ಮೆಗಾ ಹರಾಜಿನ ನಂತರವೂ ಸಿಎಸ್ಕೆ ಬ್ಯಾಟಿಂಗ್ ವಿಭಾಗ ಹೆಚ್ಚಿನ ಬದಲಾವಣೆ ಕಂಡಿಲ್ಲ. ಋತುರಾಜ್, ಶಿವಂ ದುಬೆ, ಧೋನಿ, ಜಡೇಜಾ ರಿಟೇನ್ ಆಗಿದ್ದರೆ, ಡೆವೊನ್ ಕಾನ್ವೇ, ರಚಿನ್ ರವೀಂದ್ರ ಹರಾಜಿನಲ್ಲಿ ಮರಳಿ ಸೇರ್ಪಡೆಯಾಗಿದ್ದಾರೆ. ರಾಹುಲ್ ತ್ರಿಪಾಠಿ, ದೀಪಕ್ ಹೂಡಾ, ವಿಜಯ್ ಶಂಕರ್ ಮಾತ್ರ ಹೊಸ ಸೇರ್ಪಡೆ. ಇನ್ನು ಹರಾಜಿನಲ್ಲಿ ಸ್ಪಿನ್ ಬೌಲಿಂಗ್ ವಿಭಾಗವನ್ನು ಸಿಎಸ್ಕೆ ಬಲಿಷ್ಠಗೊಳಿಸಿದ್ದು, ಚೆಪಾಕ್ ಪಿಚ್ ಈ ಬಾರಿ ಸ್ಪಿನ್ಗೆ ಇನ್ನಷ್ಟು ಹೆಚ್ಚು ಸಹಕರಿಸುವ ನಿರೀಕ್ಷೆ ಇದೆ. ಅನುಭವಿ ಆಫ್ ಸ್ಪಿನ್ನರ್ ಆರ್. ಅಶ್ವಿನ್ 10 ವರ್ಷಗಳ ಬಳಿಕ ತಂಡಕ್ಕೆ ಮರಳಿದ್ದರೆ, ಅಫ್ಘಾನಿಸ್ತಾನ ಯುವ ಸ್ಪಿನ್ನರ್ ನೂರ್ ಅಹ್ಮದ್ ಮತ್ತು ಕನ್ನಡಿಗ ಶ್ರೇಯಸ್ ಗೋಪಾಲ್ರನ್ನೂ ಸೇರಿಸಿಕೊಳ್ಳಲಿದ್ದಾರೆ. ಇವರು ಸ್ಪಿನ್ ವಿಭಾಗದಲ್ಲಿ ಜಡೇಜಾ ಕೈ ಬಲಪಡಿಸಲಿದ್ದಾರೆ. ಆಲ್ರೌಂಡರ್ ಸ್ಯಾಮ್ ಕರನ್ ಕೂಡ ಸಿಎಸ್ಕೆಗೆ ಮರಳಿದ್ದರೆ, ಮಾಲಿಂಗ ಬೌಲಿಂಗ್ ಶೈಲಿಯ ಮಥೀಶ ಪಥಿರಣ ತಂಡದ ಪ್ರಮುಖ ವೇಗಿಯಾಗಿ ಮುಂದುವರಿಯಲಿದ್ದಾರೆ.
