ಲಾರ್ಡ್ಸ್​ ಟೆಸ್ಟ್​ನಲ್ಲಿ ಕಪಿಲ್​ ದೇವ್​ ದಾಖಲೆ ಮುರಿದ ಜಸ್​ಪ್ರೀತ್​ ಬುಮ್ರಾ

ಲಂಡನ್​: ಟೀಮ್ ಇಂಡಿಯಾ ವೇಗಿ ಜಸ್​ಪ್ರೀತ್​ ಬುಮ್ರಾ ಇಂಗ್ಲೆಂಡ್​ ವಿರುದ್ಧದ ಲಾರ್ಡ್ಸ್​ ಟೆಸ್ಟ್​ನಲ್ಲಿ 5 ವಿಕೆಟ್​ ಗೊಂಚಲು ಪಡೆದರು. ಈ ಮೂಲಕ ವಿದೇಶಿ ನೆಲದಲ್ಲಿ 13ನೇ ಬಾರಿ 5 ವಿಕೆಟ್​ ಗೊಂಚಲು ಪಡೆದರು ಮತ್ತು ದಿಗ್ಗಜ ಕಪಿಲ್​ ದೇವ್​ (12) ಅವರನ್ನು ಹಿಂದಿಕ್ಕಿ ವಿದೇಶದಲ್ಲಿ ಗರಿಷ್ಠ 5 ವಿಕೆಟ್​ ಗೊಂಚಲು ಪಡೆದ ಭಾರತೀಯ ಬೌಲರ್​ ಎನಿಸಿದರು.

ಕಪಿಲ್​ ದೇವ್​ ವಿದೇಶದಲ್ಲಿ 66 ಟೆಸ್ಟ್​ ಆಡಿದ್ದರೆ, ಬುಮ್ರಾ 35 ಟೆಸ್ಟ್​ಗಳಲ್ಲೇ ಈ ಸಾಧನೆ ಮಾಡಿದ್ದಾರೆ. ಅನಿಲ್​ ಕುಂಬ್ಳೆ (10), ಇಶಾಂತ್​ ಶರ್ಮ (9) ಕ್ರಮವಾಗಿ 3 ಮತ್ತು 4ನೇ ಸ್ಥಾನದಲ್ಲಿದ್ದಾರೆ. ಬುಮ್ರಾ ಒಟ್ಟಾರೆಯಾಗಿ 15ನೇ ಬಾರಿ 5 ವಿಕೆಟ್​ ಗೊಂಚಲು ಪಡೆದ ಸಾಧನೆ ಮಾಡಿದರು. ಈ ಮೂಲಕ ಲಾರ್ಡ್ಸ್​ ಆನರ್ಸ್​ ಬೋರ್ಡ್​ನಲ್ಲಿ ಮೊದಲ ಬಾರಿ ಹೆಸರು ಬರೆಸಿದರು. ಬುಮ್ರಾ ಲಾರ್ಡ್ಸ್​ನಲ್ಲಿ 5 ವಿಕೆಟ್​ ಗೊಂಚಲು ಪಡೆದ 15ನೇ ಭಾರತೀಯ ಬೌಲರ್​ ಆಗಿದ್ದಾರೆ.

ರೂಟ್​ ಶತಕಗಳ ದಾಖಲೆ

ಮೊದಲ ದಿನದಂತ್ಯಕ್ಕೆ 99 ರನ್​ ಗಳಿಸಿ ಅಜೇಯರಾಗಿದ್ದ ಅನುಭವಿ ಬ್ಯಾಟರ್​ ಜೋ ರೂಟ್​, 2ನೇ ದಿನ ಬುಮ್ರಾ ಎಸೆದ ಮೊದಲ ಎಸೆತದಲ್ಲೇ ಬೌಂಡರಿ ಬಾರಿಸುವ ಮೂಲಕ ಶತಕ ಪೂರೈಸಿ ಹಲವು ದಾಖಲೆಗಳನ್ನೂ ಬರೆದರು. ಇದು ರೂಟ್​ ಟೆಸ್ಟ್​ ಕ್ರಿಕೆಟ್​ನಲ್ಲಿ ಸಿಡಿಸಿದ 37ನೇ, ಭಾರತದ ವಿರುದ್ಧ 11ನೇ, ಲಾರ್ಡ್ಸ್​ನಲ್ಲಿ 8ನೇ ಮತ್ತು ಇಂಗ್ಲೆಂಡ್​ ನೆಲದಲ್ಲಿ 22ನೇ ಶತಕವೆನಿಸಿದೆ. ಈ ಮೂಲಕ ಅವರು ಟೆಸ್ಟ್​ ಕ್ರಿಕೆಟ್​ ಗರಿಷ್ಠ ಶತಕ ಸಾಧಕರಲ್ಲಿ ರಾಹುಲ್​ ದ್ರಾವಿಡ್​ ಮತ್ತು ಸ್ಟೀವನ್​ ಸ್ಮಿತ್​ರನ್ನು (ತಲಾ 36) ಹಿಂದಿಕ್ಕಿ ಅಗ್ರ 5ರೊಳಗೆ ಪ್ರವೇಶಿಸಿದರು. ಸಚಿನ್​ ತೆಂಡುಲ್ಕರ್​ (51), ಜಾಕ್ಸ್​ ಕಾಲಿಸ್​ (45), ರಿಕಿ ಪಾಂಟಿಂಗ್​ (41), ಕುಮಾರ ಸಂಗಕ್ಕರ (38) ಮೊದಲ 4 ಸ್ಥಾನದಲ್ಲಿದ್ದಾರೆ. ಹಾಲಿ ಕ್ರಿಕೆಟಿಗರ ಪೈಕಿ ಗರಿಷ್ಠ ಟೆಸ್ಟ್​ ಶತಕ ಸಾಧನೆ ರೂಟ್​ ಅವರದಾಗಿದೆ.

ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಗರಿಷ್ಠ ಶತಕ ಸಿಡಿಸಿದ ಸಕ್ರಿಯ ಕ್ರಿಕೆಟಿಗರಲ್ಲಿ ರೂಟ್​ (55) 2ನೇ ಸ್ಥಾನಕ್ಕೇರಿದ್ದಾರೆ. ವಿರಾಟ್​ ಕೊಹ್ಲಿ (82) ಅಗ್ರಸ್ಥಾನದಲ್ಲಿದ್ದಾರೆ. ಭಾರತ ವಿರುದ್ಧ ಗರಿಷ್ಠ ಟೆಸ್ಟ್​ ಶತಕ ಸಿಡಿಸಿದ ಸ್ಟೀವನ್​ ಸ್ಮಿತ್​ (11) ಜತೆ ದಾಖಲೆ ಹಂಚಿಕೊಂಡರು. ಲಾರ್ಡ್ಸ್​ ಮೈದಾನದಲ್ಲಿ ರೂಟ್​ ಸಿಡಿಸಿದ ಸತತ 3ನೇ ಶತಕವೂ ಇದಾಗಿದೆ. ಈ ಮೂಲಕ ಮೈಕೆಲ್​ ವಾನ್​ (2004-05), ಜಾಕ್​ ಹಾಬ್ಸ್​ (1912-26), ದಿಲೀಪ್​ ವೆಂಗ್ಸರ್ಕಾರ್​ (1979-86) ಸಾಧನೆ ಸರಿಗಟ್ಟಿದರು.