ಭಾರತದ ತವರಿನ ಏಕದಿನ ವಿಶ್ವಕಪ್​ ಫೈನಲ್ ಕಹಿ ನೆನಪಿಗೆ ಒಂದು ವರ್ಷ!

ನವದೆಹಲಿ: ಸತತ 10 ಜಯದೊಂದಿಗೆ 12 ವರ್ಷಗಳ ಬಳಿಕ ಏಕದಿನ ವಿಶ್ವಕಪ್​ ವಶಪಡಿಸಿಕೊಳ್ಳುವತ್ತ ಮುನ್ನುಗ್ಗಿದ ರೋಹಿತ್​ ಶರ್ಮ ಪಡೆ ಆಸ್ಟ್ರೆಲಿಯಾ ಎದುರು ಆಘಾತ ಎದುರಿಸಿ 140 ಕೋಟಿ ಭಾರತೀಯರ ಕನಸು ಭಗ್ನಗೊಳಿಸಿದ ಕ್ಷಣಕ್ಕೆ ಮಂಗಳವಾರ ಒಂದು ವರ್ಷ ತುಂಬಿದೆ.

2023ರ ನವೆಂಬರ್​ 19ರಂದು ಅಹಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ತವರಿನ ಏಕದಿನ ವಿಶ್ವಕಪ್​ ಫೈನಲ್​ನಲ್ಲಿ ಭಾರತ ಹಾಟ್ ಫೇವರಿಟ್​ ಆಗಿ ಕಣಕ್ಕಿಳಿದಿತ್ತು. ಆದರೆ ಬ್ಯಾಟಿಂಗ್​ ವಿಭಾಗದ ವೈಫಲ್ಯದಿಂದಾಗಿ ಭರ್ತಿ 50 ಓವರ್​ಗಳಲ್ಲಿ 240 ರನ್​ಗಳಿಗೆ ಸರ್ವಪತನ ಕಂಡಿತು. ನಾಯಕ ರೋಹಿತ್​ ಶರ್ಮ (47) ಬಿರುಸಿನ ಆರಂಭ ಒದಗಿಸಿ ನಿರ್ಗಮಿಸಿದ ಬಳಿಕ ವಿರಾಟ್​ ಕೊಹ್ಲಿ (54) ತಂಡಕ್ಕೆ ಆಸರೆಯಾದರು. ಆದರೆ ಎದುರಾಳಿ ನಾಯಕ ಪ್ಯಾಟ್​ ಕಮ್ಮಿನ್ಸ್​ ಎಸೆತದಲ್ಲಿ ಕೊಹ್ಲಿ ಕ್ಲೀನ್​ಬೌಲ್ಡ್​ ಆದ ಬಳಿಕ ಭಾರತ ದಿಢೀರ್​ ಕುಸಿತ ಕಂಡಿತು. ಕನ್ನಡಿಗ ಕೆಎಲ್​ ರಾಹುಲ್​ 66 ರನ್​ಗಳಿಗೆ 107 ಎಸೆತ ಎದುರಿಸಿ ಚಡಪಡಿಸಿದ್ದರು.

ಪ್ರತಿಯಾಗಿ ಟ್ರಾವಿಸ್​ ಹೆಡ್​ (137) ಭರ್ಜರಿ ಶತಕದ ಬಲದಿಂದ ಆಸೀಸ್​ 43 ಓವರ್​ಗಳಲ್ಲೇ 4 ವಿಕೆಟ್​ಗೆ 241 ರನ್​ ಪೇರಿಸಿ 6ನೇ ಬಾರಿ ಏಕದಿನ ವಿಶ್ವ ಚಾಂಪಿಯನ್​ ಪಟ್ಟವೇರಿತು. 1983, 2011ರ ಬಳಿಕ ಮತ್ತೊಮ್ಮೆ ಏಕದಿನ ವಿಶ್ವಕಪ್​ ಜಯಿಸುವ ಭಾರತದ ಆಸೆ ಭಗ್ನಗೊಂಡಿತ್ತು. ಪಂದ್ಯ ವೀಸಲು ತೆರಳಿದ್ದ ಪ್ರಧಾನಿ ನರೇಂದ್ರ ಮೋದಿ, ಸೋಲಿನ ಬಳಿಕ ಭಾರತ ತಂಡದ ಡ್ರೆಸ್ಸಿಂಗ್​ ರೂಮ್​ಗೆ ತೆರಳಿ ಆಟಗಾರರಿಗೆ ಸಾಂತ್ವನ ಹೇಳಿದ್ದರು.

https://www.vijayavani.net/gill-injured-rohit-unavailable-kannadiga-stayed-in-aussie-as-a-reserve-batter