ಅಂದು ಐಪಿಎಲ್​ನಲ್ಲಿ ಮಿಂಚಿದ್ದ ಪಾಕ್​ ಆಟಗಾರರು: ಆ ಮೇಲೆ ನಿಷೇಧ ಹೇರಿದ್ಯಾಕೆ? ಬ್ಯಾನ್​ ನಂತರವು ಆಡಿದ್ದ ಆ ಆಟಗಾರನ ಬಗ್ಗೆ ನಿಮಗೆಷ್ಟು ಗೊತ್ತು? Pakistani Players in IPL

2008ರ ಮುಂಬೈ ಮೇಲೆ ನಡೆದ ಭಯೋತ್ಪಾದಕ ದಾಳಿ ಕೇವಲ ಭಾರತದ ಭದ್ರತೆಗೆ ಮಾತ್ರವಲ್ಲ, ಕ್ರಿಕೆಟ್ ಲೋಕಕ್ಕೂ ದೊಡ್ಡ ಹೊಡೆತ ನೀಡಿತು. ರಾಜತಾಂತ್ರಿಕ ಸಂಬಂಧಗಳು ಹದಗೆಟ್ಟ ಬೆನ್ನಲ್ಲೇ, ಆಟಗಾರರ ಸುರಕ್ಷತೆಯ ಕಾರಣದಿಂದಾಗಿ ಪಾಕಿಸ್ತಾನಿ ಕ್ರಿಕೆಟಿಗರ ಐಪಿಎಲ್ ಪ್ರಯಾಣಕ್ಕೆ ಬ್ರೇಕ್ ಬಿತ್ತು. ಆರಂಭದಲ್ಲಿ ಇದು ತಾತ್ಕಾಲಿಕ ವಿರಾಮ ಎಂದುಕೊಂಡಿದ್ದ ಅಭಿಮಾನಿಗಳಿಗೆ, ಅದು ದಶಕಗಳ ಮೌನವಾಗಿ ಬದಲಾಗಿದ್ದು ಅರಗಿಸಿಕೊಳ್ಳಲು ಕಷ್ಟಕರವಾದ ಸತ್ಯವಾಗಿ ಬದಲಾಯಿತು.

ಮೊದಲ ಐಪಿಎಲ್‌ನಲ್ಲಿ ಪಾಕ್ ಆಟಗಾರರ ಅಬ್ಬರ ಸ್ವಲ್ಪ ಜೋರಾಗಿಯೇ ಇತ್ತು. ರಾಜಸ್ಥಾನ್ ರಾಯಲ್ಸ್ ತಂಡ ಚೊಚ್ಚಲ ಕಪ್ ಗೆಲ್ಲಲು ವೇಗಿ ಸೊಹೈಲ್ ತನ್ವೀರ್ ಅವರ ಪಾತ್ರ ದೊಡ್ಡದಿತ್ತು. ಅವರು ಆ ಟೂರ್ನಿಯಲ್ಲಿ ಬರೋಬ್ಬರಿ 22 ವಿಕೆಟ್ ಪಡೆದು ಪರ್ಪಲ್ ಕ್ಯಾಪ್ ಗೆದ್ದುಕೊಂಡಿದ್ದರು. ಅಷ್ಟೇ ಅಲ್ಲ, ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಕೇವಲ 14 ರನ್ ನೀಡಿ 6 ವಿಕೆಟ್ ಉರುಳಿಸಿದ್ದು ಇಂದಿಗೂ ದಾಖಲೆಯಾಗಿ ಉಳಿದಿದೆ.

ಪಾಕ್​ ಆಟಗಾರರಿಗೆ ನಿಷೇಧ ಹೇರಿದ ಬಳಿಕ ಫ್ರಾಂಚೈಸಿ ಮಾಲೀಕರು ಮತ್ತು ತಂಡದ ನಾಯಕರು ನಾವು ಪಾಕಿಸ್ತಾನದ ಆಟಗಾರರು ನಮ್ಮ ತಂಡದಲ್ಲಿರುವುದನ್ನು ಮಿಸ್​ ಮಾಡಿಕೊಳ್ಳುತ್ತಿದೆವೆ ಎಂದು ಬಹಿರಂಗವಾಗಿಯೇ ಅನೇಕ ಬಾರಿ ಹೇಳಿದ್ದಾರೆ.

2009ರ ನಂತರ ಪಾಕ್ ಆಟಗಾರರು ಐಪಿಎಲ್‌ನಿಂದ ದೂರವಾದರೂ, ಅಜರ್ ಮಹಮೂದ್ ಮಾತ್ರ ಇದಕ್ಕೆ ಹೊರತಾಗಿದ್ದರು. ಕಾರಣ ಮಹಮೂದ್ ಅವರು ಬ್ರಿಟಿಷ್ ಪಾಸ್‌ಪೋರ್ಟ್ ಹೊಂದಿದ್ದರಿಂದ ಅವರು ಪಾಕಿಸ್ತಾದ ಬದಲು ಇಂಗ್ಲಿಷ್ ಆಟಗಾರನಾಗಿ 2012ರಿಂದ 2015ರವರೆಗೆ ಐಪಿಎಲ್ ಆಡಿದರು. ಇವರು ಪಂಜಾಬ್ ಕಿಂಗ್ಸ್ ( ಕಿಂಗ್ಸ್ ಇಲೆವನ್​ ಪಂಜಾಬ್) ಮತ್ತು ಕೆಕೆಆರ್ ಪರ ಉತ್ತಮ ಪ್ರದರ್ಶನನ್ನು ನೀಡಿದ್ದರು.

ಇತ್ತೀಚೆಗೆ ದಿ ಹಂಡ್ರೆಡ್ ಟೂರ್ನಿಯಲ್ಲಿ ಭಾರತೀಯ ಒಡೆತನದ ಸನ್‌ರೈಸರ್ಸ್ ಫ್ರಾಂಚೈಸಿ, ಪಾಕಿಸ್ತಾನದ ಸ್ಪಿನ್ನರ್ ಅಬ್ರಾರ್ ಅಹ್ಮದ್ ಅವರನ್ನು ಬರೋಬ್ಬರಿ 2.34 ಕೋಟಿ ರೂಪಾಯಿಗೆ ಖರೀದಿಸಿದೆ. ಈ ಘಟನೆ ಹೊಸ ಭರವಸೆ ಜೊತೆಗೆ ಭಾರಿ ಟೀಕೆಗೆ ಸಹ ಕಾರಣವಾಗಿದೆ.

ಭಾರತೀಯ ಒಡೆತನದ ತಂಡವೊಂದು ಪಾಕ್ ಆಟಗಾರನ ಮೇಲೆ ಇಷ್ಟೊಂದು ದೊಡ್ಡ ಮೊತ್ತ ಹೂಡುತ್ತಿರುವುದು, ಮುಂದಿನ ದಿನಗಳಲ್ಲಿ ರಾಜಕೀಯ ಅಡೆತಡೆಗಳು ಕಡಿಮೆಯಾದರೆ ಮತ್ತೆ ಪಾಕ್ ಆಟಗಾರರು ಐಪಿಎಲ್ ಅಂಗಳದಲ್ಲಿ ಕಾಣಿಸಿಕೊಳ್ಳಬಹುದು ಎಂಬ ಆಶಾಕಿರಣವನ್ನು ಚಿಗುರಿಸಿದೆ ಎಂದು ಕ್ರಿಕೆಟ್​ ವಿಶ್ಲೇಷಕರು ಹೇಳುತ್ತಿದ್ದಾರೆ,(ಏಜನ್ಸೀಸ್).