IPL 2027ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​​ಗೆ ಸೇರ್ತಾರಾ ಎಂಐ ನಾಯಕ ಪಾಂಡ್ಯ?!

ಕಳೆದ ಸೀಸನ್‌ನಲ್ಲಿ ಗುಜರಾತ್ ಟೈಟನ್ಸ್ ತಂಡವನ್ನು ತೊರೆದು, ರೋಹಿತ್ ಶರ್ಮಾ ಜಾಗಕ್ಕೆ ಮುಂಬೈ ಇಂಡಿಯನ್ಸ್ ತಂಡದ ನಾಯಕರಾಗಿ ಹಾರ್ದಿಕ್ ಪಾಂಡ್ಯ ಬಂದಾಗಿನಿಂದಲೂ ವಿವಾದಗಳು ಅವರ ಬೆನ್ನ ಬಿಟ್ಟಿಲ್ಲ. ಪ್ರಸ್ತುತ ಮುಂಬೈ ಫ್ರಾಂಚೈಸಿ ಒಳಗಿನ ಆಂತರಿಕ ಭಿನ್ನಾಭಿಪ್ರಾಯಗಳು ಹಾಗೂ ತಂಡದ ಕಳಪೆ ಪ್ರದರ್ಶನದ ಹಿನ್ನೆಲೆಯಲ್ಲಿ ಹಾರ್ದಿಕ್ ಪಾಂಡ್ಯ ಮುಂಬೈ ಕ್ಯಾಂಪ್‌ನಿಂದ ಹೊರನಡೆಯಲು ನಿರ್ಧರಿಸಿದ್ದಾರೆ ಎನ್ನಲಾಗುತ್ತಿದ್ದು, ಸಿಎಸ್‌ಕೆ ಅವರನ್ನು ಸೆಳೆದುಕೊಳ್ಳಲು ಭಾರಿ ಆಸಕ್ತಿ ತೋರಿದೆ ಎಂಬ ಚರ್ಚೆಗಳು ಮುನ್ನೆಲೆಗೆ ಬಂದಿವೆ.

ರೋಹಿತ್ ಶರ್ಮಾ ಅವರನ್ನು ನಾಯಕತ್ವದಿಂದ ಕೆಳಗಿಳಿಸಿ ಹಾರ್ದಿಕ್ ಅವರಿಗೆ ಪಟ್ಟ ಕಟ್ಟಿದ್ದು ಮುಂಬೈ ಅಭಿಮಾನಿಗಳಿಗೆ ಮಾತ್ರವಲ್ಲದೆ, ತಂಡದ ಹಿರಿಯ ಆಟಗಾರರಾದ ಸೂರ್ಯಕುಮಾರ್ ಯಾದವ್ ಮತ್ತು ಜಸ್ಪ್ರೀತ್ ಬುಮ್ರಾ ಅವರಿಗೂ ಇಷ್ಟವಿರಲಿಲ್ಲ. ಮೈದಾನದಲ್ಲಿ ಮತ್ತು ಡ್ರೆಸ್ಸಿಂಗ್ ರೂಮ್‌ನಲ್ಲಿ ಹಾರ್ದಿಕ್ ಪಾಂಡ್ಯ ಒಂಟಿಯಾಗುತ್ತಿರುವ ದೃಶ್ಯಗಳು ಹಲವು ಬಾರಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದವು. ಈ ಆಂತರಿಕ ಕಚ್ಚಾಟದಿಂದ ಹಾರ್ದಿಕ್ ಬೇಸತ್ತಿದ್ದಾರೆ.

ಮುಂಬೈನ ವಾಂಖೆಡೆ ಕ್ರೀಡಾಂಗಣ ಸೇರಿದಂತೆ ದೇಶದ ಬಹುತೇಕ ಮೈದಾನಗಳಲ್ಲಿ ಹಾರ್ದಿಕ್ ಪಾಂಡ್ಯ ಟಾಸ್‌ಗೆ ಬಂದಾಗಲೆಲ್ಲಾ ಪ್ರೇಕ್ಷಕರು ಭಾರಿ ಹೂಟಿಂಗ್(ಗೇಲಿ) ಮಾಡಿ ಅವಮಾನಿಸಿದ್ದರು. ಇದು ಅವರ ಆತ್ಮವಿಶ್ವಾಸಕ್ಕೆ ದೊಡ್ಡ ಪೆಟ್ಟು ನೀಡಿದೆ. ಒತ್ತಡದ ನಡುವೆ ಹಾರ್ದಿಕ್ ಅವರ ವೈಯಕ್ತಿಕ ಪ್ರದರ್ಶನ ಹಾಗೂ ನಾಯಕತ್ವ ಎರಡೂ ಸಂಪೂರ್ಣವಾಗಿ ಕುಸಿದಿದೆ.

