ಈ ಗೆಲುವಿಗೆ ನಾವು ಅರ್ಹರಲ್ಲ...ಮುಂಬೈ ವಿರುದ್ಧ ರೋಚಕ ಜಯ ಸಾಧಿಸಿದ ಬೆನ್ನಲ್ಲೇ ಅಚ್ಚರಿ ಹೇಳಿಕೆ ನೀಡಿದ RCB ನಾಯಕ! Rajat Patidar

Rajat Patidar : ರಾಯ್‌ಪುರದಲ್ಲಿ ಭಾನುವಾರ (ಮೇ 10) ನಡೆದ ರೋಚಕ ಪಂದ್ಯದಲ್ಲಿ ಕೃನಾಲ್ ಪಾಂಡ್ಯ ಅವರ ಅಮೋಘ ಬ್ಯಾಟಿಂಗ್ ನೆರವಿನಿಂದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ( RCB ) ತಂಡ ಮುಂಬೈ ಇಂಡಿಯನ್ಸ್ ವಿರುದ್ಧ ಕೊನೆಯ ಎಸೆತದಲ್ಲಿ ರೋಚಕ ಜಯಭೇರಿ ಬಾರಿಸಿತು. 

167 ರನ್‌ಗಳ ಗುರಿ ಬೆನ್ನಟ್ಟಿದ ರಜತ್ ಪಾಟಿದಾರ್ ನೇತೃತ್ವದ ಆರ್‌ಸಿಬಿ ತಂಡ, ಕೇವಲ 5.1 ಓವರ್‌ಗಳಲ್ಲಿ 39 ರನ್‌ಗಳಿಗೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಈ ಹಂತದಲ್ಲಿ ಜವಾಬ್ದಾರಿಯುತ ಆಟವಾಡಿದ ಕೃನಾಲ್ ಪಾಂಡ್ಯ 46 ಎಸೆತಗಳಲ್ಲಿ 73 ರನ್ ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಕೃನಾಲ್ ವಿಕೆಟ್ ಪತನದ ನಂತರ ಪಂದ್ಯವು ಮುಂಬೈ ಕಡೆಗೆ ವಾಲಿದಂತೆ ಕಂಡರೂ, ಆರ್‌ಸಿಬಿ ಆಟಗಾರರು ಅಂತಿಮ ಎಸೆತದವರೆಗೆ ತಾಳ್ಮೆ ಕಳೆದುಕೊಳ್ಳದೆ ಹೋರಾಡಿ, ಕೊನೆಯ ಎಸೆತದಲ್ಲಿ ಬೇಕಿದ್ದ ಎರಡು ರನ್‌ಗಳನ್ನು ಪಡೆಯುವ ಮೂಲಕ ಜಯದ ನಗೆ ಬೀರಿದರು.

ಪಂದ್ಯದ ನಂತರ ಮಾತನಾಡಿದ ಆರ್‌ಸಿಬಿ ತಂಡದ ನಾಯಕ ರಜತ್ ಪಾಟೀದಾರ್​, ಇದೊಂದು ಅತ್ಯಂತ ರೋಚಕ ಮತ್ತು ಕಠಿಣ ಪಂದ್ಯವಾಗಿತ್ತು ಎಂದು ಅಭಿಪ್ರಾಯಪಟ್ಟರು. ಒಟ್ಟಾರೆಯಾಗಿ ಇದೊಂದು ಅದ್ಭುತ ಆಟವಾಗಿದ್ದು, ವಿಶೇಷವಾಗಿ ಕೃನಾಲ್ ಪಾಂಡ್ಯ ಅವರ ಪ್ರದರ್ಶನವನ್ನು ಶ್ಲಾಘಿಸಿದರು. ನನ್ನ ಪ್ರಕಾರ ಕೃನಾಲ್ ಅವರೇ ತಂಡದ ಗೆಲುವಿನ ರೂವಾರಿ, ಅವರು ನಿಜವಾಗಿಯೂ ತಂಡಕ್ಕಾಗಿ ಈ ಸಾಧನೆ ಮಾಡಿದ್ದಾರೆ ಎಂದು ಕೃನಾಲ್ ವಹಿಸಿದ ಪ್ರಮುಖ ಪಾತ್ರವನ್ನು ಪಾಟೀದಾರ್​ ಕೊಂಡಾಡಿದರು.

ಕೃನಾಲ್ ಪಾಂಡ್ಯ ಅವರನ್ನು ಐದನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿಸಿದ ನಿರ್ಧಾರದ ಬಗ್ಗೆ ಮಾತನಾಡಿದ ನಾಯಕ ರಜತ್ ಪಾಟೀದಾರ್, "ಇದು ತಂಡದ ಮೀಟಿಂಗ್​ಗಳಲ್ಲಿ ಚರ್ಚಿಸಿ ನಾವೆಲ್ಲರೂ ಸೇರಿ ತೆಗೆದುಕೊಂಡ ನಿರ್ಧಾರ" ಎಂದು ತಿಳಿಸಿದರು. ಕೃನಾಲ್ ಅವರು ಈ ಹಿಂದೆ ಕೂಡ ಅದೇ ಕ್ರಮಾಂಕದಲ್ಲಿ ಆಡಿದ್ದ ಅನುಭವ ಹೊಂದಿದ್ದು, ಅವರಿಗೆ ಮತ್ತೊಮ್ಮೆ ಅವಕಾಶ ನೀಡಲು ತಂಡ ಬಯಸಿತ್ತು ಎಂದು ಪಾಟೀದಾರ್​ ವಿವರಿಸಿದರು. ಒತ್ತಡದ ಸಮಯದಲ್ಲಿ ಮತ್ತು ಇಂತಹ ದೊಡ್ಡ ವೇದಿಕೆಗಳಲ್ಲಿ ಅನುಭವಿ ಆಟಗಾರರು ತಮ್ಮ ಸಾಮರ್ಥ್ಯವನ್ನು ಹೇಗೆ ಪ್ರದರ್ಶಿಸುತ್ತಾರೆ ಎಂಬುದಕ್ಕೆ ಕೃನಾಲ್ ಅವರ ಈ ಅಮೋಘ ಆಟವೇ ಸಾಕ್ಷಿ, ಇದು ನಿಜಕ್ಕೂ ನಂಬಲಾಗದ ಪ್ರದರ್ಶನ ಎಂದು ಪಾಟಿದಾರ್ ಮನಸಾರೆ ಮೆಚ್ಚುಗೆ ವ್ಯಕ್ತಪಡಿಸಿದರು.

