ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಮೂರು ವರ್ಷಗಳ ನಂತರ "ಬ್ಲೂ ಟೈಗರ್ಸ್' ಭಾರತ ಫುುಟ್ಬಾಲ್ ತಂಡ ಉದ್ಯಾನನಗರಿಯಲ್ಲಿ ಆಡಲು ಸಜ್ಜಾಗಿದ್ದು, ಶ್ರೀ ಕಂಠೀರವ ಕ್ರೀಡಾಂಗಣದಲ್ಲಿ ಶುಕ್ರವಾರ ನಡೆಯಲಿರುವ ಫಿಫಾ ಅಂತಾರಾಷ್ಟ್ರೀಯ ಸೌಹಾರ್ದ ಪಂದ್ಯದಲ್ಲಿ ಪನಾಮಾ ಎದುರು ಕಣಕ್ಕಿಳಿಯಲಿದೆ. ಫಿಫಾ ರ್ಯಾಂಕಿಂಗ್ನ 44ನೇ ಸ್ಥಾನಿ ಪನಮಾ 2018, 2026ರ ವಿಶ್ವಕಪ್ನಲ್ಲಿ ಆಡಿದ ಅನುಭವ ಹೊಂದಿದೆ.
2023ರ ಸ್ಯಾಫ್ ಚಾಂಪಿಯನ್ಷಿಪ್ ಫೈನಲ್ನಲ್ಲಿ ಕೊನೆಯದಾಗಿ ಬೆಂಗಳೂರಿನಲ್ಲಿ ಆಡಿದ್ದ ಭಾರತ ಫಿಫಾ ರ್ಯಾಂಕಿಂಗ್ನಲ್ಲಿ 138ನೇ ಸ್ಥಾನದಲ್ಲಿದೆ. ಉಭಯ ತಂಡಗಳ ನಡುವೆ ಮೊದಲ ಸೌಹಾರ್ದ ಪಂದ್ಯ ಇದಾಗಿದ್ದು, ಏಷ್ಯನ್ ಟೂರ್ನಿಗಳಲ್ಲಿ ಸಾಧಾರಣ ನಿರ್ವಹಣೆ ತೋರಿರುವ ಭಾರತ ತಂಡಕ್ಕೆ ಕಠಿಣ ಪೈಪೋಟಿ ಎದುರಾಗಲಿದೆ. ಪನಾಮಾ ನಂತರ ಐದು ಬಾರಿಯ ವಿಶ್ವ ಚಾಂಪಿಯನ್ ಬ್ರೆಜಿಲ್ ಹಾಗೂ ಎರಡು ಬಾರಿಯ ಚಾಂಪಿಯನ್ ಉರುಗ್ವೆ ಎದುರು ಭಾರತ ಕಣಕ್ಕಿಳಿಯಲಿದೆ.
ಬ್ರೆಜಿಲ್ ಹಾಗೂ ಉರುಗ್ವೆ ಜತೆಗೆ ಪನಾಮಾ ವಿರುದ್ಧ ಪಂದ್ಯವೂ ಭಾರತೀಯ ಆಟಗಾರರಿಗೆ ಉತ್ತಮ ಕಲಿಕೆ ಎನಿಸಲಿದೆ ಎಂದು ಮುಖ್ಯಕೋಚ್ ಖಾಲಿದ್ ಜಮೀಲ್ ಅಭಿಪ್ರಾಯಪಟ್ಟಿದ್ದಾರೆ. ಡಿಫೆಂಡರ್ ಅನ್ವರ್ ಅಲಿ ಹಾಗೂ ಮಿಡ್ ಫೀಲ್ಡರ್ಗಳಾದ ಸಹಲ್ ಅಬ್ದುಲ್ ಸಮದ್ ಜತೆಗೆ ಫಾರ್ವರ್ಡ್ಗಳಾದ ಮನ್ವೀರ್ ಸಿಂಗ್, ರಹೀಮ್ ಅಲಿ ಭಾರತದ ಪ್ರಮುಖ ತಾರೆಯರೆನಿಸಿದ್ದಾರೆ. ಫಿಫಾ ವಿಶ್ವಕಪ್ನಲ್ಲಿ ಆಡಿದ 14 ಆಟಗಾರರ ಜತೆಗೆ ವಿದೇಶೀ ಲೀಗ್ಗಳಲ್ಲಿ ಆಡಿದ ಒಟ್ಟು 22 ಆಟಗಾರರ ಬಲ ಪನಾಮಾ ಹೊಂದಿದೆ.
ಆರಂಭ: ರಾತ್ರಿ 7.30
ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್, ಸೋನಿ ಲಿವ್
