ಇಂಗ್ಲೆಂಡ್​​ ಮೇಲುಗೈ ಸಾಧಿಸಲು ಗಿಲ್​ ಮಾಡಿದ ಈ ಎಡವಟ್ಟೇ ಕಾರಣ: ರಿಕಿ ಪಾಂಟಿಂಗ್ ಟೀಕೆ! Ind vs Eng

Ind vs Eng : ಮ್ಯಾಂಚೆಸ್ಟರ್​ನಲ್ಲಿ ಟೀಮ್​ ಇಂಡಿಯಾ ವಿರುದ್ಧ ನಡೆಯುತ್ತಿರುವ 4ನೇ ಟೆಸ್ಟ್‌ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ತನ್ನದೇ ಆದ ಶೈಲಿಯ 'ಬಜ್‌ಬಾಲ್' ಕ್ರಿಕೆಟ್​ ಆಡಿತು. ಆರಂಭಿಕ ಆಟಗಾರರಾದ ಜ್ಯಾಕ್ ಕ್ರಾಲಿ ಮತ್ತು ಬೆನ್ ಡಕೆಟ್ ಟೆಸ್ಟ್​ ಅನ್ನೋದನ್ನು ಮರೆತು ಏಕದಿನ ಮಾದರಿಯಲ್ಲೇ ಬ್ಯಾಟ್​ ಬೀಸಿದರು. ಇದರಲ್ಲಿ ಯಶಸ್ವಿ ಸಹ ಆದರು. ಕ್ರಾಲಿ 113 ಎಸೆತಗಳಲ್ಲಿ 84 ರನ್ ಗಳಿಸಿದರೆ, ಡಕೆಟ್ ಕೇವಲ 100 ಎಸೆತಗಳಲ್ಲಿ 94 ರನ್ ಗಳಿಸಿದರು. ಮ್ಯಾಂಚೆಸ್ಟರ್​ನಲ್ಲಿ ರನ್​ಗಳ ಹೊಳೆ ಹರಿಸಿದ ಕ್ರಾಲಿ ಮತ್ತು ಡಕೆಟ್​ ಜೋಡಿಯನ್ನು ತಡೆಯಲು ಭಾರತೀಯ ಬೌಲರ್‌ಗಳಿಗೆ ಸಾಧ್ಯವಾಗಲಿಲ್ಲ.

ಅಬ್ಬರದ ಬ್ಯಾಟಿಂಗ್​ ಮೂಲಕ ಒಂದೇ ಸೆಷನ್‌ನಲ್ಲಿ 148 ರನ್ ಗಳಿಸಿದ್ದ ಇಂಗ್ಲೆಂಡ್, ಗುರುವಾರ ಎರಡನೇ ದಿನದಾಟದ ಅಂತ್ಯಕ್ಕೆ ಕೇವಲ ಎರಡು ವಿಕೆಟ್‌ಗಳ ನಷ್ಟಕ್ಕೆ 225 ರನ್ ಗಳಿಸುವ ಮೂಲಕ ಬಲಿಷ್ಠ ಸ್ಥಿತಿಯನ್ನು ತಲುಪಿತು. ಈ ಸಂದರ್ಭದಲ್ಲಿ, ಆಸ್ಟ್ರೇಲಿಯಾದ ದಿಗ್ಗಜ ಆಟಗಾರ ರಿಕಿ ಪಾಂಟಿಂಗ್ ಟೀಮ್, ಇಂಡಿಯಾ ನಾಯಕ ಶುಭಮಾನ್​ ಗಿಲ್ ಮತ್ತು ಪ್ರಮುಖ ವೇಗಿ ಜಸ್​ಪ್ರೀತ್​ ಬುಮ್ರಾ ಅವರನ್ನು ಟೀಕಿಸಿದ್ದಾರೆ.

