇ ಸ್ಥಾನದಲ್ಲಿದ್ದು, ಅಗ್ರ 10ರೊಳಗಿರುವ ಮೂರನೇ ಭಾರತೀಯ ಬೌಲರ್​ ಆಗಿದ್ದಾರೆ.

ಆಲ್ರೌಂಡರ್​ ರ‍್ಯಾಂಕಿಂಗ್‌ನಲ್ಲಿ ಜಡೇಜಾ, ಅಶ್ವಿನ್​ ಕ್ರಮವಾಗಿ ಮೊದಲೆರಡು ಸ್ಥಾನವನ್ನು ಕಾಯ್ದುಕೊಂಡಿದ್ದಾರೆ.

2ನೇ ಸ್ಥಾನಕ್ಕೇರಿದ ಜೈಸ್ವಾಲ್​

ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್​ ಪರ್ತ್​ ಟೆಸ್ಟ್​ನ 2ನೇ ಇನಿಂಗ್ಸ್​ನಲ್ಲಿ 161 ರನ್​ ಸಿಡಿಸಿದ ಸಾಧನೆಯೊಂದಿಗೆ ಐಸಿಸಿ ಟೆಸ್ಟ್​ ಬ್ಯಾಟಿಂಗ್​ ರ‍್ಯಾಂಕಿಂಗ್‌ನಲ್ಲಿ ಜೀವನಶ್ರೇಷ್ಠ 2ನೇ ಸ್ಥಾನಕ್ಕೇರಿದ್ದಾರೆ. ಜೈಸ್ವಾಲ್​ 2 ಸ್ಥಾನ ಬಡ್ತಿಯೊಂದಿಗೆ ನ್ಯೂಜಿಲೆಂಡ್​ನ ಕೇನ್​ ವಿಲಿಯಮ್ಸನ್​ ಮತ್ತು ಇಂಗ್ಲೆಂಡ್​ ಹ್ಯಾರಿ ಬ್ರೂಕ್​ ಅವರನ್ನು ಹಿಂದಿಕ್ಕಿದ್ದಾರೆ. ಅಗ್ರಸ್ಥಾನದಲ್ಲಿರುವ ಇಂಗ್ಲೆಂಡ್​ನ ಜೋ ರೂಟ್​ಗಿಂತ ಜೈಸ್ವಾಲ್​ (825) 78 ಅಂಕ ಹಿನ್ನಡೆಯಲ್ಲಿದ್ದಾರೆ. ಪರ್ತ್​ನಲ್ಲಿ ಶತಕ ಸಿಡಿಸಿದ ಮತ್ತೋರ್ವ ಭಾರತೀಯ ವಿರಾಟ್​ ಕೊಹ್ಲಿ 9 ಸ್ಥಾನ ಬಡ್ತಿಯೊಂದಿಗೆ 13ನೇ ಸ್ಥಾನಕ್ಕೇರಿದ್ದಾರೆ. ರಿಷಭ್​ ಪಂತ್​ 6ನೇ ಸ್ಥಾನ ಕಾಯ್ದುಕೊಂಡಿದ್ದಾರೆ.

https://www.vijayavani.net/new-stars-who-came-to-ipl-6-young-talents-get-an-opportunity-worth-crores