IPL ಮಿನಿ ಹರಾಜಿನ 215 ಕೋಟಿಯ ಒಟ್ಟು ಮೊತ್ತದಲ್ಲಿ ಶೇ.40 ರಷ್ಟು ದೋಚಿದ ಈ 5 ಆಟಗಾರರು! IPL 2026 Auction

ನವದೆಹಲಿ: ಬಹುನಿರೀಕ್ಷಿತ ಐಪಿಎಲ್ ಮಿನಿ ಹರಾಜು-2026 ( IPL 2026 Auction ) ಮಂಗಳವಾರ (ಡಿ.16)ಅಬುಧಾಬಿಯಲ್ಲಿ ನಡೆಯಿತು. ಹರಾಜಿಗೆ ಇಳಿದ ಒಟ್ಟು 369 ಆಟಗಾರರಲ್ಲಿ ಕೇವಲ 77 ಆಟಗಾರರು ಮಾರಾಟವಾದರು. ಈ ಪೈಕಿ 48 ಭಾರತೀಯ ಆಟಗಾರರು ಮತ್ತು 29 ವಿದೇಶಿ ಆಟಗಾರರು. ಒಟ್ಟು 10 ಫ್ರಾಂಚೈಸಿಗಳು ಒಟ್ಟು 215.45 ಕೋಟಿ ರೂ.ಗಳನ್ನು ಈ ಹರಾಜಿನಲ್ಲಿ ಖರ್ಚು ಮಾಡಿದವು. ಈ ಒಟ್ಟು ಹಣದಲ್ಲಿ ಶೇ. 40 ರಷ್ಟು ಹಣವನ್ನು ಕೇವಲ ಐದು ಆಟಗಾರರಿಗೆ ಖರ್ಚು ಮಾಡಲಾಗಿದೆ ಎಂಬುದು ಗಮನಾರ್ಹ ಸಂಗತಿ.

ಈ ಬಾರಿಯ ಮಿನಿ ಹರಾಜಿನಲ್ಲಿ ಕ್ಯಾಮರೂನ್ ಗ್ರೀನ್ ಅತ್ಯಂತ ದುಬಾರಿ ಆಟಗಾರ ಎನಿಸಿಕೊಂಡರು. ಅವರನ್ನು ಕೋಲ್ಕತ ನೈಟ್ ರೈಡರ್ಸ್ ತಂಡ 25.20 ಕೋಟಿ ರೂಪಾಯಿಗಳಿಗೆ ಖರೀದಿಸಿತು. ಐಪಿಎಲ್ ಇತಿಹಾಸದಲ್ಲಿ ಅತ್ಯಂತ ದುಬಾರಿ ವಿದೇಶಿ ಆಟಗಾರನೆಂಬ ಇತಿಹಾಸವನ್ನು ಗ್ರೀನ್​ ನಿರ್ಮಿಸಿದರು. ಈ ಹಿಂದೆ ಅಂದರೆ, 2023ರ ಹರಾಜಿನಲ್ಲಿ ಗ್ರೀನ್ 17.50 ಕೋಟಿ ರೂಪಾಯಿಗಳಿಗೆ ಮಾರಾಟವಾಗಿದ್ದರು.

ಮಥೀಶ ಪತಿರಣಗೆ 18 ಕೋಟಿ

ಈ ಹರಾಜಿನಲ್ಲಿ, ಶ್ರೀಲಂಕಾದ ಯುವ ವೇಗಿ ಮಥೀಶ ಪತಿರಣ ಅವರನ್ನು ಕೆಕೆಆರ್ ತಂಡವು ಗ್ರೀನ್ ನಂತರ ಎರಡನೇ ಅತಿ ಹೆಚ್ಚು ಬಿಡ್ ಮಾಡಿತು. ಅವರನ್ನು 18 ಕೋಟಿಗೆ ಖರೀದಿಸಲಾಯಿತು. ಅಂದರೆ, ಈ ಇಬ್ಬರು ಆಟಗಾರರಿಗಾಗಿ ಕೆಕೆಆರ್ 43.20 ಕೋಟಿ ರೂ. ಖರ್ಚು ಮಾಡಿದೆ.

ಎಲ್ಲರ ನಿರೀಕ್ಷೆಗಳನ್ನು ಅಚ್ಚರಿಗೊಳಿಸುತ್ತಾ, ಚೆನ್ನೈ ಸೂಪರ್ ಕಿಂಗ್ಸ್ ಇಬ್ಬರು ಹೊಸ ಆಟಗಾರರ ಮೇಲೆ ಭಾರಿ ಮೊತ್ತವನ್ನು ಖರ್ಚು ಮಾಡಿತು. ಚೆನ್ನೈ ಫ್ರಾಂಚೈಸಿ ಕಾರ್ತಿಕ್ ಶರ್ಮಾ ಮತ್ತು ಪ್ರಶಾಂತ್ ವೀರ್ ಅವರನ್ನು ತಲಾ 14.20 ಕೋಟಿಗೆ ಖರೀದಿಸಿದರು. ಅಂದರೆ ಸಿಎಸ್‌ಕೆ ಈ ಇಬ್ಬರ ಮೇಲೆ 28.40 ಕೋಟಿ ಖರ್ಚು ಮಾಡಿದೆ.

ಈ ಹರಾಜಿನ ಮೊದಲ ಸುತ್ತಿನಲ್ಲಿ ಲಿಯಾಮ್ ಲಿವಿಂಗ್‌ಸ್ಟೋನ್ ಮಾರಾಟವಾಗಲಿಲ್ಲ. ಆದರೆ, ಹರಾಜು ಪುನರಾರಂಭವಾದಾಗ ಅವರ ಅದೃಷ್ಟ ಬದಲಾಯಿತು. ಸನ್‌ರೈಸರ್ಸ್ ಹೈದರಾಬಾದ್ ಅವರನ್ನು 13 ಕೋಟಿಗೆ ಖರೀದಿಸಿತು.

ಒಟ್ಟಾರೆಯಾಗಿ, ಐಪಿಎಲ್​ ಫ್ರಾಂಚೈಸಿಗಳು ಈ ಐದು ಆಟಗಾರರಿಗಾಗಿ ಸುಮಾರು 40 ಪ್ರತಿಶತ (84.6 ಕೋಟಿ) ಹಣವನ್ನು ಖರ್ಚು ಮಾಡಿವೆ, (ಏಜೆನ್ಸೀಸ್​).