ಚೆನ್ನೈ ಸೂಪರ್ ಕಿಂಗ್ಸ್ ತಂಡಕ್ಕೆ ಸದ್ಯ ಮಧ್ಯಮ ಕ್ರಮಾಂಕದಲ್ಲಿ ವೇಗದ ಬೌಲಿಂಗ್ ಮಾಡುವ ಹಾಗೂ ಸ್ಪೋಟಕ ಬ್ಯಾಟಿಂಗ್ ನಡೆಸುವ ಒಬ್ಬ ಬಲಿಷ್ಠ ಭಾರತೀಯ ಆಲ್‌ರೌಂಡರ್ ಅನಿವಾರ್ಯತೆ ಇದೆ. ಶಿವಂ ದುಬೆ ಇದ್ದಾರಾದರೂ ಅವರು ಪೂರ್ಣ ಪ್ರಮಾಣದ ಬೌಲರ್ ಆಗಿ ಕಾಣಿಸಿಕೊಳ್ಳುತ್ತಿಲ್ಲ. ಹೀಗಾಗಿ ಧೋನಿ ಮಾರ್ಗದರ್ಶನದಲ್ಲಿ ಹಾರ್ದಿಕ್ ಅವರನ್ನು ತಂಡಕ್ಕೆ ತಂದರೆ ಸಿಎಸ್‌ಕೆ ಮತ್ತಷ್ಟು ಬಲಿಷ್ಠವಾಗಲಿದೆ ಎಂಬುದು ಫ್ರಾಂಚೈಸಿಯ ಲೆಕ್ಕಾಚಾರ.

ಕ್ರಿಕೆಟ್ ವಿಶ್ಲೇಷಕರ ಪ್ರಕಾರ, ಹಾರ್ದಿಕ್ ಪಾಂಡ್ಯ ಅವರಿಗೆ ಎಂ.ಎಸ್. ಧೋನಿ ಎಂದರೆ ಅಪಾರ ಗೌರವ. ಧೋನಿ ಕೂಡ ಹಾರ್ದಿಕ್ ಅವರ ಆಟದ ಶೈಲಿಯನ್ನು ಇಷ್ಟಪಡುತ್ತಾರೆ. ಈ ಹಿಂದೆ ಫಾರ್ಮ್ ಕಳೆದುಕೊಂಡು ಮುಳುಗುತ್ತಿದ್ದ ಹಲವು ಆಟಗಾರರ (ಉದಾಹರಣೆಗೆ ಅಜಿಂಕ್ಯ ರಹಾನೆ, ಶಿವಂ ದುಬೆ) ವೃತ್ತಿಜೀವನಕ್ಕೆ ಸಿಎಸ್‌ಕೆ ಹೊಸ ಜೀವ ನೀಡಿತ್ತು. ಅದೇ ರೀತಿ ಹಾರ್ದಿಕ್ ಕೂಡ ಚೆನ್ನೈ ಜರ್ಸಿ ಧರಿಸಿದರೆ ಅವರ ಕಳೆದುಹೋದ ಫಾರ್ಮ್ ಮತ್ತು ಗೌರವ ಮರಳಿ ಸಿಗಬಹುದು ಎಂಬ ಊಹಾಪೋಹಗಳಿಗೆ ರೆಕ್ಕೆಪುಕ್ಕ ಬಂದಿದೆ.

ಐಪಿಎಲ್ 2027ರ ಮೆಗಾ ಹರಾಜಿಗೂ ಮುನ್ನವೇ ಈ ದೊಡ್ಡ ಟ್ರೇಡಿಂಗ್ ಪ್ರಕ್ರಿಯೆ ನಡೆಯಲಿದೆಯೇ ಅಥವಾ ಹಾರ್ದಿಕ್ ಹರಾಜಿನ ಮೂಲಕ ಸಿಎಸ್‌ಕೆ ಸೇರಲಿದ್ದಾರೆಯೇ ಎಂಬುದು ಸದ್ಯದ ಸಸ್ಪೆನ್ಸ್. ಒಂದು ವೇಳೆ ಈ ಸುದ್ದಿ ನಿಜವಾದರೆ, ಐಪಿಎಲ್ ಇತಿಹಾಸದಲ್ಲೇ ಇದು ಅತ್ಯಂತ ದೊಡ್ಡ ಆಟಗಾರರ ಅದಲು-ಬದಲು ಪ್ರಕ್ರಿಯೆಯಾಗಲಿದೆ ಎಂದು ಹೇಳಲಾಗುತ್ತಿದೆ,(ಏಜೆನ್ಸೀಸ್​).