ಅತಿ ವೇಗದ ಶತಕದ ದಾಖಲೆ ಜಸ್ಟ್​ ಮಿಸ್​ ಆದ ಕೂಡಲೇ ವೈಭವ್​ ಬಗ್ಗೆ ಸ್ಫೋಟಕ ಭವಿಷ್ಯ ನುಡಿದ ಕ್ರಿಸ್​ ಗೇಲ್​! Vaibhav Sooryavanshi

Vaibhav Sooryavanshi : ವೆಸ್ಟ್ ಇಂಡೀಸ್​​ ಕ್ರಿಕೆಟ್​ ದಿಗ್ಗಜ ಹಾಗೂ ಯೂನಿವರ್ಸಲ್​ ಬಾಸ್​ ಎಂದೇ ಖ್ಯಾತಿಗಳಿಸಿರುವ ಕ್ರಿಸ್ ಗೇಲ್, ಐಪಿಎಲ್ ಎಲಿಮಿನೇಟರ್ ಪಂದ್ಯದಲ್ಲಿ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಕೇವಲ 29 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 12 ಸಿಕ್ಸರ್ ಸಹಿತ 97 ರನ್ ಚಚ್ಚಿದ ರಾಜಸ್ಥಾನ ರಾಯಲ್ಸ್‌ನ 15 ವರ್ಷದ ಯುವ ಆಟಗಾರ ವೈಭವ್ ಸೂರ್ಯವಂಶಿಯನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ.

ಸ್ಫೋಟಕ ಇನಿಂಗ್ಸ್ ಮೂಲಕ ಪ್ರಸಕ್ತ ಸೀಸನ್‌ನಲ್ಲಿ ಒಟ್ಟು 65 ಸಿಕ್ಸರ್‌ಗಳನ್ನು ಪೂರೈಸಿದ ಸೂರ್ಯವಂಶಿ, ಟಿ20 ಟೂರ್ನಿಯೊಂದರಲ್ಲಿ ಅತಿ ಹೆಚ್ಚು ಸಿಕ್ಸರ್ ಬಾರಿಸಿದ ಗೇಲ್ ಅವರ 2012ರ ಐಪಿಎಲ್ ದಾಖಲೆಯನ್ನು (59 ಸಿಕ್ಸರ್) ಧೂಳೀಪಟ ಮಾಡಿದ್ದಾರೆ. ಈ ಐತಿಹಾಸಿಕ ಸಾಧನೆಗೆ ಇನ್‌ಸ್ಟಾಗ್ರಾಮ್‌ನಲ್ಲಿ ಪ್ರತಿಕ್ರಿಯಿಸಿರುವ 'ಯೂನಿವರ್ಸ್ ಬಾಸ್' ಗೇಲ್, "ಅದ್ಭುತ ವೈಭವ್ ಸೂರ್ಯವಂಶಿ, ಐಪಿಎಲ್‌ಗೆ ಈಗ ಹೊಸ ಸಿಕ್ಸರ್ ಮಷಿನ್ ಸಿಕ್ಕಿದೆ" ಎಂದು ಯುವ ಬ್ಯಾಟರ್‌ನ ಬ್ಯಾಟಿಂಗ್ ವೈಖರಿಯನ್ನು ಕ್ರಿಸ್​ ಗೇಲ್​ ಕೊಂಡಾಡಿದ್ದಾರೆ.

