ಡಬ್ಲ್ಯುಟಿಸಿ 4ನೇ ಆವೃತ್ತಿಯಲ್ಲಿ ಭಾರತಕ್ಕೆ ಮೊದಲ ಸವಾಲು: ಪ್ರತಿ ದಿನದಾಟ ಹೀಗಿರಲಿದೆ, ಬುಮ್ರಾ-ರೂಟ್​ ಮುಖಾಮುಖಿ ನಿರ್ಣಾಯಕ

ಲೀಡ್ಸ್​: ಕೆಲ ಪ್ರಮುಖ ಆಟಗಾರರ ವಿದಾಯದ ಬಳಿಕ ಹೊಸ ನಾಯಕನೊಂದಿಗೆ ಟೆಸ್ಟ್​ ಕ್ರಿಕೆಟ್​ನಲ್ಲಿ ಹೊಸ ಅಧ್ಯಾಯವನ್ನು ಆರಂಭಿಸಲು ಭಾರತ ತಂಡ ಸಜ್ಜಾಗಿದೆ. ಶುಕ್ರವಾರದಿಂದ ನಡೆಯಲಿರುವ ಆತಿಥೇಯ ಇಂಗ್ಲೆಂಡ್​ ವಿರುದ್ಧದ 5 ಪಂದ್ಯಗಳ ಆಂಡರ್​ಸನ್​-ತೆಂಡುಲ್ಕರ್​ ಟ್ರೋಫಿ ಟೆಸ್ಟ್​ ಸರಣಿಯಲ್ಲಿ ಶುಭಾರಂಭ ಕಾಣುವುದು ಶುಭಮಾನ್​ ಗಿಲ್​ ಪಡೆಯ ಹಂಬಲವಾಗಿದೆ. ಸ್ಥಿತ್ಯಂತರದ ಸವಾಲಿನೊಂದಿಗೆ ಆಂಗ್ಲರ ಆಕ್ರಮಣಕಾರಿ "ಬಾಜ್​ಬಾಲ್​' ಕಾರ್ಯತಂತ್ರವನ್ನು ಮೊದಲ ಬಾರಿ ಅವರದೇ ನೆಲದಲ್ಲಿ ಎದುರಿಸುವ ಸತ್ವಪರೀಕ್ಷೆ ಭಾರತಕ್ಕೆ ಎದುರಾಗಲಿದೆ. ಕ್ರಿಕೆಟ್​ ಜನಕರ ನಾಡಿನಲ್ಲಿ 18 ವರ್ಷಗಳ ಬಳಿಕ ಟೆಸ್ಟ್​ ಸರಣಿ ಜಯಿಸುವ ಕನಸನ್ನೂ ಭಾರತದ ಯುವ-ಅನನುಭವಿಗಳ ತಂಡ ಹೊಂದಿದೆ. ಇದು ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ (ಡಬ್ಲ್ಯುಟಿಸಿ) 4ನೇ ಆವೃತ್ತಿಯಲ್ಲಿ ಉಭಯ ತಂಡಗಳಿಗೂ ಮೊದಲ ಸರಣಿ ಆಗಿದೆ.

ಮುಖಾಮುಖಿ: 136

ಭಾರತ: 35

ಇಂಗ್ಲೆಂಡ್​: 51

ಡ್ರಾ: 50

ಇಂಗ್ಲೆಂಡ್​ನಲ್ಲಿ: 67

ಭಾರತ: 9

ಇಂಗ್ಲೆಂಡ್​: 36

ಡ್ರಾ: 22

ಲೀಡ್ಸ್​ನಲ್ಲಿ: 7

ಭಾರತ: 2

ಇಂಗ್ಲೆಂಡ್​: 4

ಡ್ರಾ: 1

ಪ್ರತಿ ದಿನದಾಟ ಹೀಗಿರಲಿದೆ:

