ಅವಕಾಶ ಸಿಕ್ಕರೆ ನರೇಂದ್ರ ಮೋದಿ ಕ್ರೀಡಾಂಗಣವನ್ನು ಕೆಡವಿ ಮತ್ತೆ ನಿರ್ಮಿಸುತ್ತೇನೆ: ಲಲಿತ್​ ಮೋದಿ ಹೇಳಿಕೆ ಹಿಂದಿದೆ ಈ ಕಾರಣ... Narendra Modi stadium

ನವದೆಹಲಿ: ಒಂದು ವೇಳೆ ಅವಕಾಶ ಸಿಕ್ಕರೆ ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣವನ್ನು ( Narendra Modi stadium ) ನೆಲಸಮ ಮಾಡಿ ಮರುನಿರ್ಮಾಣ ಮಾಡುವುದಾಗಿ ಐಪಿಎಲ್​ ಜನಕ ಹಾಗೂ ಬಿಸಿಸಿಐ ಮಾಜಿ ಆಡಳಿತಗಾರ ಲಲಿತ್ ಮೋದಿ ಅಚ್ಚರಿ ಹೇಳಿಕೆ ನೀಡಿದ್ದಾರೆ.

ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಟಿ20 ವಿಶ್ವಕಪ್ 2026ರ ಫೈನಲ್ ಹಾಗೂ ಐಪಿಎಲ್ 2026ರ ಫೈನಲ್ ಪಂದ್ಯ ಸೇರಿದಂತೆ ಹಲವು ಹೈ-ಪ್ರೊಫೈಲ್ ಕ್ರಿಕೆಟ್ ಪಂದ್ಯಗಳಿಗೆ ಈ ಕ್ರೀಡಾಂಗಣವು ಆತಿಥ್ಯ ವಹಿಸಿದೆ. ಹೀಗಿರುವಾಗ, ಅವಕಾಶ ಸಿಕ್ಕರೆ ಪ್ರತಿಷ್ಠಿತ ಕ್ರೀಡಾಂಗಣವನ್ನು ಹೊಡೆದು ಮರು ನಿರ್ಮಾಣ ಮಾಡುತ್ತೇನೆಂದು ಲಲಿತ್​ ಮೋದಿ ಹೇಳಿಕೆ ನೀಡಿರುವುದು ಹಲವರ ಕುತೂಹಲಕ್ಕೆ ಕಾರಣವಾಗಿದೆ.

ಐಪಿಎಲ್​​ ಮಾಜಿ ಅಧ್ಯಕ್ಷ ಲಲಿತ್ ಮೋದಿ ಅವರ ಪ್ರಕಾರ, ನರೇಂದ್ರ ಮೋದಿ ಕ್ರೀಡಾಂಗಣವನ್ನು ಸಂಪೂರ್ಣವಾಗಿ ಪ್ರೇಕ್ಷಕ ಸ್ನೇಹಿ ಆಯಾಮದಲ್ಲಿ ಮರುನಿರ್ಮಾಣ ಮಾಡಿದರೆ, ಅದನ್ನು ವಿಶ್ವದ ಅತ್ಯಂತ ಪ್ರಮುಖ ಕ್ರೀಡಾ ತಾಣಗಳಲ್ಲಿ ಒಂದಾಗಿ ಪರಿವರ್ತಿಸಬಹುದು ಎಂದಿದ್ದಾರೆ.