ಕೇವಲ 29 ಎಸೆತಗಳಲ್ಲಿ ಐಪಿಎಲ್ ಇತಿಹಾಸದ ಅತ್ಯಂತ ವೇಗದ ಶತಕ ದಾಖಲಿಸುವ ಸುವರ್ಣ ಅವಕಾಶವನ್ನು ವೈಭವ್ ಕೂದಲೆಳೆ ಅಂತರದಲ್ಲಿ ಕೈತಪ್ಪಿಸಿಕೊಂಡಿದ್ದಾರೆ. ಪ್ರಸ್ತುತ ಆ ದಾಖಲೆಯನ್ನು ಹೊಂದಿರುವ ಕ್ರಿಸ್ ಗೇಲ್ ಯುವ ಆಟಗಾರನಿಗೆ ಧೈರ್ಯ ತುಂಬಿದ್ದು, "ಆತ ದುರದೃಷ್ಟಶಾಲಿ, ಆದರೆ ಮುಂದೊಂದು ದಿನ ಖಂಡಿತ ಆ ಮೈಲಿಗಲ್ಲನ್ನು ತಲುಪಲಿದ್ದಾನೆ" ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಪ್ರಸಕ್ತ ಐಪಿಎಲ್ ಸೀಸನ್‌ನಲ್ಲಿ ಅದ್ಭುತ ಫಾರ್ಮ್‌ನಲ್ಲಿರುವ ಸೂರ್ಯವಂಶಿ 15 ಇನಿಂಗ್ಸ್‌ಗಳಿಂದ 45.33 ರ ಸರಾಸರಿ ಹಾಗೂ 242.85 ರ ಸ್ಟ್ರೈಕ್ ರೇಟ್‌ನಲ್ಲಿ ಒಂದು ಶತಕ (ಗರಿಷ್ಠ 103 ರನ್) ಮತ್ತು 4 ಅರ್ಧಶತಕಗಳ ನೆರವುಗಳೊಂದಿಗೆ ಒಟ್ಟು 680 ರನ್ ಕಲೆಹಾಕಿದ್ದಾರೆ. ಒಟ್ಟಾರೆ ವೈಭವ್​ ಆಡಿರುವ ಇನ್ನಿಂಗ್ಸ್​ಗಳಲ್ಲಿ 280 ಎಸೆತಗಳನ್ನು ಎದರಿಸಿದ್ದು, 55 ಬೌಂಡರಿ ಹಾಗೂ 65 ಸಿಕ್ಸರ್‌ಗಳೊಂದಿಗೆ 680 ರನ್​ ಕಲೆ ಹಾಕಿ, ಆರೆಂಜ್​ ಕ್ಯಾಪ್​ ಅನ್ನು ತಮ್ಮ ವಶಕ್ಕೆ ಪಡೆದುಕೊಂಡಿದ್ದಾರೆ. ಕ್ರಿಕ್‌ವಿಜ್ (CricViz) ಅಂಕಿ-ಅಂಶಗಳ ಪ್ರಕಾರ, ಸೂರ್ಯವಂಶಿ ತಮ್ಮ ಒಟ್ಟು ರನ್‌ಗಳ ಪೈಕಿ ಶೇ. 88.9 ರಷ್ಟು ರನ್‌ಗಳನ್ನು ಕೇವಲ ಬೌಂಡರಿ ಹಾಗೂ ಸಿಕ್ಸರ್‌ಗಳ ಮೂಲಕವೇ ಗಳಿಸಿದ್ದು, 2019ರ ಐಪಿಎಲ್‌ನಲ್ಲಿ ಕೆಕೆಆರ್ ಪರ ಆಂಡ್ರೆ ರಸೆಲ್ (ಶೇ. 85.5 ಬೌಂಡರಿ ರನ್) ಬರೆದಿದ್ದ ಸಾರ್ವಕಾಲಿಕ ದಾಖಲೆಯನ್ನೂ ಸಹ ಹಿಂದಿಕ್ಕಿದ್ದಾರೆ.

ರಾಜಸ್ಥಾನ ರಾಯಲ್ಸ್ ತಂಡದ 15 ವರ್ಷದ ಎಡಗೈ ಬ್ಯಾಟಿಂಗ್ ಸೆನ್ಸೇಷನ್ ವೈಭವ್ ಸೂರ್ಯವಂಶಿ ತಮ್ಮ ಸ್ಫೋಟಕ ಇನಿಂಗ್ಸ್ ಮೂಲಕ ಐಪಿಎಲ್ ಇತಿಹಾಸದ ಹತ್ತಾರು ಸಾರ್ವಕಾಲಿಕ ದಾಖಲೆಗಳನ್ನು ಧೂಳೀಪಟ ಮಾಡಿದ್ದಾರೆ. ಒಂದು ಐಪಿಎಲ್ ಇನಿಂಗ್ಸ್‌ನಲ್ಲಿ 10ಕ್ಕೂ ಹೆಚ್ಚು ಸಿಕ್ಸರ್ ಬಾರಿಸಿದ ಕ್ರಿಸ್ ಗೇಲ್ ಅವರ ದಾಖಲೆಯನ್ನು (ಒಟ್ಟು 4 ಬಾರಿ) ಸೂರ್ಯವಂಶಿ ಸಮಗಟ್ಟಿದ್ದಾರೆ. ಈ ಪೈಕಿ 3 ಬಾರಿ ಅವರು ಪ್ರಸಕ್ತ ಸೀಸನ್‌ನಲ್ಲೇ ಈ ಸಾಧನೆ ಮಾಡಿದ್ದು, ಒಂದೇ ಸೀಸನ್‌ನಲ್ಲಿ ಮೂರು ಬಾರಿ 10+ ಸಿಕ್ಸರ್ ಚಚ್ಚಿದ ವಿಶ್ವದ ಮೊದಲ ಬ್ಯಾಟರ್ ಎನಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲದೆ, ಮುಲ್ಲನ್‌ಪುರದಲ್ಲಿ ನಡೆದ ಪಂದ್ಯದ ಪವರ್‌ಪ್ಲೇನಲ್ಲಿಯೇ 8 ಸಿಕ್ಸರ್ ಸಿಡಿಸುವ ಮೂಲಕ 2008ರಲ್ಲಿ ಸನತ್ ಜಯಸೂರ್ಯ ಬರೆದಿದ್ದ (7 ಸಿಕ್ಸರ್) ದಾಖಲೆಯನ್ನು ಅಳಿಸಿಹಾಕಿದ್ದಾರೆ.

