ಜೂನಿಯರ್​ ಹಾಕಿ ವಿಶ್ವಕಪ್​: ಭಾರತಕ್ಕೆ ಸೆಮೀಸ್​ನಲ್ಲಿ ನಿರಾಸೆ, ಇನ್ನು ಕಂಚಿನ ಆಸೆ

ಕೌಲಾಲಂಪುರ: ಭಾರತ ತಂಡ ಜೂನಿಯರ್​ ಪುರುಷರ ಹಾಕಿ ವಿಶ್ವಕಪ್​ನಲ್ಲಿ ಸತತ 2ನೇ ಬಾರಿಗೆ ಜರ್ಮನಿ ವಿರುದ್ಧ ಉಪಾಂತ್ಯದ ಹೋರಾಟದಲ್ಲಿ ನಿರಾಸೆ ಅನುಭವಿಸಿದೆ. ಗುರುವಾರ ನಡೆದ ಸೆಮಿಫೈನಲ್​ ಪಂದ್ಯದಲ್ಲಿ ಭಾರತ ತಂಡ 1-4 ಗೋಲುಗಳಿಂದ ಪರಾಭವಗೊಂಡಿತು. ತನಗೆ ಲಭಿಸಿದ 12 ಪೆನಾಲ್ಟಿ ಕಾರ್ನರ್​ಗಳಲ್ಲಿ ಒಂದನ್ನೂ ಗೋಲಾಗಿ ಪರಿವರ್ತಿಸಲು ವಿಫಲವಾಗಿದ್ದು ಭಾರತ ತಂಡದ ಸೋಲಿಗೆ ಪ್ರಮುಖ ಕಾರಣವಾಯಿತು. ಅತ್ತ ಜರ್ಮನಿ ತನಗೆ ಲಭಿಸಿದ 2 ಪೆನಾಲ್ಟಿ ಕಾರ್ನರ್​ಗಳನ್ನೂ ಗೋಲಾಗಿಸಿತು.

ಸುದೀಪ್​ ಚಿರ್ಮಾಕೋ 11ನೇ ನಿಮಿಷದಲ್ಲಿ ಭಾರತ ತಂಡದ ಪರ ಏಕೈಕ ಫೀಲ್ಡ್​ ಗೋಲು ಬಾರಿಸಿದರು. ಭಾರತ ತಂಡ ಪಂದ್ಯದ ಮೊದಲ ಕ್ವಾರ್ಟರ್​ನಲ್ಲಿ ಜಿದ್ದಾಜಿದ್ದಿನ ಹೋರಾಟ ತೋರಿ, ಮೊದಲಾರ್ಧದಲ್ಲಿ 1-2ರಿಂದ ಹಿನ್ನಡೆ ಅನುಭವಿಸಿತು. ದ್ವೀತಿಯಾರ್ಧದಲ್ಲಿ ಇನ್ನೆರಡು ಗೋಲುಗಳನ್ನು ಬಿಟ್ಟುಕೊಟ್ಟು ಮುಗ್ಗರಿಸಿತು.

ಜರ್ಮನಿಗೆ 8ನೇ ನಿಮಿಷದಲ್ಲಿ ಬೆನ್​ ಹಸ್ಬಾಚ್​ ಫೀಲ್ಡ್​ ಗೋಲು ಮೂಲಕ ಮುನ್ನಡೆ ತಂದುಕೊಟ್ಟರು. ಮೂರೇ ನಿಮಿಷಗಳಲ್ಲಿ ಭಾರತ ಸಮಬಲ ಸಾಧಿಸುವಲ್ಲಿ ಯಶಸ್ವಿಯಾಗಿತ್ತು. ಆದರೆ ಮೊದಲಾರ್ಧ ಮುಕ್ತಾಯಕ್ಕೆ ಕೆಲವೇ ಸೆಕೆಂಡ್​ಗಳಿರುವಾಗ ಹಸ್ಬಾಚ್​ ಪೆನಾಲ್ಟಿ ಕಾರ್ನರ್​ ಮೂಲಕ ಮತ್ತೊಂದು ಗೋಲು ಬಾರಿಸಿ ಮತ್ತೆ ಭಾರತದ ಹಿನ್ನಡೆಗೆ ಕಾರಣರಾದರು. 41 ಮತ್ತು 58ನೇ ನಿಮಿಷಗಳಲ್ಲಿ ಕ್ರಮವಾಗಿ ಪೌಲ್​ ಗ್ಲಾಂಡರ್​ ಮತ್ತು ಫ್ಲೋರಿಯನ್​ ಸ್ಪೆರ್ಲಿಂಗ್​ ಗೋಲು ಬಾರಿಸಿ ಭಾರತದ ಸೋಲಿನ ಅಂತರ ಹಿಗ್ಗಿಸಿದರು.

2021ರ ಆವೃತ್ತಿಯಲ್ಲೂ ಜರ್ಮನಿ ವಿರುದ್ಧವೇ ಸೆಮೀಸ್​ನಲ್ಲಿ ಸೋತಿದ್ದ ಭಾರತ ಈ ಸಲ ಸೇಡು ತೀರಿಸಿಕೊಳ್ಳುವ ಅವಕಾಶವನ್ನು ಕೈಚೆಲ್ಲಿತು. ಭಾರತದ ಕಿರಿಯರು ಜರ್ಮನಿ ವಿರುದ್ಧ ಹಾಲಿ ವರ್ಷ ಆಡಿದ ಐದೂ ಪಂದ್ಯಗಳಲ್ಲಿ ಸೋತಂತಾಗಿದೆ. ಜರ್ಮನಿ ಸತತ 2ನೇ ಮತ್ತು ಕಳೆದ 5 ಆವೃತ್ತಿಗಳಲ್ಲಿ 4ನೇ ಬಾರಿ ಫೈನಲ್​ಗೇರಿದ್ದು, 7ನೇ ಬಾರಿ ಪ್ರಶಸ್ತಿ ಗೆಲ್ಲುವ ತವಕದಲ್ಲಿದೆ. 2ನೇ ಸೆಮಿಫೈನಲ್​ನಲ್ಲಿ ಸ್ಪೇನ್​ ವಿರುದ್ಧ ಗೆದ್ದು ಫ್ರಾನ್ಸ್​ ಫೈನಲ್​ಗೇರಿದೆ.

ಇನ್ನು ಕಂಚಿಗೆ ಹೋರಾಟ

ಭಾರತ ತಂಡ ಇನ್ನು ಶನಿವಾರ ನಡೆಯಲಿರುವ ಪಂದ್ಯದಲ್ಲಿ ಸ್ಪೇನ್​ ವಿರುದ್ಧ ಕಂಚಿನ ಪದಕಕ್ಕಾಗಿ ಹೋರಾಡಲಿದೆ. ಕಳೆದ ಬಾರಿ ಕಂಚಿನಿಂದಲೂ ವಂಚಿತವಾಗಿದ್ದ ಭಾರತ ಈ ಬಾರಿ 3ನೇ ಸ್ಥಾನದ ಸಮಾಧಾನವನ್ನಾದರೂ ಕಾಣುವ ಹಂಬಲದಲ್ಲಿದೆ.

https://www.vijayavani.net/the-total-brand-value-of-the-indian-premier-league-ipl-grew-a-whopping-28-after-the-2023-season