ವಿರಾಟ್ ಭಾಯ್ ಅಂದ್ರೆ ಇಷ್ಟ ಆದ್ರೆ ಅವರು ಸ್ವಾರ್ಥಿ... ವೈಭವ್​ ವಿಡಿಯೋ ವೈರಲ್​, ಹರ್ಷ ಭೋಗ್ಲೆ ಆಕ್ರೋಶ! Vaibhav Sooryavanshi

Vaibhav Sooryavanshi : ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಮುಂದುವರಿದ ಭಾಗವಾಗಿರುವ 'ಡೀಪ್‌ಫೇಕ್' ವಿಡಿಯೋಗಳ ಸೃಷ್ಟಿ ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಸುಲಭವಾಗಿದ್ದು, ತಪ್ಪು ಮಾಹಿತಿಗಳ ಹರಡುವಿಕೆಗೆ ಮೂಲ ಕಾರಣವಾಗುತ್ತಿವೆ. ಇದಕ್ಕೆ ಇತ್ತೀಚಿನ ಉದಾಹರಣೆಯೆಂದರೆ, 2026ರ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಮುಕ್ತಾಯಗೊಂಡ ಬೆನ್ನಲ್ಲೇ ರಾಜಸ್ಥಾನ ರಾಯಲ್ಸ್ ತಂಡದ ಆಟಗಾರ ವೈಭವ್ ಸೂರ್ಯವಂಶಿ ಅವರ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಬಿರುಗಾಳಿ ಎಬ್ಬಿಸಿದೆ.

ವೈರಲ್​ ವಿಡಿಯೋದಲ್ಲಿ ಖ್ಯಾತ ಕ್ರಿಕೆಟ್ ವಿಮರ್ಶಕ ಹರ್ಷ ಭೋಗ್ಲೆ ಅವರು ನೀವು ಕೂಡ ವಿರಾಟ್ ಕೊಹ್ಲಿ ಅವರಂತೆ ಕ್ರಿಕೆಟ್ ಜಗತ್ತನ್ನು ಆಳಲು ಬಯಸುತ್ತೀರಾ? ಎಂದು ಪ್ರಶ್ನಿಸುತ್ತಾರೆ. ಅದಕ್ಕೆ ವೈಭವ್ ಉತ್ತರಿಸುತ್ತಾ, "ನನಗೆ ವಿರಾಟ್ ಭಾಯ್ ಇಷ್ಟ, ಆದರೆ ಅವರ ರೆಕಾರ್ಡ್‌ಗಳು ಇಷ್ಟವಿಲ್ಲ. ಅವರು ಅತ್ಯಂತ ನಿಧಾನವಾಗಿ ಹಾಫ್ ಸೆಂಚುರಿ ಮತ್ತು ಸೆಂಚುರಿಗಳನ್ನು ಬಾರಿಸುತ್ತಾರೆ ಹಾಗೂ ಅವರು ಸ್ವಲ್ಪ ಸ್ವಾರ್ಥಿ ಎಂದೂ ಅನಿಸುತ್ತದೆ, ಆದರೆ ನನಗೆ ಅವರ ತರಹದ ಫ್ಯಾನ್ ಫಾಲೋಯಿಂಗ್ ಮಾತ್ರ ಬೇಕು ಎಂದು ಹೇಳುವಂತೆ ಎಡಿಟ್ ಮಾಡಲಾಗಿದೆ. ಈ ಉತ್ತರವನ್ನು ಕೇಳಿ ಗೌತಮ್ ಗಂಭೀರ್, ಸಂಜು ಸ್ಯಾಮ್ಸನ್ ಸೇರಿದಂತೆ ವೇದಿಕೆ ಮೇಲಿರುವ ಹಾಗೂ ಪ್ರೇಕ್ಷಕರ ಸಾಲಿನಲ್ಲಿರುವ ಗಣ್ಯರು ನಗುತ್ತಿರುವಂತೆ ಬೇರೆ ಬೇರೆ ದೃಶ್ಯಗಳನ್ನು ಜೋಡಿಸಿ ಈ ಸುಳ್ಳು ವಿಡಿಯೋವನ್ನು ಸೃಷ್ಟಿಸಲಾಗಿದೆ.