ಪವರ್‌ಪ್ಲೇ ಓವರ್‌ಗಳಲ್ಲಿ ಅಬ್ಬರಿಸುವ ವಿಷಯದಲ್ಲೂ ಸೂರ್ಯವಂಶಿ ಆಸ್ಟ್ರೇಲಿಯಾದ ದಿಗ್ಗಜ ಡೇವಿಡ್ ವಾರ್ನರ್ ಅವರ ದಾಖಲೆಯನ್ನು ಮೀರಿದ್ದಾರೆ. ಒಂದೇ ಸೀಸನ್‌ನ ಪವರ್‌ಪ್ಲೇನಲ್ಲಿ 490 ರನ್ ಕಲೆಹಾಕುವ ಮೂಲಕ 2016ರಲ್ಲಿ ವಾರ್ನರ್ (467 ರನ್) ಬರೆದಿದ್ದ ದಾಖಲೆಯನ್ನು ಇವರು ಹಿಂದಿಕ್ಕಿದ್ದಾರೆ. ಜೊತೆಗೆ ಪವರ್‌ಪ್ಲೇನಲ್ಲಿ 5 ಬಾರಿ 50 ಪ್ಲಸ್ ರನ್ ಗಳಿಸಿದ ಸಾಧನೆ ಇವರದ್ದಾಗಿದ್ದು, ವಾರ್ನರ್ (6 ಬಾರಿ) ವೈಭವ್​ಗಿಂತ ಮುಂದಿದ್ದಾರೆ. ಇನ್ನು ಐಪಿಎಲ್ ನಾಕೌಟ್/ಪ್ಲೇಆಫ್ ಪಂದ್ಯದ ಪವರ್‌ಪ್ಲೇನಲ್ಲಿ ಅರ್ಧಶತಕ ಬಾರಿಸಿದ ಸುರೇಶ್ ರೈನಾ ಮತ್ತು ಆಡಮ್ ಗಿಲ್‌ಕ್ರಿಸ್ಟ್ ಅವರ ಗಣ್ಯರ ಪಟ್ಟಿಗೆ ಸೂರ್ಯವಂಶಿ ಸೇರ್ಪಡೆಯಾಗಿದ್ದಾರೆ.

ಕೇವಲ 16 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದ ಸೂರ್ಯವಂಶಿ, ಸುರೇಶ್ ರೈನಾ ಅವರೊಂದಿಗೆ ಐಪಿಎಲ್ ನಾಕೌಟ್ ಪಂದ್ಯವೊಂದರಲ್ಲಿ ಜಂಟಿ ಅತ್ಯಂತ ವೇಗದ ಅರ್ಧಶತಕದ ದಾಖಲೆ ಹಂಚಿಕೊಂಡಿದ್ದಾರೆ. ಇನ್ನು 20 ಓವರ್‌ಗಿಂತ ಕಡಿಮೆ ಎಸೆತಗಳಲ್ಲಿ 5 ಬಾರಿ ಅರ್ಧಶತಕ ಸಿಡಿಸಿದ ಕೀರ್ತಿ ಇವರದ್ದಾಗಿದ್ದು, ಅಭಿಷೇಕ್ ಶರ್ಮಾ (6 ಬಾರಿ) ವೈಭ್​ಗಿಂತ ಮೇಲಿದ್ದಾರೆ. ಪಂದ್ಯದಲ್ಲಿ ಅವರು ಸಿಡಿಸಿದ 12 ಸಿಕ್ಸರ್‌ಗಳು ಐಪಿಎಲ್ ನಾಕೌಟ್ ಇನಿಂಗ್ಸ್‌ ಒಂದರಲ್ಲಿ ಬ್ಯಾಟರ್ ಒಬ್ಬರು ಬಾರಿಸಿದ ಗರಿಷ್ಠ ಸಿಕ್ಸರ್ ಆಗಿದ್ದು, 2023ರಲ್ಲಿ ಶುಭಮಾನ್ ಗಿಲ್ (10 ಸಿಕ್ಸರ್) ಬರೆದಿದ್ದ ದಾಖಲೆ ಬದಿಗೆ ಸರಿದಿದೆ. ಭಾರತೀಯ ಬ್ಯಾಟರ್ ಒಬ್ಬರ ಐಪಿಎಲ್ ಇನಿಂಗ್ಸ್‌ನ ಗರಿಷ್ಠ ಸಿಕ್ಸರ್ ಸಾಧನೆಯೂ ಇದಾಗಿದೆ. ರಾಜಸ್ಥಾನ ರಾಯಲ್ಸ್ ಪರ ಪ್ಲೇಆಫ್‌ನಲ್ಲಿ ದಾಖಲಾದ 2ನೇ ಗರಿಷ್ಠ ವೈಯಕ್ತಿಕ ಸ್ಕೋರ್ ಇದಾಗಿದ್ದು, ಜೋಸ್ ಬಟ್ಲರ್ (106*) ಮೊದಲ ಸ್ಥಾನದಲ್ಲಿದ್ದಾರೆ. ಜೊತೆಗೆ, ಅನ್‌ಕ್ಯಾಪ್ಡ್ ಆಟಗಾರನಾಗಿ ಒಂದೇ ಸೀಸನ್‌ನಲ್ಲಿ ಗರಿಷ್ಠ ರನ್ (680 ರನ್) ಗಳಿಸಿ ಯಶಸ್ವಿ ಜೈಸ್ವಾಲ್ (625 ರನ್) ದಾಖಲೆ ಮುರಿದಿದ್ದಾರೆ. ಟಿ20 ಕ್ರಿಕೆಟ್ ಇತಿಹಾಸದಲ್ಲೇ 200ಕ್ಕೂ ಅಧಿಕ ಸ್ಟ್ರೈಕ್ ರೇಟ್‌ನಲ್ಲಿ 600 ರನ್ ಪೂರೈಸಿದ ಅತ್ಯಂತ ಕಿರಿಯ ಆಟಗಾರ ಎಂಬ ಕೀರ್ತಿಗೂ ಇವರು ಭಾಜನರಾಗಿದ್ದಾರೆ.

