ಅಭ್ಯಾಸ ಪಂದ್ಯಕ್ಕೆ ಮುನ್ನ ಔತಣಕೂಟದಲ್ಲಿ ಭಾರತ ತಂಡ ಭಾಗಿ: ಪಾರ್ಲಿಮೆಂಟ್ ಹೌಸ್‌ನಲ್ಲಿ ರೋಹಿತ್ ಪಡೆ

ಕ್ಯಾನ್‌ಬೆರಾ: ಆಸ್ಟ್ರೇಲಿಯಾ ಪ್ರಧಾನಿ ಆಂಥೋನಿ ಅಲ್ಬನೀಸ್ ಆಯೋಜಿಸಿದ್ದ ಆಹ್ವಾನಿತ ಔತಣ ಕೂಟದಲ್ಲಿ ಪ್ರವಾಸಿ ಭಾರತ ಕ್ರಿಕೆಟ್ ತಂಡದ ಸದಸ್ಯರು ಗುರುವಾರ ಪಾಲ್ಗೊಂಡರು. ಆಸ್ಟ್ರೇಲಿಯಾ ಪ್ರಧಾನ ಮಂತ್ರಿ ಇಲೆವೆನ್ ತಂಡದ ಆಟಗಾರರು ಸಾಥ್ ನೀಡಿದರು.

ಮನುಕಾ ಓವಲ್‌ನಲ್ಲಿ ಶನಿವಾರ ಹಾಗೂ ಭಾನುವಾರ ನಡೆಯಲಿರುವ ದ್ವಿದಿನ ಪಿಂಕ್‌ಬಾಲ್ ಅಭ್ಯಾಸ ಪಂದ್ಯ ಆಡಲು ಬುಧವಾರ ಕ್ಯಾನ್‌ಬೆರಾ ತೆರಳಿರುವ ರೋಹಿತ್ ಶರ್ಮ ಪಡೆಗೆ ಆಸೀಸ್ ಪಾರ್ಲಿಮೆಂಟ್ ಹೌಸ್‌ನಲ್ಲಿ ಭವ್ಯ ಸ್ವಾಗತ ದೊರೆಯಿತು. ಶಿಷ್ಟಾಚಾರ ಪ್ರಕಾರ ಟೀಮ್ ಇಂಡಿಯಾ ಆಟಗಾರರನ್ನು ರೋಹಿತ್, ಅಲ್ಬನೀಸ್‌ಗೆ ಪರಿಚಯಿಸಿದರು. ಇದೇ ವೇಳೆ ಪರ್ತ್ ಟೆಸ್ಟ್ ಜಯದ ರೂವಾರಿಗಳಾದ ಅನುಭವಿ ವಿರಾಟ್ ಕೊಹ್ಲಿ ಹಾಗೂ ಪಂದ್ಯಶ್ರೇಷ್ಠ ಜಸ್‌ಪ್ರೀತ್ ಬುಮ್ರಾ ಅವರ ಪ್ರದರ್ಶನಕ್ಕೆ ಅಲ್ಬನೀಸ್ ಮೆಚ್ಚುಗೆ ವ್ಯಕ್ತಪಡಿಸಿದರು.

ಆಸೀಸ್ ಸಂಸತ್‌ನಲ್ಲಿ ಭಾರತ ಹಾಗೂ ಆಸ್ಟ್ರೇಲಿಯಾ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧಗಳ ಬಗ್ಗೆ ಮಾತನಾಡಿದ ರೋಹಿತ್ ಶರ್ಮ, ‘ನಾವು ಆಸ್ಟ್ರೇಲಿಯಾ ಎದುರು ಆರಂಭಿಕ ಯಶಸ್ಸು ಸಾಧಿಸಿದ್ದು, ಇದೇ ವೇಗವನ್ನು ಮುಂದಕ್ಕೆ ಕೊಂಡೊಯ್ಯಲು ಬಯಸುತ್ತೇವೆ. ಉಳಿದ ಪಂದ್ಯಗಳಲ್ಲಿ ಎರಡೂ ದೇಶಗಳ ಅಭಿಮಾನಿಗಳಿಗೆ ಮನೋರಂಜನೆ ನೀಡಲು ಬಯಸುತ್ತೇವೆ. ಕ್ರಿಕೆಟ್ ಜತೆಗೆ ಸ್ಥಳೀಯ ಸಂಸ್ಕೃತಿ, ತಾಣಗಳು ಬಹಳ ಸಂತೋಷ ನೀಡುತ್ತವೆ. ಔತಣ ಕೂಟಕ್ಕೆ ಆಹ್ವಾನಿಸಿದ್ದಕ್ಕಾಗಿ ಧನ್ಯವಾದ’ ತಿಳಿಸಿದರು.

ಬಾರ್ಡರ್-ಗಾವಸ್ಕರ್ ಟ್ರೋಫಿ ಸರಣಿಯ ಎರಡನೇ ಟೆಸ್ಟ್ ಡಿ.6ರಂದು ಅಡಿಲೇಡ್‌ನಲ್ಲಿ ಆರಂಭವಾಗಲಿದ್ದು, ಇದು ಪಿಂಕ್‌ಬಾಲ್ ಅಹರ್ನಿಶಿ ಪಂದ್ಯವಾಗಿರಲಿದೆ. ಈ ಟೆಸ್ಟ್‌ಗೆ ಪೂರ್ವಸಿದ್ಧತೆಯಾಗಿ ಭಾರತ, ಪ್ರಧಾನ ಮಂತ್ರಿ ಇಲೆವೆನ್ ಎದುರು ಅಭ್ಯಾಸ ಪಂದ್ಯವನ್ನಾಡಲಿದೆ.