ಡಿಎಲ್ ರೂಲ್ಸ್ ರೂಪಿಸಿದ್ದ ಟೋನಿ ಲೂಯಿಸ್ ನಿಧನ

ಲಂಡನ್: ಸೀಮಿತ ಓವರ್ ಕ್ರಿಕೆಟ್ ಪಂದ್ಯಕ್ಕೆ ಮಳೆ ಅಡಚಣೆ ತಂದಾಗ ಬಳಸಲಾಗುವ ಡಕ್ವರ್ತ್-ಲೂಯಿಸ್ ನಿಯಮವನ್ನು ರೂಪಿಸಿದ್ದ ಇಂಗ್ಲೆಂಡ್​ನ ಗಣಿತ ತಜ್ಞ ಟೋನಿ ಲೂಯಿಸ್ ಬುಧವಾರ ನಿಧನ ಹೊಂದಿದರು. ಅವರಿಗೆ 78 ವರ್ಷ ವಯಸ್ಸಾಗಿತ್ತು. ಸಹ ಗಣಿತ ತಜ್ಞ ಫ್ರಾಂಕ್ ಡಕ್ವರ್ತ್ ಜತೆಗೂಡಿ ಲೂಯಿಸ್ ರೂಪಿಸಿದ್ದ, ಅವರಿಬ್ಬರದೇ ಹೆಸರಿನ ಡಿ-ಎಲ್ ನಿಯಮ 1996-97ರಲ್ಲಿ ಜಿಂಬಾಬ್ವೆ-ಇಂಗ್ಲೆಂಡ್ ನಡುವಿನ ಏಕದಿನ ಪಂದ್ಯದಲ್ಲಿ ಮೊದಲ ಬಾರಿ ಬಳಕೆಯಾಗಿತ್ತು.

1999ರ ವಿಶ್ವಕಪ್​ನಲ್ಲಿ ಐಸಿಸಿ ಅಧಿಕೃತವಾಗಿ ಈ ನಿಯಮವನ್ನು ಜಾರಿಗೆ ತಂದಿತ್ತು. ಆಸ್ಟ್ರೇಲಿಯಾದ ಕ್ವೀನ್ಸ್​ಲ್ಯಾಂಡ್ ಗಣಿತ ತಜ್ಞ ಸ್ಟೀವನ್ ಸ್ಟರ್ನ್ ಎಂಬುವವರು 2014ರಲ್ಲಿ ಈ ನಿಯಮವನ್ನು ಮತ್ತಷ್ಟು ಪರಿಷ್ಕರಿಸಿದ ಬಳಿಕ ಇದು ಡಕ್ವರ್ತ್-ಲೂಯಿಸ್-ಸ್ಟರ್ನ್ (ಡಿಎಲ್​ಎಸ್) ಎಂದು ಬದಲಾಗಿದೆ. 2015ರ ವಿಶ್ವಕಪ್​ನಿಂದ ಇದು ಬಳಕೆಯಲ್ಲಿದೆ.

ಟೋನಿ ಲೂಯಿಸ್ ಕ್ರಿಕೆಟ್​ಗೆ ನೀಡಿರುವ ಕೊಡುಗೆ ಅಪಾರ. ಅವರ ಕುಟುಂಬಕ್ಕೆ ದುಃಖ ಭರಿಸುವ ಶಕ್ತಿ ಸಿಗಲಿ ಎಂದು ಇಂಗ್ಲೆಂಡ್ ಕ್ರಿಕೆಟ್ ಮಂಡಳಿ ತಿಳಿಸಿದೆ. ಲಂಕಾಷೈರ್​ನ ಬೋಲ್ಟನ್​ನಲ್ಲಿ ಜನಿಸಿದ್ದ ಟೋನಿ ಲೂಯಿಸ್, ಶೆಫೀಲ್ಡ್ ವಿಶ್ವವಿದ್ಯಾಲಯದಲ್ಲಿ ಗಣಿತ ಮತ್ತು ಸಂಖ್ಯಾಶಾಸ್ತ್ರದಲ್ಲಿ ಪದವಿ ಪಡೆದಿದ್ದರು.

ಕ್ರಿಕೆಟ್ ಮತ್ತು ಗಣಿತಕ್ಕೆ ನೀಡಿದ ಕೊಡುಗೆಗಳಿಗಾಗಿ 2010ರಲ್ಲಿ ಲೂಯಿಸ್ ಮತ್ತು ಡಕ್ವರ್ತ್​ಗೆ ಬ್ರಿಟನ್​ನಲ್ಲಿ ಎಂಬಿಇ ಗೌರವ ಲಭಿಸಿತ್ತು. 80 ವರ್ಷದ ಫ್ರಾಂಕ್ ಡಕ್ವರ್ತ್ ಲಂಕಾಷೈರ್​ನಲ್ಲೇ ನಿವೃತ್ತ ಜೀವನ ನಡೆಸುತ್ತಿದ್ದಾರೆ.

