ಹಾಕಿ

ಹಾಕಿ ವಿಶ್ವಕಪ್: ಇಂಗ್ಲೆಂಡ್​ ಎದುರು ಮುಗ್ಗರಿಸಿದ ಭಾರತ

ಹಾಕಿ ವಿಶ್ವಕಪ್: ಇಂಗ್ಲೆಂಡ್​ ಎದುರು ಮುಗ್ಗರಿಸಿದ ಭಾರತ
ಹಾಕಿ ವಿಶ್ವಕಪ್: ಇಂಗ್ಲೆಂಡ್​ ಎದುರು ಮುಗ್ಗರಿಸಿದ ಭಾರತ
Published on: 

ಆಮ್​ಸ್ಟೆಲ್ವೀನ್​ (ನೆದರ್ಲ್ಯಾಂಡ್ಸ್​): ಮೊದಲಾರ್ಧದಲ್ಲಿ ಮುನ್ನಡೆ ಸಾಧಿಸಿದರೂ, ದ್ವಿತೀಯಾರ್ಧದಲ್ಲಿ 3 ಗೋಲುಗಳನ್ನು ಬಿಟ್ಟುಕೊಟ್ಟ ಭಾರತದ ಪುರುಷರ ತಂಡ ಎಫ್​ಐಎಚ್​ ಹಾಕಿ ವಿಶ್ವಕಪ್​ ಟೂರ್ನಿಯ (

men''s Hockey World Cup

) ತನ್ನ 2ನೇ ಲೀಗ್​ ಪಂದ್ಯದಲ್ಲಿ ಇಂಗ್ಲೆಂಡ್​ ಎದುರು 2-4 ಅಂತರದಿಂದ ಪರಾಭವಗೊಂಡಿತು. ಇದರಿಂದ ಪಾಕಿಸ್ತಾನ ವಿರುದ್ಧದ ಮಹತ್ವದ ಪಂದ್ಯಕ್ಕೆ ಮುನ್ನ ಆಘಾತ ಎದುರಿಸಿರುವ ಭಾರತ, ಹಾಕಿ ವಿಶ್ವ ಸಮರದಲ್ಲಿ ಆಂಗ್ಲರೆದುರು 32 ವರ್ಷಗಳಿಂದ ಗೆಲುವು ಕಾಣದ ಕೊರತೆಯನ್ನೂ ನೀಗಿಸಲು ವಿಫಲವಾಯಿತು.

ವ್ಯಾಗನರ್​ ಸ್ಟೇಡಿಯಂನಲ್ಲಿ ಸೋಮವಾರ ನಡೆದ ಡಿ ಗುಂಪಿನ ಪ್ರಮುಖ ಕಾದಾಟದಲ್ಲಿ ಭಾರತ ತಂಡ ಮೊದಲಾರ್ಧದಲ್ಲಿ 2-1ರಿಂದ ಮುನ್ನಡೆಯಲ್ಲಿತ್ತು. ನಿಕೋಲಸ್​ ಬಂದುರಕ್​ ಸಿಡಿಸಿದ ಗೋಲಿನಿಂದ ಇಂಗ್ಲೆಂಡ್​ 14ನೇ ನಿಮಿಷದಲ್ಲಿ ಮುನ್ನಡೆ ಸಾಧಿಸಿತು. ಆದರೆ 2ನೇ ಕ್ವಾರ್ಟರ್​ನಲ್ಲಿ ನಾಯಕ ಹರ್ಮಾನ್​ಪ್ರೀತ್​ ಸಿಂಗ್​ (17ನೇ ನಿಮಿಷ) ಮತ್ತು ದಿಲ್​ಪ್ರೀತ್​ ಸಿಂಗ್​ (25) ಬಾರಿಸಿದ ಗೋಲಿನಿಂದ ಭಾರತ ಮುನ್ನಡೆ ಕಂಡಿತು.

ದ್ವಿತೀಯಾರ್ಧದಲ್ಲಿ ಸ್ಟುವರ್ಟ್​ ರುಶ್​ಮೀರ್​ (39), ಹೆನ್ರಿ ಕ್ರಾಫ್ಟ್ (43) ಮತ್ತು ನಿಕೋಲಸ್​ ಬಂದುರಕ್​ (55) ಬಾರಿಸಿದ ಗೋಲಿನಿಂದ ಭಾರತ ಸೋಲು ಅನುಭವಿಸಿತು. ವಿಶ್ವ ನಂ. 3 ಇಂಗ್ಲೆಂಡ್​ ಎದುರು ಭಾರತ ಆರಂಭಿಕ ಮೇಲುಗೈ ಸಾಧಿಸಿದರೂ, ಕೊನೇ ಕ್ಷಣದಲ್ಲಿ ಮುಗ್ಗರಿಸುವ ಚಾಳಿ ಮುಂದುವರಿಸಿತು.