ಇನ್ನೂ ಪಂದ್ಯದ ವಿಚಾರಕ್ಕೆ ಬರುವುದಾದರೆ, ಈ ರೋಚಕ ಪಂದ್ಯದಲ್ಲಿ ರಾಜಸ್ಥಾನ ರಾಯಲ್ಸ್ ಮೊದಲು ಬ್ಯಾಟಿಂಗ್ ಮಾಡಿ ವೈಭವ್ ಸೂರ್ಯವಂಶಿ (97 ರನ್, 29 ಎಸೆತ) ಮತ್ತು ಧ್ರುವ್ ಜುರೆಲ್ (50 ರನ್, 21 ಎಸೆತ) ಅವರ ಜವಾಬ್ದಾರಿಯುತ ಆಟದ ನೆರವಿನಿಂದ 20 ಓವರ್‌ಗಳಲ್ಲಿ 8 ವಿಕೆಟ್‌ಗೆ 243 ರನ್‌ಗಳ ಬೃಹತ್ ಮೊತ್ತ ಕಲೆಹಾಕಿತು. ಗುರಿ ಬೆನ್ನಟ್ಟಿದ ಸನ್‌ರೈಸರ್ಸ್ ಹೈದರಾಬಾದ್, ಇಶಾನ್ ಕಿಶನ್ (33 ರನ್, 11 ಎಸೆತ) ಅವರ ಹೋರಾಟದ ಹೊರತಾಗಿಯೂ ಪವರ್‌ಪ್ಲೇನಲ್ಲಿಯೇ 57 ರನ್‌ಗಳಿಗೆ 4 ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು. ರಾಜಸ್ಥಾನ ಪರ ಜೋಫ್ರಾ ಆರ್ಚರ್ (3/58) ಮತ್ತು ನಾಂದ್ರೆ ಬರ್ಗರ್ (2/26) ಮಾರಕ ದಾಳಿ ನಡೆಸಿ ಹೈದರಾಬಾದ್ ತಂಡವನ್ನು 19.2 ಓವರ್‌ಗಳಲ್ಲಿ 196 ರನ್‌ಗಳಿಗೆ ಕಟ್ಟಿಹಾಕಿದರು. ಈ ಸೋಲಿನೊಂದಿಗೆ ಸನ್‌ರೈಸರ್ಸ್ ಹೈದರಾಬಾದ್ ಟೂರ್ನಿಯಿಂದ ಹೊರಬಿದ್ದಿದ್ದು, ರಾಜಸ್ಥಾನ ರಾಯಲ್ಸ್ ತಂಡವು ಫೈನಲ್‌ನಲ್ಲಿ ಹಾಲಿ ಚಾಂಪಿಯನ್ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡವನ್ನು ಎದುರಿಸಲು ಶುಕ್ರವಾರ ನಡೆಯಲಿರುವ ಕ್ವಾಲಿಫೈಯರ್ 2 ಪಂದ್ಯದಲ್ಲಿ ಗುಜರಾತ್ ಟೈಟನ್ಸ್ ವಿರುದ್ಧ ಸೆಣಸಾಡಲಿದೆ, (ಏಜೆನ್ಸೀಸ್​).