ಮೊದಲ ಅವಧಿ: ಮಧ್ಯಾಹ್ನ 3.30-5.30

ಎರಡನೇ ಅವಧಿ: ಸಂಜೆ 6.10-8.10

ಮೂರನೇ ಅವಧಿ: ರಾತ್ರಿ 8.30-10.30

ಭಾರತ-ಇಂಗ್ಲೆಂಡ್​ ಟೆಸ್ಟ್​ ಸರಣಿ ವೇಳಾಪಟ್ಟಿ

ಪಂದ್ಯ ದಿನಾಂಕ ಎಲ್ಲಿ

1. ಜೂನ್​ 20-24 , ಲೀಡ್ಸ್​

2. ಜುಲೈ 2-6, ರ್ಬಮಿಂಗ್​ಹ್ಯಾಂ

3. ಜುಲೈ 10-14, ಲಾರ್ಡ್ಸ್​

4. ಜುಲೈ 23-27,  ಮ್ಯಾಂಚೆಸ್ಟರ್​

5. ಜು.31-ಆ.4, ಓವಲ್​

*ಎಲ್ಲ ಪಂದ್ಯಗಳು ಆರಂಭ: ಮಧ್ಯಾಹ್ನ 3.30

*ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​

ಪಿಚ್​ ರಿಪೋರ್ಟ್​

ಹೆಡಿಂಗ್ಲೆ ಮೈದಾನದ ಹಸಿರು ಪಿಚ್​ ಮೊದಲ ದಿನ ವೇಗದ ಬೌಲರ್​ಗಳಿಗೆ ಹೆಚ್ಚಿನ ನೆರವು ನೀಡಿದರೂ, ನಂತರದಲ್ಲಿ ಬ್ಯಾಟಿಂಗ್​ಗೆ ಸಹಕಾರಿಯಾಗಿರಲಿದೆ ಎಂದು ಪಿಚ್​ ಕ್ಯೂರೇಟರ್​ ರಿಚರ್ಡ್​ ರಾಬಿನ್​ಸನ್​ ತಿಳಿಸಿದ್ದಾರೆ. ಇದು ಆಂಗ್ಲರ ಬಾಜ್​ಬಾಲ್​ ಆಕ್ರಮಣಕಾರಿ ಕಾರ್ಯತಂತ್ರಕ್ಕೆ ಅನುಕೂಲಕರವಾದ ಪಿಚ್​ ಎನಿಸಿದೆ. ಹೀಗಾಗಿ ಭಾರತೀಯ ಬ್ಯಾಟಿಂಗ್​ ವಿಭಾಗವೂ ಈ ಪಿಚ್​ಗೆ ಸಾಧ್ಯವಾದಷ್ಟು ಬೇಗನೆ ಹೊಂದಿಕೊಳ್ಳಬೇಕಾದ ಅಗತ್ಯವಿದೆ. ವಾರಾಂತ್ಯದಲ್ಲಿ ಲೀಡ್ಸ್​ ವಾತಾವರಣ 30 ಡಿಗ್ರಿವರೆಗೂ ಉಷ್ಣಾಂಶ ಹೊಂದಿರಲಿದ್ದು, ದಿನಗಳೆದಂತೆ ಪಿಚ್​ ತೇವಾಂಶ ಕಳೆದುಕೊಳ್ಳಲಿದೆ. ಹೆಡಿಂಗ್ಲೆಯಲ್ಲಿ ಸಾಮಾನ್ಯವಾಗಿ ಆಂಗ್ಲರ ಬೇಸಗೆ ಋತುವಿನ 3ನೇ ಟೆಸ್ಟ್​ ನಡೆಯುತ್ತಿತ್ತು. ಆದರೆ ಈ ಬಾರಿ ಇಲ್ಲಿ ಮೊದಲ ಟೆಸ್ಟ್​ ಪಂದ್ಯವೇ ನಿಗದಿಯಾಗಿದ್ದು, ಲೀಡ್ಸ್​ನಲ್ಲಿ ಮಳೆಯೂ ಸುರಿದಿಲ್ಲ. ಹೀಗಾಗಿ ಈ ಸಲದ ಪಿಚ್​ ಸ್ವಲ್ಪ ಭಿನ್ನವಾಗಿ ವರ್ತಿಸಿದರೂ ಅಚ್ಚರಿ ಇಲ್ಲ.

ಬುಮ್ರಾ&ರೂಟ್​ ಮುಖಾಮುಖಿ ನಿರ್ಣಾಯಕ

ಅನುಭವಿ ಬ್ಯಾಟರ್​ ಜೋ ರೂಟ್​ ಮತ್ತು ವೇಗಿ ಜಸ್​ಪ್ರೀತ್​ ಬುಮ್ರಾ ನಡುವಿನ ಮುಖಾಮುಖಿ ಸರಣಿಯ ಲಿತಾಂಶ ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುವ ನಿರೀಕ್ಷೆ ಇದೆ. ರೂಟ್​ ಭಾರತ ವಿರುದ್ಧ ಆಡಿದ 30 ಟೆಸ್ಟ್​ಗಳಲ್ಲಿ 10 ಶತಕಗಳ ಸಹಿತ ಸರ್ವಾಧಿಕ 2,846 ರನ್​ ಬಾರಿಸಿದ ದಾಖಲೆ ಹೊಂದಿದ್ದಾರೆ. ಅಲ್ಲದೆ ಈ ಸರಣಿಯಲ್ಲಿ ಭಾರತ ವಿರುದ್ಧ 3 ಸಾವಿರ ರನ್​ ಸಿಡಿಸಿದ ಮೊದಲಿಗರೆನಿಸುವ ಹಂಬಲದಲ್ಲಿದ್ದಾರೆ. ಆದರೆ ಬುಮ್ರಾ, ಟೆಸ್ಟ್​ನಲ್ಲಿ ಇದುವರೆಗೆ 9 ಬಾರಿ ರೂಟ್​ ವಿಕೆಟ್​ ಕಿತ್ತ ಮೇಲುಗೈ ಹೊಂದಿದ್ದಾರೆ. ಹೀಗಾಗಿ ಈ ಸಲವೂ ರೂಟ್​ರನ್ನು ನಿಯಂತ್ರಿಸುವಲ್ಲಿ ಬುಮ್ರಾ ಎಷ್ಟರ ಮಟ್ಟಿಗೆ ಯಶಸ್ವಿಯಾಗುವರು ಎಂಬುದು ನಿರ್ಣಾಯಕವಾಗಲಿದೆ.