12 ವರ್ಷಗಳ ಬಳಿಕ ತವರಿನಲ್ಲಿ ಸರಣಿ ಸೋತ ಭಾರತ: ಅನಪೇಕ್ಷಿತ ದಾಖಲೆ ಬರೆದ ರೋಹಿತ್

ಪುಣೆ: ಟೀಮ್ ಇಂಡಿಯಾ ಕಳೆದ 12 ವರ್ಷಗಳಲ್ಲಿ ಸತತ 18 ಟೆಸ್ಟ್ ಸರಣಿ ಗೆದ್ದು ತವರಿನಲ್ಲಿ ಸಾಧಿಸಿದ್ದ ಅಮೋಘ ಪ್ರಾಬಲ್ಯಕ್ಕೆ ಪ್ರವಾಸಿ ನ್ಯೂಜಿಲೆಂಡ್ ತಂಡ ಶನಿವಾರ ಬ್ರೇಕ್ ಹಾಕಿದೆ. ಇದರೊಂದಿಗೆ ಭಾರತ ಬರೋಬ್ಬರಿ 4,331 ದಿನಗಳ ಬಳಿಕ ತವರು ನೆಲದಲ್ಲಿ ಟೆಸ್ಟ್ ಸರಣಿ ಕೈಚೆಲ್ಲಿದೆ. ಎಡಗೈ ಆರಂಭಿಕ ಯಶಸ್ವಿ ಜೈಸ್ವಾಲ್ (77 ರನ್, 65 ರನ್, 9 ಬೌಂಡರಿ, 3 ಸಿಕ್ಸರ್) ಪ್ರತಿರೋಧದ ನಡುವೆಯೂ, ಎಡಗೈ ಸ್ಪಿನ್ನರ್ ಮಿಚೆಲ್ ಸ್ಯಾಂಟ್ನರ್ (104ಕ್ಕೆ 6) ದಾಳಿಗೆ ತತ್ತರಿಸಿದ ರೋಹಿತ್ ಶರ್ಮ ಪಡೆ, ಎರಡನೇ ಟೆಸ್ಟ್ ಪಂದ್ಯದಲ್ಲಿ 113 ರನ್‌ಗಳಿಂದ ನ್ಯೂಜಿಲೆಂಡ್ ಎದುರು ಸೋಲು ಅನುಭವಿಸಿದೆ.

ಇದರೊಂದಿಗೆ ಭಾರತ 3 ಪಂದ್ಯಗಳ ಸರಣಿಯನ್ನು, ಇನ್ನೊಂದು ಪಂದ್ಯ ಬಾಕಿಯಿರುವಂತೆಯೇ 0-2ರಿಂದ ಬಿಟ್ಟುಕೊಟ್ಟಿದೆ. ಈ ಮೂಲಕ ಕಿವೀಸ್ ತಂಡ ಭಾರತದಲ್ಲಿ ಮೊದಲ ಬಾರಿಗೆ ಟೆಸ್ಟ್ ಸರಣಿ ಗೆದ್ದು ಬೀಗಿದೆ. ಕಳೆದ ತಿಂಗಳು ಶ್ರೀಲಂಕಾದಲ್ಲಿ 0-2ರಿಂದ ಸರಣಿ ಸೋತ ಬಳಿಕ ಹೊಸ ನಾಯಕ ಟಾಮ್ ಲಾಥಮ್ ಸಾರಥ್ಯ ಹಾಗೂ ಅನುಭವಿ ಕೇನ್ ವಿಲಿಯಮ್ಸನ್ ಗೈರಿನಲ್ಲಿ ನ್ಯೂಜಿಲೆಂಡ್ ಈ ಐತಿಹಾಸಿಕ ಸಾಧನೆ ಮಾಡಿರುವುದು ವಿಶೇಷವಾಗಿದೆ.

ಎಂಸಿಎ ಕ್ರೀಡಾಂಗಣದಲ್ಲಿ ಶನಿವಾರ ಮುಕ್ತಾಯಗೊಂಡ ಪಂದ್ಯದಲ್ಲಿ 5 ವಿಕೆಟ್‌ಗೆ 198 ರನ್‌ಗಳಿಂದ 3ನೇ ದಿನದಾಟ ಆರಂಭಿಸಿದ ಕಿವೀಸ್, ರವೀಂದ್ರ ಜಡೇಜಾ (72ಕ್ಕೆ 3) ಬಿಗಿ ದಾಳಿಗೆ ನಲುಗಿ 69.4 ಓವರ್‌ಗಳಲ್ಲಿ 255 ರನ್‌ಗಳಿಗೆ ದ್ವಿತೀಯ ಇನಿಂಗ್ಸ್ ಮುಗಿಸಿತು. ಇದರಿಂದ ಸರಣಿ ಜೀವಂತವಿರಿಸಲು 359 ರನ್‌ಗಳ ಸವಾಲಿನ ಗುರಿ ಪಡೆದ ಭಾರತ, ಯಶಸ್ವಿ ಜೈಸ್ವಾಲ್ ಹಾಗೂ ಶುಭಮಾನ್ ಗಿಲ್ (23) ಜತೆಯಾಟದ ನೆರವಿನಿಂದ ಭೋಜನಾ ವಿರಾಮಕ್ಕೆ 1 ವಿಕೆಟ್‌ಗೆ 81 ರನ್‌ಗಳಿಸಿ ದಿಟ್ಟ ಉತ್ತರದ ನಿರೀಕ್ಷೆ ಮೂಡಿಸಿತು.