ವೈರಲ್ ಆಗಿರುವ ವಿಡಿಯೋಗೆ ಸಂಬಂಧಿಸಿದಂತೆ ಹರ್ಷ ಅವರು ಎಕ್ಸ್ ವೇದಿಕೆಯಲ್ಲಿ ಸ್ಪಷ್ಟನೆ ನೀಡಿದ್ದಾರೆ. ತಮಗೂ ಮತ್ತು ಯುವ ಕ್ರಿಕೆಟಿಗ ವೈಭವ್ ಸೂರ್ಯವಂಶಿ ಅವರಿಗೂ ನಡೆದಿರುವ ಸಂಭಾಷಣೆಯಂತೆ ಬಿಂಬಿಸಲಾಗಿರುವ ವಿಡಿಯೋ ಸಂಪೂರ್ಣ ನಕಲಿ ಹಾಗೂ ಡಬ್ ಮಾಡಲಾಗಿರುವುದು ಎಂದು ಅವರು ತಿಳಿಸಿದ್ದಾರೆ. ತಾವು ಆ ರೀತಿಯ ಯಾವುದೇ ಪ್ರಶ್ನೆಯನ್ನು ಕೇಳಿಲ್ಲ ಮತ್ತು ವೈಭವ್ ಕೂಡ ವಿಡಿಯೋದಲ್ಲಿ ತೋರಿಸಿರುವಂತೆ ಉದ್ಧಟತನದಿಂದ ಉತ್ತರಿಸಿಲ್ಲ ಎಂದು ಸ್ಪಷ್ಟಪಡಿಸಿರುವ ಹರ್ಷ, ಅತ್ಯಂತ ಗೌರವಯುತವಾಗಿ ನಡೆದುಕೊಳ್ಳುವ ಒಬ್ಬ ಸಣ್ಣ ವಯಸ್ಸಿನ ಬಾಲಕನ ವಿರುದ್ಧ ಈ ರೀತಿಯ ದ್ವೇಷಪೂರಿತ ಮತ್ತು ಕ್ರೂರವಾದ ಸುಳ್ಳು ವಿಡಿಯೋ ಹಬ್ಬಿಸಿರುವುದು ಅತ್ಯಂತ ಬೇಸರದ ಸಂಗತಿ ಎಂದು ಹರ್ಷ ಭೋಗ್ಲೆ ಬೇಸರ ವ್ಯಕ್ತಪಡಿಸಿದ್ದಾರೆ.

ಈ ಬಾರಿಯ ಐಪಿಎಲ್ 2026ರ ಟೂರ್ನಿಯಲ್ಲಿ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ ವೈಭವ್ ಸೂರ್ಯವಂಶಿ, ಒಟ್ಟು 776 ರನ್ ಗಳಿಸುವ ಮೂಲಕ ಇಡೀ ಟೂರ್ನಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ಹೊರಹೊಮ್ಮಿದ್ದಾರೆ. ಆರೆಂಜ್ ಕ್ಯಾಪ್ ಪ್ರಶಸ್ತಿಯನ್ನು ಸ್ವೀಕರಿಸಲು ವೈಭವ್ ವೇದಿಕೆಯ ಕಡೆಗೆ ಹೆಜ್ಜೆ ಹಾಕುತ್ತಿದ್ದಾಗ, ವಿರಾಟ್ ಕೊಹ್ಲಿ ಅವರು ತಮ್ಮ ಮಾಜಿ ಸಹಪಾಠಿ ಎಬಿ ಡಿವಿಲಿಯರ್ಸ್ ಅವರೊಂದಿಗೆ ಮಾತನಾಡುತ್ತಾ, "ಈ ಹುಡುಗ ನಿಜಕ್ಕೂ ತುಂಬಾ ವಿಶೇಷವಾದ ಪ್ರತಿಭೆ, ಅದ್ಭುತವಾಗಿ ಬ್ಯಾಟಿಂಗ್ ಮಾಡಬಲ್ಲ ಸಾಮರ್ಥ್ಯ ಅವನಲ್ಲಿದೆ" ಎಂದು ಮುಕ್ತ ಕಂಠದಿಂದ ಗುಣಗಾನ ಮಾಡಿದ್ದಾರೆ.

ಆದರೆ, ಮೈದಾನದ ಒಳಗೆ ಮತ್ತು ಹೊರಗೆ ಕೊಹ್ಲಿ ಹಾಗೂ ಸೂರ್ಯವಂಶಿ ನಡುವೆ ಇಷ್ಟೊಂದು ಪರಸ್ಪರ ಗೌರವ ಮತ್ತು ಅಭಿಮಾನದ ವಾತಾವರಣವಿದ್ದರೂ ಸಹ, ಸಾಮಾಜಿಕ ಜಾಲತಾಣಗಳಲ್ಲಿ ಮಾತ್ರ ಇಬ್ಬರ ನಡುವೆ ಎಲ್ಲವೂ ಸರಿಯಿಲ್ಲ ಎನ್ನುವ ರೀತಿಯ ನಕಲಿ ಕಥೆಗಳು ಮತ್ತು ಸುಳ್ಳು ವಿಡಿಯೋಗಳನ್ನು ಹಬ್ಬಿಸುವ ಕೆಲಸ ಸಾಗುತ್ತಲೇ ಇದೆ, (ಏಜೆನ್ಸೀಸ್​).