ಇತ್ತೀಚೆಗೆ 'ಹ್ಯೂಮನ್ಸ್ ಆಫ್ ಬಾಂಬೆ' ಪಾಡ್‌ಕಾಸ್ಟ್‌ನಲ್ಲಿ ಕಾಣಿಸಿಕೊಂಡಿದ್ದ ಲಲಿತ್​ ಮೋದಿ, ನಾನೇನಾದರೂ ಇಂದು ಅಲ್ಲಿ ಅಧಿಕಾರದಲ್ಲಿ ಇದ್ದಿದ್ದರೆ, ಆ ಕ್ರೀಡಾಂಗಣವನ್ನು ಕೆಡವಿ ಸಂಪೂರ್ಣವಾಗಿ ಹೊಸದಾಗಿ ನಿರ್ಮಿಸುತ್ತಿದ್ದೆ. ಅತ್ಯಾಧುನಿಕ ಎಸ್ಕಲೇಟರ್‌ಗಳು, ಅಡುಗೆಮನೆಗಳು ಮತ್ತು ರೆಸ್ಟೋರೆಂಟ್‌ಗಳನ್ನು ಅಳವಡಿಸಿ, ವರ್ಷದ 365 ದಿನಗಳೂ ಜನರು ಭೇಟಿ ನೀಡುವಂತಹ ಸುಂದರ ಪ್ರವಾಸಿ ತಾಣವನ್ನಾಗಿ ಮಾಡುತ್ತಿದ್ದೆ ಎಂದು ಹೇಳಿಕೆ ನೀಡಿದ್ದಾರೆ

ಕ್ರೀಡಾಂಗಣವು ಕೇವಲ ಕ್ರಿಕೆಟ್‌ಗೆ ಮಾತ್ರ ಸೀಮಿತವಾಗದೆ ಶಾಪಿಂಗ್ ಏರಿಯಾಗಳು, ಮನರಂಜನಾ ವಲಯಗಳು, ಸುಧಾರಿತ ಕೂಲಿಂಗ್ ಸಿಸ್ಟಮ್‌ಗಳು ಮತ್ತು ಪ್ರೀಮಿಯಂ ಹಾಸ್ಪಿಟಾಲಿಟಿ ಸೌಲಭ್ಯಗಳನ್ನು ಹೊಂದಿರಬೇಕು ಎಂಬುದು ನನ್ನ ಆಲೋಚನೆಯಾಗಿದೆ. ಪ್ರಸ್ತುತ ಲಭ್ಯವಿರುವ ತಂತ್ರಜ್ಞಾನವನ್ನು ಬಳಸಿ ಫೈವ್​ ಸ್ಟಾರ್ ಗುಣಮಟ್ಟದ ಸ್ನಾನಗೃಹಗಳು, ಸ್ವಯಂಚಾಲಿತವಾಗಿ ಸ್ವಚ್ಛಗೊಳ್ಳುವ ಶೌಚಾಲಯಗಳು ಮತ್ತು ಅತ್ಯಾಧುನಿಕ ಮೂಲಸೌಕರ್ಯಗಳನ್ನು ನಿರ್ಮಿಸಬಹುದು ಎಂದಿರುವ ಲಲಿತ್​ ಮೋದಿ, ಪಂದ್ಯ ವೀಕ್ಷಿಸಲು ಬರುವ ಅಭಿಮಾನಿಗಳು ಕೇವಲ ಐದು ನಿಮಿಷಗಳಲ್ಲಿ ಕ್ರೀಡಾಂಗಣದ ಒಳಗೆ ಪ್ರವೇಶಿಸಲು ಮತ್ತು ಹೊರಹೋಗಲು ಸಾಧ್ಯವಾಗುವಂತಹ ಅತ್ಯುತ್ತಮ ವ್ಯವಸ್ಥೆ ಇರಬೇಕು ಎಂದು ಪ್ರತಿಪಾದಿಸಿದ್ದಾರೆ.