ಬಳಿಕ ಚಹಾ ವಿರಾಮದ ವೇಳೆಗೆ 181 ರನ್‌ಗಳಿಗೆ 7 ವಿಕೆಟ್ ಕಳೆದುಕೊಂಡ ಭಾರತ ಸೋಲಿನ ಹಾದಿ ಹಿಡಿಯಿತು. ಅಗ್ರ ಕ್ರಮಾಂಕದ ಬ್ಯಾಟರ್‌ಗಳ ವೈಲ್ಯದ ಬಳಿಕ ಮಧ್ಯಮ ಕ್ರಮಾಂಕದಲ್ಲಿ ಆಲ್ರೌಂಡರ್ ರವೀಂದ್ರ ಜಡೇಜಾ (42 ರನ್, 84 ಎಸೆತ, 2 ಬೌಂಡರಿ) ಹೋರಾಟಕ್ಕೆ ಇತರರಿಂದ ಸಮರ್ಥ ಬೆಂಬಲ ದೊರೆಯಲಿಲ್ಲ. ಅಂತಿಮವಾಗಿ 60.2 ಓವರ್‌ಗಳಲ್ಲಿ 245 ರನ್‌ಗಳಿಗೆ ಭಾರತ ಸರ್ವಪತನ ಕಂಡಿತು. ಕಿವೀಸ್ ಸ್ಪಿನ್ನರ್‌ಗಳ ದಾಳಿಗೆ ಕಂಗೆಟ್ಟ ಭಾರತ 98 ರನ್‌ಗಳ ಅಂತರದಲ್ಲಿ ಕೊನೇ 6 ವಿಕೆಟ್ ಕಳೆದುಕೊಂಡು ಸರಣಿ ಸೋಲಿನ ಮುಖಭಂಗ ಅನುಭವಿಸಿತು. 1955ರಲ್ಲಿ ಮೊದಲ ಬಾರಿಗೆ ಭಾರತದಲ್ಲಿ ಟೆಸ್ಟ್ ಪಂದ್ಯವನ್ನಾಡಿದ ನ್ಯೂಜಿಲೆಂಡ್ ಕೊನೆಗೂ 69 ವರ್ಷಗಳ ಬಳಿಕ ತನ್ನ 13ನೇ ಪ್ರಯತ್ನದಲ್ಲಿ ಮೊದಲ ಬಾರಿ ಟೆಸ್ಟ್ ಸರಣಿ ಗೆದ್ದಂತಾಗಿದೆ.

ಮತ್ತೆ ಸ್ಯಾಂಟ್ನರ್ ಶಾಕ್

ಮೊದಲ ಇನಿಂಗ್ಸ್‌ನಲ್ಲಿ ಸ್ಯಾಂಟ್ನರ್ ದಾಳಿಗೆ ಪೆವಿಲಿಯನ್ ಪರೇಡ್ ನಡೆಸಿದ ರೋಹಿತ್ ಪಡೆ, ಎರಡನೇ ಸರದಿಯಲ್ಲೂ ಕ್ರೀಸ್‌ಗೆ ಕಚ್ಚಿನಿಂತು ಆಡುವಲ್ಲಿ ಎಡವಿತು. ಇದರೊಂದಿಗೆ ಎಡಗೈ ಸ್ಪಿನ್ನರ್ ಎದುರು ಭಾರತೀಯ ಬ್ಯಾಟರ್‌ಗಳ ದೌರ್ಬಲ್ಯ ಮತ್ತೆ ಜಗಜ್ಜಾಹೀರಾಯಿತು. ಚೇಸಿಂಗ್‌ನಲ್ಲಿ ರೋಹಿತ್ ಶರ್ಮ (8) ವೈಲ್ಯ ಮುಂದುವರಿಸಿದರು. ಆಗ ಜತೆಯಾದ 22 ವರ್ಷದ ಯಶಸ್ವಿ ಜೈಸ್ವಾಲ್ ಹಾಗೂ ಶುಭಮಾನ್ ಗಿಲ್ ಅಮೂಲ್ಯ ಜತೆಯಾಟ ಮೂಲಕ ಬಲ ತುಂಬಿದರು. ಇವರಿಬ್ಬರು 2ನೇ ವಿಕೆಟ್‌ಗೆ 111 ಎಸೆತಗಳಲ್ಲಿ 49 ರನ್‌ಗಳಿಸಿದರು. ಜೈಸ್ವಾಲ್ ಬಿರುಸಿನಾಟದ ಮೂಲಕ ಕಿವೀಸ್ ಪಡೆಯನ್ನು ದಂಡಿಸಿದರು. ಪ್ರತಿ ಓವರ್‌ಗೆ 6ರ ಸರಾಸರಿಯಂತೆ ರನ್ ಪೇರಿಸಿದ ಇವರಿಬ್ಬರು ಭೋಜನ ವಿರಾಮಕ್ಕೆ ತಂಡದ ಮೊತ್ತವನ್ನು 12 ಓವರ್‌ಗಳಲ್ಲಿ 81ಕ್ಕೇರಿಸಿದರು.

