ರಾಹುಲ್​ ರೋರಿಂಗ್​ ಶತಕ: ಕೊಹ್ಲಿ ಪಡೆಗೆ ಬೃಹತ್​ ಗುರಿ ನೀಡಿದ ಪಂಜಾಬ್​ ಕಿಂಗ್ಸ್!

ದುಬೈ: ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್​ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಐಪಿಎಲ್​ ಟೂರ್ನಿಯ 6ನೇ ಪಂದ್ಯದಲ್ಲಿ ಕನ್ನಡಿಗ ಕೆ.ಎಲ್​. ರಾಹುಲ್​ ಅವರ ಸ್ಫೋಟಕ ಶತಕದ ನೆರವಿನಿಂದ ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡ ಎದುರಾಳಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡಕ್ಕೆ 207ರನ್​ಗಳ ಬೃಹತ್​ ಗುರಿ ನೀಡಿದೆ.

ಟಾಸ್​ ಸೋತು ಬ್ಯಾಟಿಂಗ್​ ಆರಂಭಿಸಿದ ಪಂಜಾಬ್​, ನಿಗದಿತ 20 ಓವರ್​ಗಳಲ್ಲಿ 3 ವಿಕೆಟ್​ ನಷ್ಟಕ್ಕೆ 206 ರನ್​ ಕಲೆಹಾಕಿತು.

ತಂಡದ ಪರ ಆರಂಭಿಕರಾಗಿ ಕಣಕ್ಕಿಳಿದ ಕನ್ನಡಿಗರಾದ ನಾಯಕ ಕೆ.ಎಲ್​. ರಾಹುಲ್​ ಮತ್ತು ಮಯಾಂಕ್​ ಅಗರ್ವಾಲ್​ 57 ರನ್​ಗಳ ಜತೆಯಾಟದ ಮೂಲಕ ಉತ್ತಮ ಆರಂಭ ಒದಗಿಸಿಕೊಟ್ಟರು. ಈ ವೇಳೆ 26 ರನ್​ ಗಳಿಸಿದ್ದ ಮಯಾಂಕ್​ ಬಿರುಸಿನ ಹೊಡೆತಕ್ಕೆ ಯತ್ನಿಸಿ ಕ್ಯಾಚಿತ್ತು ನಿರ್ಗಮಿಸಿದರು. ಇದಾದ ಕೆಲವೇ ಕ್ಷಣಗಳಲ್ಲಿ ನಿಕೋಲಸ್​ ಪೂರನ್ (17) ಔಟಾದರು. ಬಳಿಕ ಬಂದ ಸ್ಫೋಟಕ ಆಟಗಾರ ಗ್ಲೇನ್​ ಮ್ಯಾಕ್ಸ್​ವೆಲ್​ ಕೇವಲ 5 ರನ್​ಗೆ ವಿಕೆಟ್​ ಒಪ್ಪಿಸುವ ಮೂಲಕ ನಿರಾಶೆ ಮೂಡಿಸಿದರು.

ಇತ್ತ ಕೊನೆಯವರೆಗೂ ಅಬ್ಬರಿಸಿದ ರಾಹುಲ್​ ಕೇವಲ 69 ಎಸೆತಗಳಲ್ಲಿ 7 ಸಿಕ್ಸರ್​, 14 ಬೌಂಡರಿ ನೆರವಿನಿಂದ ಅಜೇಯ 132 ರನ್​ ಗಳಿಸಿ ನಾಯಕನ ಜವಬ್ದಾರಿಯುತ ಆಟವಾಡಿದರು. ಉಳಿದಂತೆ ಕರುಣ್​ ನಾಯರ್​ 15 ರನ್ ಗಳಿಸಿ ಅಜೇಯರಾಗಿ ಉಳಿದರು.

ಆರ್​ಸಿಬಿ ಪರ ಶಿವಂ ದುಬೆ ಎರಡು ವಿಕೆಟ್​ ಪಡೆದರೆ, ಯಜುವೇಂದ್ರ ಚಹಾಲ್​ 1 ವಿಕೆಟ್​ಗೆ ತೃಪ್ತಿಪಟ್ಟರು. ಉಳಿದ ಯಾವೊಬ್ಬ ಬೌಲರ್​ಗಳು ನಿರೀಕ್ಷಿತ ಪ್ರದರ್ಶನ ತೋರಲಿಲ್ಲ. (ಏಜೆನ್ಸೀಸ್​)