ಎಚ್ಚೆತ್ತುಕೊಳ್ಳದಿದ್ರೆ ಕಷ್ಟ... ಟೀಮ್​​​​ ಇಂಡಿಯಾ ಪರ ಆಡುವ ಮುನ್ನ ವೈಭವ್​ಗೆ ಮಹತ್ವದ ಸಲಹೆ ಕೊಟ್ಟ ಕೈಫ್​! Vaibhav Sooryavanshi

Vaibhav Sooryavanshi : ರಾಜಸ್ಥಾನ ರಾಯಲ್ಸ್ ತಂಡದ ಉದಯೋನ್ಮುಖ ಆಟಗಾರ ವೈಭವ್ ಸೂರ್ಯವಂಶಿ ಭಾರತ ತಂಡದ ಪರ ಆಡುವ ಮುನ್ನ ತಮ್ಮ ಫೀಲ್ಡಿಂಗ್ ಕೌಶಲ್ಯವನ್ನು ಸುಧಾರಿಸಿಕೊಳ್ಳುವ ಅಗತ್ಯವಿದೆ ಎಂದು ಭಾರತದ ಮಾಜಿ ಕ್ರಿಕೆಟಿಗ ಮೊಹಮ್ಮದ್ ಕೈಫ್ ಅಭಿಪ್ರಾಯಪಟ್ಟಿದ್ದಾರೆ. 

ಕೇವಲ 15 ವರ್ಷದ ವೈಭವ್ ಸೂರ್ಯವಂಶಿ ತಮ್ಮ ಬಿರುಸಿನ ಬ್ಯಾಟಿಂಗ್ ಪ್ರದರ್ಶನದಿಂದ ದೇಶಾದ್ಯಂತ ಭಾರಿ ಸುದ್ದಿಯಾಗಿದ್ದರೂ, ಮುಂಬರುವ ದಿನಗಳಲ್ಲಿ ಅವರು ಬ್ಯಾಟಿಂಗ್ ಜೊತೆಗೆ ತಮ್ಮ ಫೀಲ್ಡಿಂಗ್ ವಿಭಾಗದ ಮೇಲೂ ಹೆಚ್ಚಿನ ಗಮನ ಹರಿಸಬೇಕಾಗಿದೆ ಎಂದು ಕೈಫ್ ವಿಶೇಷವಾಗಿ ಒತ್ತಿ ಹೇಳಿದ್ದಾರೆ.

ಜಿಯೋಸ್ಟಾರ್‌ನ 'ಚಾಂಪಿಯನ್ಸ್ ವಾಲಿ ಕಾಮೆಂಟರಿ' ಶೋನಲ್ಲಿ ಮಾತನಾಡಿದ ಮೊಹಮ್ಮದ್ ಕೈಫ್, ಯುವ ಆಟಗಾರ ವೈಭವ್ ಸೂರ್ಯವಂಶಿ ಈ ಸೀಸನ್‌ನಲ್ಲಿ ಇನ್ನೂ ಒಂದು ಕ್ಯಾಚ್ ಕೂಡ ಹಿಡಿದಿಲ್ಲ ಎಂಬುದನ್ನು ಎತ್ತಿ ತೋರಿಸಿದ್ದಾರೆ. ನನ್ನ ಪ್ರಕಾರ ಫ್ರಾಂಚೈಸಿಗಳ ಸ್ಕೌಟ್‌ಗಳು (ಪ್ರತಿಭೆಗಳನ್ನು ಗುರುತಿಸುವವರು) ಆಟಗಾರರನ್ನು ಆಯ್ಕೆ ಮಾಡುವಾಗ ಅವರ ಬ್ಯಾಟಿಂಗ್ ಜೊತೆಗೆ ಕಡ್ಡಾಯವಾಗಿ ಫೀಲ್ಡಿಂಗ್ ಪರೀಕ್ಷೆಯನ್ನೂ ನಡೆಸಬೇಕು ಎಂದು ಕೈಫ್ ಈ ಕಾರ್ಯಕ್ರಮದಲ್ಲಿ ಮುಕ್ತವಾಗಿ ಹೇಳಿದ್ದಾರೆ.

