ಬೆಂಗಳೂರು: ಬೆಂಗಳೂರಿನ ಖಲೀನ್ ಜೋಶಿ ಅವರು ಕರ್ನಾಟಕ ಗಾಲ್ಫ್ ಅಸೋಸಿಯೇಷನ್ (ಕೆಜಿಎ) ಮೈದಾನದಲ್ಲಿ ನಡೆಯುತ್ತಿರುವ ₹1 ಕೋಟಿ ಮೊತ್ತದ ಬೆಂಗಳೂರು ಓಪನ್ 2026 ಪವರ್ಡ್ ಬೈ ಇಂಡಿಯನ್ ಆಯಿಲ್ ಟೂರ್ನಿಯಲ್ಲಿ ಮೂರನೇ ಸುತ್ತಿನಲ್ಲೂ ತಮ್ಮ ಮುನ್ನಡೆಯನ್ನು ಕಾಯ್ದುಕೊಂಡಿದ್ದಾರೆ. 34 ವರ್ಷದ ಜೋಶಿ ಮೂರನೇ ಸುತ್ತಿನಲ್ಲಿ ಮೂರು-ಅಂಡರ್ 69 ಸ್ಕೋರ್ ದಾಖಲಿಸಿ, ಒಟ್ಟು 18-ಅಂಡರ್ 198 ಸ್ಕೋರ್ನೊಂದಿಗೆ ಮೂರು ಶಾಟ್ಗಳ ಮುನ್ನಡೆಯಲ್ಲಿದ್ದಾರೆ.
61-68-69 ಸ್ಕೋರ್ ಹೊಂದಿರುವ ಜೋಶಿ, ದಿನದ ಆರಂಭದಲ್ಲಿ ಆರು ಶಾಟ್ಗಳ ಮುನ್ನಡೆಯಲ್ಲಿದ್ದರು. ಐದನೇ ಹೋಲ್ನ ಪಾರ್-5ನಲ್ಲಿ ಅದ್ಭುತ ಈಗಲ್ ದಾಖಲಿಸಿದ ಅವರು, ಮೂರು ಬರ್ಡಿಗಳು ಹಾಗೂ ಎರಡು ಬೋಗಿಗಳೊಂದಿಗೆ ದಿನವನ್ನು ಮುಗಿಸಿದರು.
ಗುರುಗ್ರಾಮದ ಮನು ಗಾಂದಾಸ್ ದಿನದ ಅತ್ಯುತ್ತಮ ಸ್ಕೋರ್ ದಾಖಲಿಸಿದರು. 2023ರ ಡಿಪಿ ವರ್ಲ್ಡ್ ಪಿಜಿಟಿಐ ಆರ್ಡರ್ ಆಫ್ ಮೆರಿಟ್ ಚಾಂಪಿಯನ್ ಆಗಿರುವ ಗಾಂದಾಸ್ ಬೋಗಿ ರಹಿತ ಎಂಟು-ಅಂಡರ್ 64 ಸ್ಕೋರ್ ಮಾಡಿ, 15-ಅಂಡರ್ 201ರೊಂದಿಗೆ ಎರಡನೇ ಸ್ಥಾನಕ್ಕೆ ಏರಿದರು. 10ರಿಂದ 12ನೇ ಹೋಲ್ಗಳವರೆಗೆ ಸತತ ಮೂರು ಬರ್ಡಿಗಳನ್ನೂ ಒಳಗೊಂಡಂತೆ ಅವರು ಒಟ್ಟು ಎಂಟು ಬರ್ಡಿಗಳನ್ನು ದಾಖಲಿಸಿದರು.
ಪ್ರಸ್ತುತ ರೇಸ್ ಟು ಡಿಪಿ ವರ್ಲ್ಡ್ ಇಂಡಿಯಾ ಚಾಂಪಿಯನ್ಶಿಪ್ನಲ್ಲಿ ಅಗ್ರಸ್ಥಾನದಲ್ಲಿರುವ ಗ್ರೇಟರ್ ನೋಯ್ಡಾದ ಸಪ್ತಕ್ ತಲ್ವಾರ್ ನಾಲ್ಕು-ಅಂಡರ್ 68 ಸ್ಕೋರ್ ಮಾಡಿ 11-ಅಂಡರ್ 205ರೊಂದಿಗೆ ಮೂರನೇ ಸ್ಥಾನದಲ್ಲಿದ್ದಾರೆ. ಗುರುಗ್ರಾಮದ ವೀರ್ ಅಹ್ಲಾವತ್ ಹಾಗೂ ಸ್ಥಳೀಯ ಯುವ ಆಟಗಾರ ಮನೋಜ್ ಎಸ್ ತಲಾ 10-ಅಂಡರ್ 206ರೊಂದಿಗೆ ಜಂಟಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ.