ಮೊದಲ ಇನಿಂಗ್ಸ್‌ನಲ್ಲಿ ಹಿರಿಯ ವೇಗಿ ಭುವನೇಶ್ವರ್ ಕುಮಾರ್ ಕೇವಲ 23 ರನ್‌ಗಳಿಗೆ 4 ವಿಕೆಟ್ ಪಡೆಯುವ ಮೂಲಕ ತಮ್ಮ ಭರ್ಜರಿ ಫಾರ್ಮ್ ಅನ್ನು ಮುಂದುವರಿಸಿದರು. ಅವರ ಬೌಲಿಂಗ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ ಪಾಟಿದಾರ್, "ಚೆಂಡಿನ ಮೇಲೆ ಭುವನೇಶ್ವರ್ ಅವರಿಗಿರುವ ನಿಯಂತ್ರಣ ಅದ್ಭುತವಾದುದು, ಅಸಮಾನ ಪುಟಿತ ಹಾಗೂ ಎರಡು ರೀತಿಯ ವೇಗ ಹೊಂದಿದ್ದ ಈ ಪಿಚ್‌ನಲ್ಲಿ ಅವರನ್ನು ಎದುರಿಸುವುದು ಬ್ಯಾಟರ್‌ಗಳಿಗೆ ಬಹಳ ಕಷ್ಟಕರವಾಗಿತ್ತು ಎಂದು ಅವರ ಶಿಸ್ತುಬದ್ಧ ದಾಳಿಯನ್ನು ಪಾಟೀದಾರ್​ ಶ್ಲಾಘಿಸಿದರು.

ತಮ್ಮ ಮಾತನ್ನು ಮುಕ್ತಾಯಗೊಳಿಸಿದ ಪಾಟೀದಾರ್, ತಂಡವು ಸದ್ಯ ಅಂಕಪಟ್ಟಿಯ ಬಗ್ಗೆ ತಲೆಕೆಡಿಸಿಕೊಳ್ಳುತ್ತಿಲ್ಲ ಮತ್ತು ಅಂಕಗಳಿಗಿಂತ ಹೆಚ್ಚಾಗಿ ತಮ್ಮ ಸಾಮರ್ಥ್ಯಕ್ಕೆ ತಕ್ಕಂತೆ ಉತ್ತಮ ಕ್ರಿಕೆಟ್ ಆಡುವುದರತ್ತ ಗಮನಹರಿಸುತ್ತಿರುವುದಾಗಿ ತಿಳಿಸಿದರು. ಬೌಲರ್‌ಗಳು ಮುಂಬೈ ತಂಡವನ್ನು 166 ರನ್‌ಗಳಿಗೆ ನಿಯಂತ್ರಿಸುವ ಮೂಲಕ ಅತ್ಯುತ್ತಮ ಕೆಲಸ ಮಾಡಿದ್ದಾರೆ ಮತ್ತು ಆ ಗುರಿಯನ್ನು ಸುಲಭವಾಗಿ ಬೆನ್ನಟ್ಟಬಹುದಿತ್ತು ಎಂದು ಅವರು ಅಭಿಪ್ರಾಯಪಟ್ಟರು. "ನಮ್ಮಲ್ಲಿ ಅತ್ಯಂತ ಕೌಶಲಪೂರ್ಣ ಬ್ಯಾಟಿಂಗ್ ಫಿರಂಗಿ ಪಡೆಯೇ ಇದೆ, ಆದ್ದರಿಂದ ಪಿಚ್ ಅಥವಾ ಪರಿಸ್ಥಿತಿ ಯಾವುದೇ ಇರಲಿ ಈ ಗುರಿಯನ್ನು ನಾವು ಅರಾಮವಾಗಿ ತಲುಪಬೇಕಿತ್ತು; ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಅಂತಿಮ ಎಸೆತದವರೆಗೂ ಹೋರಾಡಬೇಕಾಗಿ ಬಂದ ಕಾರಣ ಈ ಪಂದ್ಯವನ್ನು ನಾವು ಗೆಲ್ಲಲು ಅರ್ಹರಲ್ಲ ಎಂದು ನನಗನ್ನಿಸುತ್ತದೆ" ಎಂದು ಹೇಳುವ ಮೂಲಕ ತಂಡದ ಬ್ಯಾಟಿಂಗ್ ಪ್ರದರ್ಶನ ಇನ್ನಷ್ಟು ಸುಧಾರಿಸಬೇಕಿದೆ ಎಂಬ ಆಶಯವನ್ನು ಪಾಟೀದಾರ್​ ವ್ಯಕ್ತಪಡಿಸಿದರು, (ಏಜೆನ್ಸೀಸ್​).