ಕೋಲ್ಕತ: ಒಂದು ಪಂದ್ಯ ಬಾಕಿ ಇರುವಂತೆಯೇ ಸರಣಿ ಗೆದ್ದ ಹುಮ್ಮಸ್ಸಿನಲ್ಲಿರುವ ಭಾರತ ತಂಡ, ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧದ 3ನೇ ಹಾಗೂ ಅಂತಿಮ ಟಿ20 ಪಂದ್ಯಕ್ಕೆ ಸನ್ನದ್ಧವಾಗಿದೆ. ನೂತನ ಕೋಚ್ ರಾಹುಲ್ ದ್ರಾವಿಡ್ ಹಾಗೂ ನೂತನ ನಾಯಕ ರೋಹಿತ್ ಶರ್ಮ ಜೋಡಿ ಮೊದಲ ಸರಣಿಯಲ್ಲೇ ಮೋಡಿ ಮಾಡಿದ್ದು, ಇದೀಗ ಸರಣಿ ಕ್ಲೀನ್ಸ್ವೀಪ್ ಕನಸಿನಲ್ಲಿದೆ. ಅಲ್ಲದೆ, ಅಂತಿಮ ಪಂದ್ಯಕ್ಕೆ ಕೆಲವೊಂದು ಪ್ರಯೋಗಕ್ಕೆ ಮುಂದಾಗುವ ಸಾಧ್ಯತೆಗಳಿವೆ. 19 ವಯೋಮಿತಿ ಹಾಗೂ ಭಾರತ ಎ ತಂಡಗಳಿಗೆ ಮಾರ್ಗದರ್ಶಕರಾಗಿದ್ದ ವೇಳೆಯೂ ದ್ರಾವಿಡ್ ತಂಡದಲ್ಲಿ ಆವರ್ತನ ಪದ್ಧತಿ ಜಾರಿಗೊಳಿಸಿದ್ದರು. ಇದೀಗ ಸರಣಿ ವಶವಾಗಿರುವ ಹಿನ್ನೆಲೆಯಲ್ಲಿ ತಂಡದಲ್ಲಿ ಕೆಲವೊಂದು ಬದಲಾವಣೆಯಾಗುವ ಸಾಧ್ಯತೆಗಳಿವೆ. ಈ ಪಂದ್ಯದಲ್ಲೂ ಟಾಸ್ ಪ್ರಮುಖ ಪಾತ್ರವಹಿಸಲಿದೆ. ಕಡೇ ಎರಡು ವಾರಗಳಲ್ಲಿ 5 ಟಿ20 ಪಂದ್ಯಗಳನ್ನಾಡಿರುವ ಪ್ರವಾಸಿ ನ್ಯೂಜಿಲೆಂಡ್ ಆಟಗಾರರು ಸಾಕಷ್ಟು ಬಳಲಿದ್ದು, ವೈಟ್ವಾಷ್ ಭೀತಿಯಿಂದ ತಪ್ಪಿಸಿಕೊಳ್ಳಲು ಹೋರಾಡಬೇಕಿದೆ.