ಭಾರತದಲ್ಲಿರುವ ಬಹುತೇಕ ಕ್ರೀಡಾಂಗಣಗಳು ಪ್ರೇಕ್ಷಕರ ಒಟ್ಟಾರೆ ಅನುಭವ ಮತ್ತು ಸೌಕರ್ಯಗಳಿಗಿಂತ ಹೆಚ್ಚಾಗಿ ಕೇವಲ ಆದಾಯ ಗಳಿಕೆಗೆ ಆದ್ಯತೆ ನೀಡುತ್ತಿವೆ ಎಂದು ಲಲಿತ್ ಮೋದಿ ಅಸಮಾಧಾನ ಹೊರಹಾಕಿದ್ದಾರೆ. ಪಂದ್ಯವು ಮೂರು ಗಂಟೆಗಳ ಕಾಲ ನಡೆದರೂ, ಅಭಿಮಾನಿಗಳು ಅದಕ್ಕಿಂತ ಸಾಕಷ್ಟು ಮುಂಚಿತವಾಗಿಯೇ ಕ್ರೀಡಾಂಗಣಕ್ಕೆ ಆಗಮಿಸುತ್ತಾರೆ. ಸಣ್ಣ ಮಕ್ಕಳೊಂದಿಗೆ ಬರುವ ಅವರು ಅಲ್ಲಿ ಸುಮಾರು ನಾಲ್ಕರಿಂದ ಐದು ಗಂಟೆಗಳ ಕಾಲ ಕಳೆಯುತ್ತಾರೆ. ಅಂತಹ ಸಂದರ್ಭದಲ್ಲಿ ಅವರಿಗೆ ನೈರ್ಮಲ್ಯಯುತ ಸೌಲಭ್ಯಗಳು, ಗುಣಮಟ್ಟದ ಆಹಾರ ಮತ್ತು ಆರಾಮದಾಯಕ ವಾತಾವರಣದ ಅಗತ್ಯವಿರುತ್ತದೆ. ಆದರೆ, ಪ್ರಸ್ತುತ ಭಾರತದ ಕ್ರೀಡಾಂಗಣಗಳಲ್ಲಿ ಇದೇ ಮುಖ್ಯವಾಗಿ ಮಿಸ್ಸಿಂಗ್ ಆಗಿದೆ ಎಂದು ಮೋದಿ ಕಳವಳ ವ್ಯಕ್ತಪಡಿಸಿದ್ದಾರೆ.

ಕ್ರೀಡಾಂಗಣಗಳು ಕೇವಲ ಪಂದ್ಯ ನಡೆಯುವ ದಿನಗಳಿಗಷ್ಟೇ ಸೀಮಿತವಾಗದೆ ಅದರಾಚೆಗೂ ಬೆಳೆಯಬೇಕು ಎಂದು ಅವರು ವಾದಿಸಿದ್ದಾರೆ. ಯಾವುದೇ ಕ್ರೀಡಾಕೂಟಗಳು ಇಲ್ಲದ ದಿನಗಳಲ್ಲೂ ಇವು ಸದಾ ಸಕ್ರಿಯವಾಗಿರುವ ಮತ್ತು ಜನರನ್ನು ಆಕರ್ಷಿಸುವ ವರ್ಷಪೂರ್ತಿ ಮನರಂಜನೆ ನೀಡುವ ಹಬ್‌ಗಳಾಗಿ ಬದಲಾಗಬೇಕು. ಇದರಲ್ಲಿಯೇ ಕ್ರೀಡಾಂಗಣಗಳ ಭವಿಷ್ಯ ಅಡಗಿದೆ ಎನ್ನುವುದು ನನ್ನ ಅಭಿಪ್ರಾಯವಾಗಿದೆ ಎಂದು ಲಲಿತ್​ ಮೋದಿ ಹೇಳಿದ್ದಾರೆ.

ಅಂದಹಾಗೆ, ಹಣಕಾಸು ವಂಚನೆ ಆರೋಪದ ಹಿನ್ನೆಲೆಯಲ್ಲಿ ಭಾರತಕ್ಕೆ ಬೇಕಾಗಿರುವ ಮೋಸ್ಟ್‌ ವಾಂಟೆಡ್‌ ವ್ಯಕ್ತಿಯಾಗಿರುವ ಲಲಿತ್ ಮೋದಿ, ಕಳೆದ 16 ವರ್ಷಗಳಿಂದ ಲಂಡನ್‌ನಲ್ಲಿ ವಾಸಿಸುತ್ತಿದ್ದಾರೆ, (ಏಜೆನ್ಸೀಸ್​).