ನ್ಯೂಜಿಲೆಂಡ್ ವಿರುದ್ಧ ಕಳೆದ ಸರಣಿಯ ವೇಳೆ ಭಾರತ ತಂಡದಲ್ಲಿ ಅನುಭವಿ ಆಟಗಾರ್ತಿಯರೇ ಹೆಚ್ಚಿದ್ದರು. ಸ್ಮೃತಿ ಮಂದನಾಗೆ ಸೂಕ್ತ ಜತೆಗಾರ್ತಿಯ ಕೊರತೆ ಇತ್ತು. ಹೊಸ ಕೋಚ್ ಡಬ್ಲ್ಯುವಿ ರಾಮನ್, ತಂಡದಲ್ಲಿ ಮಿಥಾಲಿ ರಾಜ್ಗೆ ಸ್ಥಾನ ನೀಡಬೇಕೇ ಎನ್ನುವ ಗೊಂದಲದಲ್ಲಿದ್ದರು. ಆದರೆ, ಈ ಎಲ್ಲ ಪ್ರಶ್ನೆಗಳಿಗೆ ಈಗ ಉತ್ತರ ಸಿಕ್ಕಿದೆ. ಮಿಥಾಲಿ ರಾಜ್ ಟಿ20 ನಿವೃತ್ತಿಯಿಂದ ತೆರವಾದ ಸ್ಥಾನ ತುಂಬಿರುವ ಶೆಫಾಲಿ ವರ್ಮ, ಸ್ಮೃತಿಗಿಂತ ಆಕ್ರಮಣಕಾರಿಯಾಗಿ ಆಡಿದ್ದಾರೆ. ಕಿವೀಸ್ ಪ್ರವಾಸದ ವೇಳೆ ತಂಡದಲ್ಲಿ ಸ್ಥಾನ ಪಡೆಯಲು ವಿಫಲವಾಗಿದ್ದ ಶಿಖಾ ಪಾಂಡೆ ಹಾಗೂ ರಾಜೇಶ್ವರಿ ಗಾಯಕ್ವಾಡ್ ವಿಶ್ವಕಪ್ನಲ್ಲಿ ತಂಡದ ಪ್ರಧಾನ ಅಸ್ತ್ರವಾಗಿದ್ದಾರೆ. ಕಿವೀಸ್ ತಂಡದಲ್ಲಿ ಎಡಗೈ ಆಟಗಾರ್ತಿಯರು ಇಲ್ಲದಿರುವ ಕಾರಣ, ಇನ್ನೊಬ್ಬ ಎಡಗೈ ಸ್ಪಿನ್ನರ್ರನ್ನು ಆಡಿಸುವ ಯೋಚನೆಯನ್ನೂ ಭಾರತ ತಂಡ ಮಾಡಬಹುದು.