ಸ್ಕೈ ಸ್ಪೋರ್ಟ್ಸ್‌ನಲ್ಲಿ ಮಾತನಾಡಿದ ರಿಕಿ ಪಾಂಟಿಂಗ್, ಶುಭಮಾನ್ ಗಿಲ್ ಅವರ ಹಲವಾರು ತಂತ್ರಗಳು ಇಂಗ್ಲೆಂಡ್ ತಂಡಕ್ಕೆ ಮೇಲುಗೈ ಸಾಧಿಸಲು ಸಹಾಯ ಮಾಡಿದೆ ಎಂದರು. ಮೊಹಮ್ಮದ್ ಸಿರಾಜ್‌ಗಿಂತ ಮೊದಲು ಚೊಚ್ಚಲ ಆಟಗಾರ ಅನ್ಶುಲ್ ಕಾಂಬೋಜ್ ಅವರೊಂದಿಗೆ ಬೌಲಿಂಗ್ ಆರಂಭಿಸುವ ನಿರ್ಧಾರವನ್ನು ಪಾಂಟಿಂಗ್ ಟೀಕಿಸಿದರು.

ಕಾಂಬೋಜ್ ತಮ್ಮ ಮೊದಲ ಓವರ್‌ನಲ್ಲಿ ಮೂರು ಬೌಂಡರಿಗಳನ್ನು ಬಿಟ್ಟುಕೊಟ್ಟರು ಮತ್ತು ಇದು ಇಂಗ್ಲೆಂಡ್‌ನ ಆರಂಭಿಕ ವೇಗಕ್ಕೆ ಕಾರಣವಾಯಿತು ಎಂದು ಪಾಂಟಿಂಗ್ ಭಾವಿಸಿದರು. ಇನ್ನು ಗಿಲ್ ಅವರ ದೋಷಪೂರಿತ ಫೀಲ್ಡಿಂಗ್​ ನಿಯೋಜನೆಗಳನ್ನು ಪಾಂಟಿಂಗ್​ ಉಲ್ಲೇಖಿಸಿದರು. ಬೆನ್ ಡಕೆಟ್ ಅವರ ಮೊದಲ ಆರು ಬೌಂಡರಿಗಳಲ್ಲಿ ಐದು ಸ್ಕ್ವೇರ್ ಹಿಂದೆ ಬಂದವು ಎಂದು ಹೇಳಿದರು.

ಇದನ್ನೂ ಓದಿ: ಗಾಯದ ನಡುವೆ ಪಂತ್ ಕೆಚ್ಚದೆಯ ಆಟ: ಆಲ್‌ರೌಂಡರ್ ಶಾರ್ದೂಲ್​ ಠಾಕೂರ್ ಹೇಳಿದ್ದೇನು? Rishabh Pant

ಬುಮ್ರಾ ಬೌಲಿಂಗ್​ ಬಗ್ಗೆಯೂ ಅಪಸ್ವರ

ಜಸ್​ಪ್ರೀತ್​ ಬುಮ್ರಾ ಅವರು ಸ್ಟ್ಯಾಥಮ್ ಎಂಡ್ ಬದಲಿಗೆ ಆಂಡರ್ಸನ್ ಎಂಡ್‌ನಿಂದ ಬೌಲಿಂಗ್ ಮಾಡುವ ಮೂಲಕ ತಪ್ಪು ಮಾಡಿದರು. ವಾಸ್ತವವಾಗಿ, ಸ್ಟ್ಯಾಥಮ್ ಎಂಡ್‌ನಿಂದ ಇದಕ್ಕೂ ಮೊದಲು ಹೆಚ್ಚಿನ ವಿಕೆಟ್‌ಗಳು ಬಿದ್ದಿವೆ ಎಂದು ಪಾಂಟಿಂಗ್ ಗಿಲ್ ಮತ್ತು ಬುಮ್ರಾ ಅವರ ಶೈಲಿಯನ್ನು ಟೀಕಿಸಿದರು.