ಜೈಸ್ವಾಲ್ 41 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿದರು. ವಿರಾಮದ ಬಳಿಕ ಇವರಿಬ್ಬರ ವಿಕೆಟ್ ಕಬಳಿಸಿದ ಸ್ಯಾಂಟ್ನರ್ ಕಿವೀಸ್ ಹಿಡಿತ ಬಿಗಿಗೊಳಿಸಿದರು. ಆಗ ಜತೆಯಾದ ವಿರಾಟ್ ಕೊಹ್ಲಿ (17) ಹಾಗೂ ರಿಷಭ್ ಪಂತ್ (0) ಜೋಡಿ ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಬೌಂಡರಿಯೊಂದಿಗೆ ಕೊಹ್ಲಿ ಖಾತೆ ತೆರೆದರೆ, ಇಲ್ಲದ ರನ್ ಕಸಿಯುವ ಯತ್ನದಲ್ಲಿ ಪಂತ್ ರನೌಟ್‌ಗೆ ಬಲಿಯಾದರು.

ಬಡ್ತಿ ಪಡೆದು 6ನೇ ಕ್ರಮಾಂಕದಲ್ಲಿ ಆಡಿದ ವಾಷಿಂಗ್ಟನ್ ಸುಂದರ್ (21) ಕೊಹ್ಲಿ ಜತೆ 5ನೇ ವಿಕೆಟ್‌ಗೆ 46 ಎಸೆತಗಳಲ್ಲಿ 20 ರನ್‌ಗಳಿಸಿದರು. ಕೊಹ್ಲಿ ಬ್ಯಾಕ್‌ುಟ್‌ನಲ್ಲಿ ಆಡಲೆತ್ನಿಸಿ ಸ್ಯಾಂಟ್ನರ್‌ಗೆ ಎಲ್‌ಬಿ ಆದರು. ಡಿಆರ್‌ಎಸ್ ಮೊರೆ ಹೋದರೂ ಬಚಾವಾಗಲಿಲ್ಲ. ರ್ಸ್ರಾಜ್ ಖಾನ್ (9) ನಿರಾಸೆ ಮೂಡಿಸಿದ ಬೆನ್ನಲ್ಲೇ ವಾಷಿಂಗ್ಟನ್ ಸಹ ಗ್ಲೆನ್ ಫಿಲಿಪ್ಸ್‌ಗೆ ವಿಕೆಟ್ ಒಪ್ಪಿಸಿದರು. ನಂತರ ಅನುಭವಿ ಆರ್. ಅಶ್ವಿನ್ (18) ಮತ್ತು ಜಡೇಜಾ ಭಾರತದ ಹೋರಾಟ ಜೀವಂತವಿರಿಸಿ, 8ನೇ ವಿಕೆಟ್‌ಗೆ 75 ಎಸೆತಗಳಲ್ಲಿ 39 ರನ್ ಪೇರಿಸಿದರು. ಅಶ್ವಿನ್ ಔಟಾದ ಬಳಿಕ ಆಕಾಶ್‌ದೀಪ್ (1) 23 ಎಸೆತಗಳನ್ನು ಎದುರಿಸಿ ಜಡೇಜಾ ಹೋರಾಟಕ್ಕೆ ಸಾಥ್ ನೀಡಿದರು. ಜಸ್‌ಪ್ರೀತ್ ಬುಮ್ರಾ (10*) ಬೌಂಡರಿ, ಸಿಕ್ಸರ್ ಸಿಡಿಸಿದರೆ, ಜಡೇಜಾ ಔಟಾಗುವುದರೊಂದಿಗೆ ಭಾರತ ಸೋಲೊಪ್ಪಿಕೊಂಡಿತು.

4. ರೋಹಿತ್ ಶರ್ಮ ತವರಿನಲ್ಲಿ ಗರಿಷ್ಠ ಟೆಸ್ಟ್ ಪಂದ್ಯ ಸೋತ ನಾಯಕರಲ್ಲಿ ಎರಡನೇ ಸ್ಥಾನಕ್ಕೇರಿ ಅನಪೇಕ್ಷಿತ ದಾಖಲೆ ಬರೆದರು. ಎಂಎಕೆ ಪಟೌಡಿ (9) ಮೊದಲ ಸ್ಥಾನದಲ್ಲಿದ್ದಾರೆ. ಮೊಹಮದ್ ಅಜರುದ್ದೀನ್, ಕಪಿಲ್ ದೇವ್ ಸಹ ತಲಾ 4 ಪಂದ್ಯದಲ್ಲಿ ಸೋಲುಂಡಿದ್ದಾರೆ.