ಸ್ಕೌಟ್‌ಗಳು ಅತ್ಯುತ್ತಮ ಆಟಗಾರರನ್ನೇ ಹುಡುಕಿ ತರುತ್ತಿದ್ದಾರೆ, ಅವರ ಕೆಲಸ ನಿಜಕ್ಕೂ ಶ್ಲಾಘನೀಯ. ಆದರೆ, ವೈಭವ್ ಸೂರ್ಯವಂಶಿ ಇದುವರೆಗೆ ಒಂದೂ ಕ್ಯಾಚ್ ಹಿಡಿಯದಿರುವುದನ್ನು ನಾನು ಗಮನಿಸಿದ್ದೇನೆ. ಅವರು ಮುಂದೊಂದು ದಿನ ಭಾರತ ತಂಡದ ಪರ ಆಡಬೇಕೆಂದರೆ ತಮ್ಮ ಫೀಲ್ಡಿಂಗ್ ಸಾಮರ್ಥ್ಯವನ್ನು ಹೆಚ್ಚಿಸಿಕೊಳ್ಳಲೇಬೇಕು ಮತ್ತು ಮೊದಲು ಫೀಲ್ಡಿಂಗ್ ಟೆಸ್ಟ್ ಪಾಸ್ ಮಾಡಬೇಕು. ಬ್ಯಾಟರ್ ಸಾಹಿಲ್ ಪಾರಖ್ ಬಾರಿಸಿದ ಶಾಟ್‌ನಿಂದ ಚೆಂಡು ಸೂರ್ಯವಂಶಿ ಅವರ ಬಳಿಗೆ ಉತ್ತಮ ಎತ್ತರದಲ್ಲೇ ಬಂದಿತ್ತು, ಸಾಮಾನ್ಯವಾಗಿ ಫ್ಲಿಕ್ ಶಾಟ್ ಆಡಿದಾಗ ಫೀಲ್ಡರ್‌ಗೆ ಚೆಂಡು ಕಾಣಿಸದೆ ಕ್ಯಾಚ್ ಹಿಡಿಯುವುದು ಕಷ್ಟವಾಗುತ್ತದೆ, ಆದರೆ ಈ ಸಂದರ್ಭದಲ್ಲಿ ಚೆಂಡು ಕೈಗೆ ಸಿಗುವಷ್ಟು ಉತ್ತಮ ಹೈಟ್‌ನಲ್ಲಿದ್ದರೂ ಸೂರ್ಯವಂಶಿಯವರು ಕ್ಯಾಚ್ ಕೈಬಿಟ್ಟಿದ್ದಾರೆ ಎಂದು ಕೈಫ್ ವಿವರಿಸಿದ್ದಾರೆ.

