ಎರಡನೇ ಪಂದ್ಯದಲ್ಲಿ ಎಡವಿದ ಭಾರತ; ಬೆಲ್ಜಿಯಂ ಎದುರು ಸೋಲು

ಭುವನೇಶ್ವರ: ಆತಿಥೇಯ ಭಾರತ ತಂಡ ಎಫ್​ಐಎಚ್ ಪುರುಷರ ಹಾಕಿ ಪ್ರೊ ಲೀಗ್​ನಲ್ಲಿ ವಿಶ್ವ ಚಾಂಪಿಯನ್ ಬೆಲ್ಜಿಯಂ ವಿರುದ್ಧದ 2ನೇ ಪಂದ್ಯದಲ್ಲಿ 2-3 ಗೋಲುಗಳಿಂದ ಸೋಲು ಕಂಡಿದೆ. ಮೊದಲ ಪಂದ್ಯದಲ್ಲಿ ಭಾರತ ತಂಡ 1-2ರಿಂದ ಗೆಲುವು ದಾಖಲಿಸಿತ್ತು.

ಕಳಿಂಗ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಭಾರತ ತಂಡ ಉತ್ತಮ ಹೋರಾಟ ಪ್ರದರ್ಶಿಸಿದರೂ ರಕ್ಷಣಾ ವಿಭಾಗದ ಎಡವಟ್ಟಿನಿಂದಾಗಿ ನಿರಾಸೆ ಅನುಭವಿಸಿತು. ಪಂದ್ಯದ 3ನೇ ನಿಮಿಷದಲ್ಲಿ ಅಲೆಕ್ಸಾಂಡರ್ ಹೆಂಡ್ರಿಕ್ಸ್ ಗೋಲು ಸಿಡಿಸಿ ವಿಶ್ವ ನಂ. 1 ಬೆಲ್ಜಿಯಂ ತಂಡಕ್ಕೆ ಆರಂಭಿಕ ಮುನ್ನಡೆ ನೀಡಿದರು. ಬಳಿಕ ಮ್ಯಾಕ್ಸಿಮ್ ಪ್ಲೆನ್​ವಾಕ್ಸ್ 17 ಮತ್ತು 26ನೇ ನಿಮಿಷದಲ್ಲಿ ಸಿಡಿಸಿದ ಫೀಲ್ಡ್ ಗೋಲು ಭಾರತ ತಂಡ ಪಂದ್ಯಕ್ಕೆ ಮರಳುವ ಅವಕಾಶ ನಿರಾಕರಿಸಿತು. ಭಾರತ ಪರ ವಿವೇಕ್ ಸಾಗರ್ ಪ್ರಸಾದ್ (15ನೇ ನಿಮಿಷ) ಮತ್ತು ಅಮಿತ್ ರೋಹಿದಾಸ್ (17) ಗೋಲು ಬಾರಿಸಿದರು.

‘ನಾವು ಈ 2 ಪಂದ್ಯಗಳಿಂದ ಸಾಕಷ್ಟು ಕಲಿತಿದ್ದೇವೆ. ಉತ್ತಮ ಅವಕಾಶಗಳನ್ನು ಪಡೆದರೂ, ಅದನ್ನು ಬಳಸಿಕೊಳ್ಳಲು ವಿಫಲರಾದೆವು’ ಎಂದು ಭಾರತ ತಂಡದ ನಾಯಕ ಮನ್​ಪ್ರೀತ್ ಸಿಂಗ್ ಪಂದ್ಯದ ಬಳಿಕ ಹೇಳಿದರು.

ಆಡಿದ 4 ಪಂದ್ಯಗಳಿಂದ 8 ಅಂಕ ಕಲೆಹಾಕಿದ ಭಾರತ ತಂಡ ಟೂರ್ನಿಯ ಅಂಕಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ. ಬೆಲ್ಜಿಯಂ ತಂಡ ಆಡಿದ 6 ಪಂದ್ಯಗಳಿಂದ 14 ಅಂಕ ಗಳಿಸಿ ಅಗ್ರಸ್ಥಾನಕ್ಕೇರಿದೆ. ಟೂರ್ನಿಯ ಮೊದಲ ಚರಣದಲ್ಲಿ ಭಾರತ ತಂಡ ನೆದರ್ಲೆಂಡ್ ವಿರುದ್ಧದ ಎರಡೂ ಪಂದ್ಯಗಳಲ್ಲಿ ಗೆಲುವು ದಾಖಲಿಸಿತ್ತು.

ಭಾರತ ತಂಡ ಟೂರ್ನಿಯ ಮುಂದಿನ ಮುಖಾಮುಖಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಫೆಬ್ರವರಿ 21 ಮತ್ತು 22ರಂದು ಭುವನೇಶ್ವರದಲ್ಲೇ ಆಡಲಿದೆ.