ಗಾಳಿ ಹೆಚ್ಚಾಗಿ ಬೀಸಿದ ಪರಿಣಾಮ, ಗ್ರೀನ್ಗಳು ವೇಗ ಪಡೆದುಕೊಂಡಿದ್ದರಿಂದ ಹಾಗೂ ಕಠಿಣ ಫ್ಲ್ಯಾಗ್ ಸ್ಥಾನಗಳಿಂದ ಮೂರನೇ ಸುತ್ತು ಸವಾಲಿನದ್ದಾಗಿತ್ತು ಎಂದು ಜೋಶಿ ಹೇಳಿದರು.
ಐದನೇ ಹೋಲ್ನಲ್ಲಿ 94 ಯಾರ್ಡ್ ದೂರದಿಂದ ಲಾಬ್ ವೆಡ್ಜ್ ಮೂಲಕ ಜೋಶಿ ಹೊಡೆದ ಶಾಟ್ ನೇರವಾಗಿ ಕಪ್ಗೆ ಬಿದ್ದು ಈಗಲ್ ದಾಖಲಿಸಿತು. 15ನೇ ಹೋಲ್ನಲ್ಲಿ ಬೋಗಿ ಮಾಡಿದರೂ, ಕೊನೆಯ ಎರಡು ಹೋಲ್ಗಳಲ್ಲಿ ಸತತ ಬರ್ಡಿ ದಾಖಲಿಸುವ ಮೂಲಕ ಅವರು ಉತ್ತಮವಾಗಿ ಸುತ್ತನ್ನು ಮುಗಿಸಿದರು.
ಮನು ಗಾಂದಾಸ್ ಕೂಡ ಉತ್ತಮ ಪುಟ್ಟಿಂಗ್ ಪ್ರದರ್ಶನ ನೀಡಿ ಅಂತರವನ್ನು ಕಡಿಮೆ ಮಾಡಿದರು. ಕೆಜಿಎ ಮೈದಾನದಲ್ಲಿ ಜೂನಿಯರ್ ಹಂತದಲ್ಲಿ ಗೆಲುವಿನ ಅನುಭವ ಹೊಂದಿರುವ ಅವರು, ಅಂತಿಮ ಸುತ್ತಿನಲ್ಲಿ ಸ್ಪರ್ಧೆಯಲ್ಲಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದರು.
ಸ್ಥಳೀಯ ಆಟಗಾರ ಚಿಕ್ಕರಂಗಪ್ಪ 13ನೇ ಹೋಲ್ನಲ್ಲಿ ಹೋಲ್-ಇನ್-ವನ್ ದಾಖಲಿಸಿದರು. ಅವರು 73 ಸ್ಕೋರ್ನೊಂದಿಗೆ ಜಂಟಿ 33ನೇ ಸ್ಥಾನದಲ್ಲಿದ್ದಾರೆ.
2026ರ ಡಿಪಿ ವರ್ಲ್ಡ್ ಪಿಜಿಟಿಐ ಆರ್ಡರ್ ಆಫ್ ಮೆರಿಟ್ನ ಅಗ್ರ 60 ಆಟಗಾರರನ್ನು ಅಂತಿಮಗೊಳಿಸುವ ಮುನ್ನ ನಡೆಯುವ ಕೊನೆಯ ಟೂರ್ನಿ ಇದಾಗಿದೆ. ಈ ಟೂರ್ನಿಯ ಅಂತ್ಯದಲ್ಲಿ ಅಗ್ರ 60ರಲ್ಲಿ ಸ್ಥಾನ ಪಡೆಯುವ ಆಟಗಾರರು 2026-27ರ ಋತುವಿನ ತಮ್ಮ ಆಟದ ಹಕ್ಕುಗಳನ್ನು ಉಳಿಸಿಕೊಳ್ಳಲಿದ್ದಾರೆ.