ಕ್ಯಾಚ್ ಹಿಡಿಯಲು ಸೂರ್ಯವಂಶಿ ಸರಿಯಾದ ಸ್ಥಾನಕ್ಕೆ (ಪೊಸಿಷನ್‌) ಬರುವ ಮೂಲಕ ಅತ್ಯುತ್ತಮ ಕೆಲಸವನ್ನೇ ಮಾಡಿದ್ದರು, ಆದರೆ ಅದನ್ನು ಸರಿಯಾಗಿ ಕಾರ್ಯಗತಗೊಳಿಸುವ ಅವಕಾಶವನ್ನು ಕೈಚೆಲ್ಲಿದರು. ಆ ಕ್ಯಾಚ್ ಹಿಡಿಯಲು ಸೂರ್ಯವಂಶಿ ಜಂಪ್ ಮಾಡುವ ಯಾವುದೇ ಅಗತ್ಯವಿರಲಿಲ್ಲ, ಬದಲಿಗೆ ಕೇವಲ ತಮ್ಮ ಸೊಂಟದ ಭಾಗದ ಹತ್ತಿರವೇ ಸುಲಭವಾಗಿ ಕ್ಯಾಚ್ ಪಡೆಯಬಹುದಿತ್ತು, ಆದರೆ ಅವರು ಅದನ್ನು ಮಿಸ್ ಮಾಡಿಕೊಂಡರು. ಬ್ಯಾಟಿಂಗ್‌ನಲ್ಲಿ ವೈಭವ್ ನಿಜಕ್ಕೂ ಅದ್ಭುತ ಪ್ರತಿಭಾವಂತ ಎಂಬುದರಲ್ಲಿ ಯಾವುದೇ ಸಂದೇಹವಿಲ್ಲ, ಆದರೆ ಫೀಲ್ಡಿಂಗ್ ವಿಷಯಕ್ಕೆ ಬಂದರೆ ಅವರು ಇನ್ನೂ ಅಂತಾರಾಷ್ಟ್ರೀಯ ಮಟ್ಟಕ್ಕೆ ಸಿದ್ಧರಾಗಿಲ್ಲ" ಎಂದು ಮೊಹಮ್ಮದ್ ಕೈಫ್ ವಿಶ್ಲೇಷಿಸಿದ್ದಾರೆ.

ಜಿಯೋಹಾಟ್‌ಸ್ಟಾರ್‌ನ 'ಚಾಂಪಿಯನ್ಸ್ ವಾಲಿ ಕಾಮೆಂಟರಿ' ಶೋನಲ್ಲಿ ಮಾತನಾಡಿದ ಜಿಯೋಸ್ಟಾರ್ ತಜ್ಞ ಹಾಗೂ ಭಾರತದ ಮಾಜಿ ಸ್ಪಿನ್ನರ್ ಹರ್ಭಜನ್ ಸಿಂಗ್, 'ಭಯವಿಲ್ಲದ ಅಸಾಧಾರಣ ಪ್ರತಿಭೆ' ವೈಭವ್ ಸೂರ್ಯವಂಶಿಗೆ ಬೌಲಿಂಗ್ ಮಾಡುವ ಸವಾಲಿನ ಬಗ್ಗೆ ಚರ್ಚಿಸಿದ್ದಾರೆ. ವೈಭವ್ ಸೂರ್ಯವಂಶಿ ವಿರುದ್ಧ ಬೌಲಿಂಗ್ ಮಾಡುವಾಗ, ಹೇಗಾದರೂ ಮಾಡಿ ಅವರ ವಿಕೆಟ್ ಪಡೆಯುವುದೇ ನನ್ನ ಯೋಜನೆಯಾಗಿರುತ್ತದೆ. ಆದರೆ, ಅವರು ಯಾವ ರೀತಿಯ ಫಾರ್ಮ್‌ನಲ್ಲಿದ್ದಾರೆ ಎಂಬುದು ಇಲ್ಲಿ ಪ್ರಮುಖವಾಗುತ್ತದೆ. ಚೆಂಡನ್ನು ಚೆನ್ನಾಗಿ ಸ್ಪಿನ್ ಮಾಡಿ, ಅವರ ಹಿಟ್ಟಿಂಗ್ ಆರ್ಕ್‌ನಿಂದ (ಬ್ಯಾಟ್ ಬೀಸುವ ವ್ಯಾಪ್ತಿ) ದೂರ ಇಡುವುದು ನನ್ನ ಪ್ಲಾನ್ ಆಗಿರುತ್ತದೆ. ಅವರು ಕ್ರೀಸ್ ಬಿಟ್ಟು ಮುನ್ನುಗ್ಗಿ ಬಂದು ನನಗೆ ಸಿಕ್ಸರ್ ಬಾರಿಸಲು ಯತ್ನಿಸಿದರೂ ಪರವಾಗಿಲ್ಲ, ಆದರೆ ಕ್ರೀಸ್‌ನಲ್ಲಿ ಒಂದೇ ಕಡೆ ನಿಂತು ಸುಲಭವಾಗಿ ಶಾಟ್‌ಗಳನ್ನು ಆಡಲು ನಾನು ಬಿಡುವುದಿಲ್ಲ" ಎಂದು ಹರ್ಭಜನ್ ತಮ್ಮ ಬೌಲಿಂಗ್ ತಂತ್ರವನ್ನು ಹಂಚಿಕೊಂಡಿದ್ದಾರೆ.

