ಏಕದಿನದಲ್ಲಿ ಭಾರತಕ್ಕೆ ಕಿವೀಸ್ ತಿರುಗೇಟು: ಶ್ರೇಯಸ್ ಅಯ್ಯರ್ ಶತಕದ ಹೋರಾಟ ವ್ಯರ್ಥ, ಬೃಹತ್ ಸವಾಲು ಬೆನ್ನಟ್ಟಲು ನೆರವಾದ ಟೇಲರ್ ಸೆಂಚುರಿ

ಹ್ಯಾಮಿಲ್ಟನ್: ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್ ಶ್ರೇಯಸ್ ಅಯ್ಯರ್ (103 ರನ್, 107 ಎಸೆತ, 11 ಬೌಂಡರಿ, 1 ಸಿಕ್ಸರ್) ಹಾಗೂ ಕನ್ನಡಿಗ ಕೆಎಲ್ ರಾಹುಲ್ (88 ರನ್, 64 ಎಸೆತ, 3 ಬೌಂಡರಿ, 6 ಸಿಕ್ಸರ್) ಜೋಡಿಯ ಸಿಡಿಲಬ್ಬರದ ಬ್ಯಾಟಿಂಗ್​ನಿಂದ ಭಾರತ ತಂಡ ಬೃಹತ್ ಮೊತ್ತ ಪೇರಿಸಿದರೂ, ರಕ್ಷಿಸಿಕೊಳ್ಳಲು ವಿಫಲವಾದ ಭಾರತ ಮೊದಲ ಏಕದಿನ ಪಂದ್ಯದಲ್ಲಿ ಮುಗ್ಗರಿಸಿದೆ. ಅನುಭವಿ ಬ್ಯಾಟ್ಸ್​ಮನ್ ರಾಸ್ ಟೇಲರ್ (109*ರನ್, 84 ಎಸೆತ, 10 ಬೌಂಡರಿ, 4 ಸಿಕ್ಸರ್) ಬಿರುಸಿನ ಬ್ಯಾಟಿಂಗ್​ಗೆ ತಲೆಬಾಗಿದ ಭಾರತ ತಂಡ ಆತಿಥೇಯ ನ್ಯೂಜಿಲೆಂಡ್ ತಂಡಕ್ಕೆ 4 ವಿಕೆಟ್​ಗಳಿಂದ ಶರಣಾಯಿತು. ಟಿ20 ಸರಣಿಯ ವೈಟ್​ವಾಷ್ ಮುಖಭಂಗದ ಬಳಿಕ ವಿಶ್ವಕಪ್ ರನ್ನರ್​ಅಪ್ ಕಿವೀಸ್ ತಂಡ ಏಕದಿನದಲ್ಲಿ ತಿರುಗೇಟು ನೀಡಿದೆ.

ಸೆಡ್ಡನ್ ಪಾರ್ಕ್​ನಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಭಾರತ, 4 ವಿಕೆಟ್​ಗೆ 347 ರನ್ ಗಳಿಸಿತು. ಪ್ರತಿಯಾಗಿ ನ್ಯೂಜಿಲೆಂಡ್ 48.1 ಓವರ್​ಗಳಲ್ಲಿ 6 ವಿಕೆಟ್​ಗೆ 348 ರನ್ ಗಳಿಸಿ ಜಯದ ನಗೆ ಬೀರಿತು. ಸತತ 8 ಸೋಲಿನ ಬಳಿಕ ಜಯದ ಹಾದಿಗೆ ಮರಳಿದ ಕಿವೀಸ್ ತಂಡ 3 ಪಂದ್ಯಗಳ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿದೆ.