ಸಂಕಷ್ಟದ ಸ್ಥಿತಿಯಲ್ಲಿ ಭಾರತ

ಭಾರತ ತಂಡವು ತೆಂಡೂಲ್ಕರ್-ಆಂಡರ್ಸನ್ ಟ್ರೋಫಿಯ ಭಾಗವಾಗಿ ಇಂಗ್ಲೆಂಡ್ ವಿರುದ್ಧ ಐದು ಟೆಸ್ಟ್ ಪಂದ್ಯಗಳನ್ನು ಆಡುತ್ತಿರುವಾಗ ಭಾರತೀಯ ಬೌಲರ್‌ಗಳು ಹೇರಳವಾಗಿ ರನ್‌ಗಳನ್ನು ನೀಡುತ್ತಿದ್ದಾರೆ. ಆತಿಥೇಯ ತಂಡ 2-1 ಮುನ್ನಡೆಯಲ್ಲಿದ್ದರೂ, ಮ್ಯಾಂಚೆಸ್ಟರ್‌ನಲ್ಲಿ ನಡೆಯುವ ನಾಲ್ಕನೇ ಟೆಸ್ಟ್ ಪಂದ್ಯವನ್ನು ಗೆದ್ದರೆ ಮಾತ್ರ ಟೀಮ್ ಇಂಡಿಯಾದ ಸರಣಿಯ ಭರವಸೆಯನ್ನು ಜೀವಂತವಾಗಿರಿಸಿಕೊಳ್ಳಬಹುದು. ಈ ಪಂದ್ಯದಲ್ಲಿ, ಟಾಸ್ ಸೋತ ಭಾರತ ತಂಡ ಮೊದಲು ಬ್ಯಾಟಿಂಗ್ ಮಾಡಿತು. ಮೊದಲ ಇನ್ನಿಂಗ್ಸ್‌ನಲ್ಲಿ 358 ರನ್ ಗಳಿಸಿತು. ಇಂಗ್ಲೆಂಡ್ ಇದಕ್ಕೆ ತಕ್ಕ ಉತ್ತರ ನೀಡುತ್ತಿದೆ. ಗುರುವಾರದ ಎರಡನೇ ದಿನದಾಟದಂದು ಅವರು 46 ಓವರ್‌ಗಳಲ್ಲಿ ಕೇವಲ ಎರಡು ವಿಕೆಟ್‌ಗಳ ನಷ್ಟಕ್ಕೆ 225 ರನ್ ಗಳಿಸಿದೆ. ರವೀಂದ್ರ ಜಡೇಜಾ ಕ್ರಾಲಿಯನ್ನು ಔಟ್ ಮಾಡಿದರು ಮತ್ತು ಅನ್ಶುಲ್ ಡಕೆಟ್​ ಅವರನ್ನು ಔಟ್ ಮಾಡಿದರು. ಸದ್ಯ ಓಲಿ ಪೋಪ್ 20 ರನ್‌ಗಳೊಂದಿಗೆ ಮತ್ತು ಜೋ ರೂಟ್ 11 ರನ್‌ಗಳೊಂದಿಗೆ ಕ್ರೀಸ್‌ನಲ್ಲಿದ್ದಾರೆ.

ಗುರುವಾರ ಭಾರತದ ಬೌಲರ್‌ಗಳಲ್ಲಿ ಬುಮ್ರಾ 13 ಓವರ್‌ಗಳಲ್ಲಿ 37 ರನ್, ಅನ್ಶುಲ್ 10 ಓವರ್‌ಗಳಲ್ಲಿ 48 ರನ್, ಸಿರಾಜ್ 10 ಓವರ್‌ಗಳಲ್ಲಿ 58 ರನ್, ಶಾರ್ದೂಲ್ ಠಾಕೂರ್ 5 ಓವರ್‌ಗಳಲ್ಲಿ 35 ರನ್ ಮತ್ತು ರವೀಂದ್ರ ಜಡೇಜಾ 8 ಓವರ್‌ಗಳಲ್ಲಿ 37 ರನ್ ಬಿಟ್ಟುಕೊಟ್ಟರು. (ಏಜೆನ್ಸೀಸ್​)

https://www.vijayavani.net/yash-dayal-in-trouble-again-another-rape-case-filed-against-rcb-cricketer

https://www.vijayavani.net/renukaswamy-death-case-actress-ramya-tweets-on-supreme-court-statements-goes-viral