1992ರ ವಿಶ್ವಕಪ್ ವಿವಾದ ಸ್ಪೂರ್ತಿ

ಮೊದಲಿಗೆ ಕ್ರಿಕೆಟ್ ಪಂದ್ಯದಲ್ಲಿ ಮಳೆ ಬಂದಾಗ ಬಳಸಲಾಗುತ್ತಿದ್ದ ನಿಯಮ ಸಾಕಷ್ಟು ಲೋಪದೋಷಗಳಿಂದ ಕೂಡಿತ್ತು. 2ನೇ ಇನಿಂಗ್ಸ್​ನಲ್ಲಿ ಬ್ಯಾಟಿಂಗ್ ಮಾಡುವ ತಂಡ ಕಳೆದುಕೊಂಡ ವಿಕೆಟ್ ಪರಿಗಣನೆಗೆ ಬರುತ್ತಿರಲಿಲ್ಲ. 1992ರ ವಿಶ್ವಕಪ್ ಸೆಮಿಫೈನಲ್​ನಲ್ಲಿ ದಕ್ಷಿಣ ಆಫ್ರಿಕಾ ತಂಡ ಈ ನಿಯಮದಿಂದ ದೊಡ್ಡ ಹೊಡೆತ ತಿಂದಿತ್ತು. ಇಂಗ್ಲೆಂಡ್ ವಿರುದ್ಧದ ಆ ಪಂದ್ಯದಲ್ಲಿ 13 ಎಸೆತಗಳಲ್ಲಿ 22 ರನ್ ಗಳಿಸಬೇಕಾಗಿದ್ದಾಗ ಮಳೆ ಬಂದಿತ್ತು. ಬಳಿಕ ಮಳೆ ನಿಯಮ ಅಳವಡಿಸಿದಾಗ ದ. ಆಫ್ರಿಕಾ 1 ಎಸೆತದಲ್ಲೇ 21 ರನ್ ಗಳಿಸಬೇಕಾಗಿತ್ತು. ಈ ಘಟನೆಯ ಬಳಿಕ ಬ್ರಿಟನ್ ವಿವಿ ಗಣಿತ ಉಪನ್ಯಾಸಕರಾಗಿದ್ದ ಡಕ್ವರ್ತ್ ಮತ್ತು ಲೂಯಿಸ್ ಜತೆಗೂಡಿ ಹೊಸ ನಿಯಮವನ್ನು ರೂಪಿಸಲು ಆರಂಭಿಸಿದ್ದರು. ಯಾರಾದರೂ ಈಗಿರುವುದಕ್ಕಿಂತ ಉತ್ತಮ ನಿಯಮವನ್ನು ರೂಪಿಸಬೇಕಾಗಿದೆ. ಈ ಸಮಸ್ಯೆಗೆ ಗಣಿತಶಾಸ್ತ್ರದ ಮೂಲಕ ಪರಿಹಾರ ಕಂಡುಕೊಳ್ಳಬೇಕಾಗಿದೆ ಎಂದು ಆಗ ರೇಡಿಯೊದಲ್ಲಿ ಕೇಳಿಬಂದ ಮಾತಿನಿಂದ ಸ್ಪೂರ್ತಿ ಪಡೆದಿದ್ದೆವು’ ಎಂದು ಡಕ್ವರ್ತ್ ಹಿಂದೊಮ್ಮೆ ಹೇಳಿದ್ದರು. ಆದರೆ ಡಕ್ವರ್ತ್-ಲೂಯಿಸ್ ನಿಯಮವೂ ಕೂಡ ಹಲವು ಬಾರಿ ವಿವಾದಗಳನ್ನು ಸೃಷ್ಟಿಸಿದ ದೃಷ್ಟಾಂತಗಳಿವೆ. ಈ ನಿಯಮ ಸಾಮಾನ್ಯ ಕ್ರಿಕೆಟ್ ಪ್ರೇಮಿಗಳಿಗೆ ಅರ್ಥವಾಗುವುದಿಲ್ಲ ಎಂಬ ದೂರುಗಳೂ ಇವೆ.

https://www.vijayavani.net/9-year-celebration-for-2011-world-cup-victory-of-india/

https://www.vijayavani.net/%e0%b2%97%e0%b2%82%e0%b2%97%e0%b3%82%e0%b2%b2%e0%b2%bf%e0%b2%af%e0%b2%82%e0%b2%a4%e0%b3%86-%e0%b2%a7%e0%b3%8a%e0%b3%95%e0%b2%a8%e0%b2%bf-%e0%b2%ac%e0%b3%86%e0%b2%82%e0%b2%ac%e0%b2%b2%e0%b2%bf%e0%b2%b8/