ಕಿವೀಸ್ ಉತ್ತಮ ಆರಂಭ: ಬೃಹತ್ ಮೊತ್ತ ಬೆನ್ನಟ್ಟಿದ ಕಿವೀಸ್​ಗೆ ಆರಂಭಿಕರಾದ ಮಾರ್ಟಿನ್ ಗುಪ್ಟಿಲ್ (32) ಹಾಗೂ ಹೆನ್ರಿ ನಿಕೋಲ್ಸ್ ಜೋಡಿ ಬಿರುಸಿನ ಬ್ಯಾಟಿಂಗ್ ಮೂಲಕ ಭದ್ರ ಬುನಾದಿ ಹಾಕಿಕೊಟ್ಟಿತು. ಮೊದಲ ವಿಕೆಟ್​ಗೆ 85 ರನ್ ಪೇರಿಸಿದ್ದ ವೇಳೆ ಶಾರ್ದೂಲ್ ಠಾಕೂರ್ ಈ ಜೋಡಿಯನ್ನು ಬೇರ್ಪಡಿಸಿದರು. ಬಳಿಕ ಬಂದ ಟಾಮ್ ಬ್ಲಂಡೆಲ್ (9) ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಆಗ ನಾಲ್ಕನೇ ಕ್ರಮಾಂಕದಲ್ಲಿ ಕ್ರೀಸ್​ಗಿಳಿದ ರಾಸ್ ಟೇಲರ್ ಭಾರತೀಯ ಬೌಲರ್​ಗಳನ್ನು ದಂಡಿಸಿ, ನಿಕೋಲ್ಸ್ ಜತೆಗೂಡಿ 3ನೇ ವಿಕೆಟ್​ಗೆ 62 ರನ್ ಜತೆಯಾಟವಾಡಿದರು. -ಏಜೆನ್ಸೀಸ್

ರನ್​ವೇಗ ಹೆಚ್ಚಿಸಿದ ರಾಹುಲ್-ಶ್ರೇಯಸ್

ಆತಿಥೇಯ ನ್ಯೂಜಿಲೆಂಡ್ ತಂಡದ ಬಿಗಿ ಬೌಲಿಂಗ್ ದಾಳಿಯಿಂದಾಗಿ ಭಾರತ ತಂಡ 29ನೇ ಓವರ್ ಅಂತ್ಯಕ್ಕೆ 3 ವಿಕೆಟ್​ಗೆ 156 ರನ್ ಪೇರಿಸಲಷ್ಟೇ ಶಕ್ತವಾಗಿತ್ತು. ಈ ವೇಳೆ ಜತೆಯಾದ ಶ್ರೇಯಸ್ ಅಯ್ಯರ್ ಹಾಗೂ ಕನ್ನಡಿಗ ಕೆಎಲ್ ರಾಹುಲ್ ಜೋಡಿ ಪಂದ್ಯದ ದಿಕ್ಕನ್ನೇ ಬದಲಿಸಿತು. ಟಿ20 ಮಾದರಿಯಲ್ಲಿ ಬ್ಯಾಟ್ ಬೀಸುವ ಮೂಲಕ, ಸಾಧಾರಣ ಮೊತ್ತದತ್ತ ಸಾಗುತ್ತಿದ್ದ ತಂಡದ ಮೊತ್ತವನ್ನು ಹಿಗ್ಗಿಸಿತು. ಪ್ರತಿ ಓವರ್​ಗೆ ಸರಾಸರಿ 10ರಂತೆ ರನ್ ಪೇರಿಸಿದ ಈ ಜೋಡಿ ಪಂದ್ಯದ ಮೊತ್ತ 300ರ ಗಡಿ ದಾಟಲು ನೆರವಾಯಿತು. ಈ ಜೋಡಿ 4ನೇ ವಿಕೆಟ್​ಗೆ 136ರನ್ ಜತೆಯಾಟವಾಡಿತು. ಏಕದಿನ ಮಾದರಿಯಲ್ಲಿ ಚೊಚ್ಚಲ ಶತಕ ಸಿಡಿಸಿದ ಶ್ರೇಯಸ್ ಅಯ್ಯರ್ 4ನೇ ಕ್ರಮಾಂಕಕ್ಕೆ ಸಮರ್ಥ ಬ್ಯಾಟ್ಸ್​ಮನ್ ಎಂಬುದನ್ನು ನಿರೂಪಿಸಿದರು. ಶತಕ ಸಿಡಿಸಿದ ಬೆನ್ನಲ್ಲೇ ಟಿಮ್ ಸೌಥಿಗೆ ವಿಕೆಟ್ ನೀಡಿದರು. ಬಳಿಕ ರಾಹುಲ್ ಹಾಗೂ ಕೇದಾರ್ ಜಾಧವ್ (26*ರನ್, 15 ಎಸೆತ, 3 ಬೌಂಡರಿ, 1 ಸಿಕ್ಸರ್) ಜೋಡಿ ಕೊನೇ 27 ಎಸೆತಗಳಲ್ಲಿ 58 ರನ್ ಕಲೆಹಾಕಿ ಮೊತ್ತವನ್ನು 345ರ ಗಡಿ ದಾಟಿಸಿತು.