ಮುಂದುವರಿದು ಮಾತನಾಡಿದ ಭಜ್ಜಿ, 15 ವರ್ಷದ ಈ ಯುವ ಆಟಗಾರನ ಬ್ಯಾಟಿಂಗ್ ಶೈಲಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ವೈಭವ್​ ಅವರು ಕೇವಲ 15 ವರ್ಷದ ವಯಸ್ಸಿನಲ್ಲೇ ಪ್ರತಿಯೊಬ್ಬ ಬೌಲರ್‌ನನ್ನೂ ಸಿಕ್ಸರ್‌ಗೆ ಅಟ್ಟುವಂತಹ ಅದ್ಭುತ ಬ್ಯಾಟರ್ ಆಗಿದ್ದಾರೆ. ನಾನು ನನ್ನ ವೃತ್ತಿಜೀವನದಲ್ಲಿ ಅದೆಷ್ಟೋ ದಿಗ್ಗಜ ಆಟಗಾರರೊಂದಿಗೆ ಆಡಿದ್ದೇನೆ, ಆದರೆ ಮೊದಲ ಎಸೆತದಿಂದಲೇ ಪ್ರತಿಯೊಬ್ಬ ಬೌಲರ್ ಮೇಲೂ ಈ ರೀತಿಯಾಗಿ ಸವಾರಿ ಮಾಡುವ ಬ್ಯಾಟರ್ ಅನ್ನು ನಾನು ನನ್ನ ಬದುಕಿನಲ್ಲಿ ನೋಡಿಲ್ಲ. ನಾನು ವಿಶ್ವದ ಅಪಾಯಕಾರಿ ಬ್ಯಾಟರ್ ಕ್ರಿಸ್ ಗೇಲ್ ಅವರನ್ನೇ ಅದೆಷ್ಟೋ ಬಾರಿ ಔಟ್ ಮಾಡಿದ್ದೇನೆ, ಆದರೆ ಸೂರ್ಯವಂಶಿ ಅವರ ಬ್ಯಾಟಿಂಗ್ ಮಟ್ಟವೇ ಬೇರೆಯಾಗಿದೆ. ಅವರ ಬ್ಯಾಟ್ ಫ್ಲೋ (ಬ್ಯಾಟ್ ಬೀಸುವ ವೇಗ ಮತ್ತು ಶೈಲಿ) ನಿಜಕ್ಕೂ ಅದ್ಭುತವಾಗಿದ್ದು, ಇಂತಹದ್ದನ್ನು ನಾನು ಇದುವರೆಗೆ ಎಲ್ಲಿಯೂ ನೋಡಿಯೇ ಇಲ್ಲ ಎಂದು ಗುಣಗಾನ ಮಾಡಿದ್ದಾರೆ.

ಟಾಟಾ ಐಪಿಎಲ್ (TATA IPL) ಪಂದ್ಯಾವಳಿಯುದ್ದಕ್ಕೂ ಪ್ರತಿದಿನ ಇಂತಹ ಮತ್ತಷ್ಟು ರೋಚಕ ಹಾಗೂ ಆಳವಾದ ವಿಶ್ಲೇಷಣೆಗಳನ್ನು ಕೇವಲ ಜಿಯೋಸ್ಟಾರ್‌ನ 'ಚಾಂಪಿಯನ್ಸ್ ವಾಲಿ ಕಾಮೆಂಟರಿ'ಯಲ್ಲಿ (JioStar's 'Champions Waali Commentary') ವೀಕ್ಷಿಸಬಹುದಾಗಿದೆ, (ಏಜೆನ್ಸೀಸ್​).