ಆರ್​ಸಿಬಿಗೆ ವಿರಾಟ್​ ಕೊಹ್ಲಿ ಮತ್ತೆ ನಾಯಕರಾಗುವುದು ಬಹುತೇಕ ಖಚಿತ! ಹೀಗಿದೆ ಕಾರಣ...

ಬೆಂಗಳೂರು: ಕೇವಲ ಮೂವರು ಭಾರತೀಯ ಆಟಗಾರರನ್ನು ರಿಟೇನ್​ ಮಾಡಿಕೊಂಡು ಐಪಿಎಲ್​ ಮೆಗಾ ಹರಾಜಿಗೆ ತೆರಳಿದ ಆರ್​ಸಿಬಿ ತಂಡ ಈ ಬಾರಿ ಬಹುತೇಕ ಹೊಸ ತಂಡವನ್ನೇ ಕಟ್ಟಿಕೊಂಡಿದೆ. ಕಳೆದ 2 ಆವೃತ್ತಿಗಳ ನಾಯಕ ಫಾಫ್​ ಡು ಪ್ಲೆಸಿಸ್​ರನ್ನು ರಿಲೀಸ್​ ಮಾಡಿದ್ದ ಆರ್​ಸಿಬಿ ತಂಡ ಹರಾಜಿನಲ್ಲಿ ಅವರನ್ನು ಆರ್​ಟಿಎಂ ಮಾಡಿಕೊಳ್ಳಲಿಲ್ಲ. ಜತೆಗೆ ನಾಯಕತ್ವ ವಹಿಸಿಕೊಳ್ಳುವಂಥ ಬೇರೆ ಅನುಭವಿ ಆಟಗಾರರನ್ನೂ ಖರೀದಿಸಲಿಲ್ಲ. ಇದರಿಂದಾಗಿ ವಿರಾಟ್​ ಕೊಹ್ಲಿಗೆ ಮತ್ತೊಮ್ಮೆ ನಾಯಕತ್ವ ನೀಡುವ ಸಾಧ್ಯತೆ ಹೆಚ್ಚಾಗಿದೆ.

ರಿಷಭ್​ ಪಂತ್​, ಕೆಎಲ್​ ರಾಹುಲ್​ ಅಥವಾ ಶ್ರೇಯಸ್​ ಅಯ್ಯರ್​ರಂಥ ನಾಯಕತ್ವ ವಹಿಸಿಕೊಳ್ಳಬಲ್ಲಂಥ ಆಟಗಾರರನ್ನು ಆರ್​ಸಿಬಿ ತಂಡ ಹರಾಜಿನಲ್ಲಿ ಖರೀದಿಸಲಿದೆ ಎಂದು ವರದಿಯಾಗಿದ್ದರೂ, ಹರಾಜು ಟೇಬಲ್​ನಲ್ಲಿ ಅದು ಹುಸಿಯಾಗಿದೆ. ಇದರಿಂದಾಗಿ ಈ ಬಾರಿ, 21 ಕೋಟಿ ರೂ.ಗೆ ರಿಟೇನ್​ ಮಾಡಿಕೊಳ್ಳಲಾಗಿರುವ ಕೊಹ್ಲಿ ಅವರಿಗೇ ಮತ್ತೆ ನಾಯಕತ್ವ ವಹಿಸಲಿದೆ ಎನ್ನಲಾಗಿದೆ.

ಕೊಹ್ಲಿ ಈ ಮುನ್ನ 2013ರಿಂದ 2021ರವರೆಗೆ ಆರ್​ಸಿಬಿ ತಂಡದ ನಾಯಕರಾಗಿದ್ದರು. ಆದರೆ ಬ್ಯಾಟಿಂಗ್​ನತ್ತ ಹೆಚ್ಚಿನ ಗಮನಹರಿಸುವ ಸಲುವಾಗಿ 2022ರ ಆವೃತ್ತಿಗೆ ಮುನ್ನ ನಾಯಕತ್ವ ತ್ಯಜಿಸಿದ್ದರು. ಕಳೆದ ಟಿ20 ವಿಶ್ವಕಪ್​ ಬಳಿಕ ಅವರು ಅಂತಾರಾಷ್ಟ್ರೀಯ ಚುಟುಕು ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಿರುವುದರಿಂದ ಸದ್ಯ ಹೆಚ್ಚಿನ ಹೊರೆ ಹೊಂದಿಲ್ಲ. ಹೀಗಾಗಿ ತನ್ನ ಪ್ರಮುಖ ಕೊರತೆಯಾಗಿರುವ ಐಪಿಎಲ್​ ಟ್ರೋಫಿಯನ್ನು ಈ ಬಾರಿ ನನಸಾಗಿಸಿಕೊಳ್ಳಲು ಅವರು ಮತ್ತೆ ನಾಯಕತ್ವವನ್ನು ಒಪ್ಪಿಕೊಳ್ಳುವ ನಿರೀಕ್ಷೆ ಇದೆ.

https://www.vijayavani.net/mumbai-indians-are-confident-that-they-have-selected-a-strong-team-in-the-ipl-auction