ಭಾರತ ತಂಡದ ನಾಯಕ

ಟಿ20 ಕ್ರಿಕೆಟ್​ನಲ್ಲಿ ಗೆಲುವಿಗಾಗಿ ಹೋರಾಡಿದರೂ ಅಂತಿಮ ಹಂತದಲ್ಲಿ ಕೈಕೊಡುತ್ತಿದ್ದ ಅನುಭವಿ ರಾಸ್ ಟೇಲರ್ ಏಕದಿನದಲ್ಲಿ ಅಂಥ ತಪ್ಪೆಸಗಲಿಲ್ಲ. ಸಮರ್ಥ ನಿರ್ವಹಣೆ ಮೂಲಕ ಅಂತಿಮ ಕ್ಷಣದವರೆಗೂ ಕ್ರೀಸ್​ನಲ್ಲಿ ನಿಂತು ತಂಡಕ್ಕೆ ಜಯ ತಂದುಕೊಟ್ಟರು. ಟೇಲರ್​ಗೆ ವಿಕೆಟ್ ಕೀಪರ್ ಹಾಗೂ ಹಂಗಾಮಿ ನಾಯಕ ಟಾಮ್ ಲಾಥಮ್ ಕೂಡ ಅಗತ್ಯ ಸಾಥ್ ನೀಡಿದರು. ಟೇಲರ್-ಲಾಥಮ್ ಜೋಡಿ 4ನೇ ವಿಕೆಟ್​ಗೆ 138 ರನ್ ಜತೆಯಾಟವಾಡಿ ಗೆಲುವನ್ನು ಸುಲಭವಾಗಿಸಿತು. ಲಾಥಮ್ ಕುಲದೀಪ್ ಯಾದವ್ ಎಸೆತದಲ್ಲಿ ನಿರ್ಗಮಿಸಿದ ಬೆನ್ನಲ್ಲೇ ನೀಶಾಮ್ (9) ಹಾಗೂ ಗ್ರಾಂಡ್​ಹೋಮ್ (1) ವಿಫಲರಾದರೂ, ಮತ್ತೊಂದು ತುದಿಯಲ್ಲಿದ್ದ ಟೇಲರ್ ಯಾವುದೇ ಅಪಾಯಕ್ಕೆ ಎಡೆಮಾಡಿಕೊಡದಂತೆ, ಇನ್ನೂ 11 ಎಸೆತ ಬಾಕಿ ಇರುವಂತೆಯೇ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಶ್ರೇಯಸ್-ಕೊಹ್ಲಿ ಆಸರೆ

ಹೊಸ ಆರಂಭಿಕರಾದ ಪೃಥ್ವಿ ಷಾ-ಮಯಾಂಕ್ ಅಗರ್ವಾಲ್ ಅರ್ಧಶತಕದ ಜತೆಯಾಟವಾಡಿ ನಿರ್ಗಮಿಸಿದ ಬಳಿಕ ಜತೆಯಾದ ನಾಯಕ ವಿರಾಟ್ ಕೊಹ್ಲಿ (51ರನ್, 63 ಎಸೆತ, 6 ಬೌಂಡರಿ) ಹಾಗೂ ಶ್ರೇಯಸ್ ಅಯ್ಯರ್ ಜೋಡಿ ಬೃಹತ್ ಮೊತ್ತದ ಆಸೆಗೆ ಬಲ ತುಂಬಿತು. ವಿಕೆಟ್ ಕಾಯ್ದುಕೊಳ್ಳುವುದರ ಜತೆಗೆ ಇನಿಂಗ್ಸ್ ಕಟ್ಟಲು ಈ ಜೋಡಿ ಯಶಸ್ವಿಯಾಯಿತು. ಕೊಹ್ಲಿ ಪಾಲಿಗೆ ಇಶ್ ಸೋಧಿ ಮತ್ತೊಮ್ಮೆವಿಲನ್ ಆದರು. ಅರ್ಧಶತಕ ಗಳಿಸಿದ ಬೆನ್ನಲ್ಲೇ ವಿರಾಟ್ ಕೊಹ್ಲಿ, ಇಶ್ ಸೋಧಿ ಎಸೆತವನ್ನು ಎದುರಿಸಲು ವಿಫಲರಾಗಿ ಬೌಲ್ಡ್ ಆದರು. ಈ ವೇಳೆಗೆ ಕೊಹ್ಲಿ-ಶ್ರೇಯಸ್ ಜೋಡಿ 3ನೇ ವಿಕೆಟ್​ಗೆ 102 ರನ್ ಕಲೆಹಾಕಿತ್ತು.