ಭಾರತ ಕೊನೇ ಕ್ವಾರ್ಟರ್​ನಲ್ಲಿ ತಿರುಗೇಟು ನೀಡುವ ತವಕದಲ್ಲಿದ್ದಾಗ ನೀಲಕಂಠ ಶರ್ಮ ಹಳದಿ ಕಾರ್ಡ್​ ಪಡೆದರು. ಇದರಿಂದ ಭಾರತ 5 ನಿಮಿಷಗಳ ಕಾಲ 10 ಆಟಗಾರರೊಂದಿಗೆ ಆಡುವ ಹಿನ್ನಡೆ ಎದುರಿಸಿತು. ಇದರಿಂದಾಗಿ ಮೇಲುಗೈ ಉಳಿಸಿಕೊಂಡ ಇಂಗ್ಲೆಂಡ್​ ಎಲ್ಲ 3 ಅಂಕಗಳನ್ನು ಬಾಚಿಕೊಂಡಿತು.

ವೇಲ್ಸ್​ ಎದುರು 3-1ರಿಂದ ಗೆದ್ದು ಬೀಗಿದ್ದ ಭಾರತಕ್ಕೆ ಈ ಸೋಲು ಹಿನ್ನಡೆ ತಂದಿದೆ. ಭಾರತ ಹಾಕಿ ವಿಶ್ವಕಪ್​ನಲ್ಲಿ 1994ರಲ್ಲಿ ಕೊನೆಯದಾಗಿ ಆಂಗ್ಲರೆದುರು ಗೆಲುವು ಕಂಡಿದೆ. ಈ ಮುನ್ನ 2002, 2006, 2010 ಹಾಗೂ 2014ರ ಆವೃತ್ತಿಯಲ್ಲೂ ಸೋತಿದ್ದರೆ, 2023ರಲ್ಲಿ ಉಭಯ ತಂಡಗಳ ನಡುವಿನ ಪಂದ್ಯ ಗೋಲುರಹಿತ ಡ್ರಾನಲ್ಲಿ ಕೊನೆಗೊಂಡಿತ್ತು.
ಪಾಕ್​ ಎದುರು ಕನಿಷ್ಠ ಡ್ರಾ ಅಗತ್ಯ
ಆಡಿದ 2 ಪಂದ್ಯಗಳಿಂದ 3 ಅಂಕ ಗಳಿಸಿರುವ ಭಾರತ ತಂಡ ಟೂರ್ನಿಯ 2ನೇ ಸುತ್ತಿಗೇರಲು ಪಾಕಿಸ್ತಾನ ವಿರುದ್ಧದ ತನ್ನ ಮುಂದಿನ ಪಂದ್ಯದಲ್ಲಿ ಕನಿಷ್ಠ ಡ್ರಾ ಸಾಧಿಸಬೇಕಾಗಿದೆ. ಡಿ ಗುಂಪಿನ ಅಂಕಪಟ್ಟಿಯಲ್ಲಿ ಭಾರತ ಸದ್ಯ 2ನೇ ಸ್ಥಾನದಲ್ಲಿದೆ. ಪಾಕ್​ ವಿರುದ್ಧ ಸೋತರೆ ಭಾರತ ಪ್ರಶಸ್ತಿ ರೇಸ್​ನಿಂದ ಹೊರಬೀಳಲಿದೆ. ಮೊದಲ ಪಂದ್ಯದಲ್ಲಿ ಆಂಗ್ಲರೆದುರು ಸೋತಿದ್ದ ಪಾಕ್​, 2ನೇ ಪಂದ್ಯದಲ್ಲಿ ವೇಲ್ಸ್​ ಎದುರು ಡ್ರಾಕ್ಕೆ ತೃಪ್ತಿಪಟ್ಟಿದೆ.
ಭಾರತಕ್ಕೆ ಮುಂದಿನ ಪಂದ್ಯ
ಯಾವಾಗ: ಬುಧವಾರ
ಎದುರಾಳಿ: ಪಾಕಿಸ್ತಾನ
ಆರಂಭ: ಸಂಜೆ 6.30
men''s hockey world cup
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net